Noa ˈtu to ˈu apî, ua here au i te parau mau. Ua hinaaro vau e pûpû i to ˈu ora ia Iehova e ia bapetizohia. Ua naea ia ˈu tera fa i te 13raa o to ˈu matahiti. I te 14raa o to ˈu matahiti, ua ani mai taeae Helge Linck a ua feruri anei au i te riro ei pionie, oia hoi e horoa i te rahiraa o to ˈu taime i roto i te ohipa pororaa. Te haamanaˈo maitai ra vau i tera taime. Noa ˈtu ua rave aˈena to ˈu papa e to ˈu mama i tera taviniraa no te hoê tau poto, aita i papu ia ˈu eaha mau na te hoê pionie. Ua ueue râ taeae Helge i te hoê huero i roto i to ˈu aau, oia hoi te hinaaro e tavini atu â ia Iehova.

 I te matahiti 1974, no te mau fifi poritita i Etiopia, mea rahi te taata tei tapeahia e tei haapohehia e ua arepurepu roa te oraraa. Aita faahou matou i nehenehe e poro i tera e tera fare e ua tatuhaahia matou ei pǔpǔ nainai no te mau putuputuraa. E vaˈu tamarii matou e ua faaineine to matou na metua ia matou ia faaruru i te tahi atu mau patoiraa. Ua tauturu mai te mau aratairaa Bibilia ia taa eaha te auraa ia tapea i te taiva ore. Ua haapii mai matou e tauturu iho â Iehova ia matou ia ite eaha te parau ia uiuihia matou e i teihea taime mea maitai aˈe eiaha e pahono atu.—Mataio 10:19; 27:12, 14.

 I te otiraa ta ˈu tau haapiiraa, ua rave au i te ohipa i roto i te hoê taiete manureva no Etiopia. I te hoê poipoi i to ˈu taeraa i te ohipa, ua haapopou mai te tahi mau hoa no te mea ua maitihia vau no te aratai i te taahiraa no te hoê oroa here aiˈa. Oioi roa vau i te faaara i to ˈu raatira eita vau e apiti i tera oroa no te mea te turu ra vau i te Faatereraa a te Atua.

 I te mahana i muri iho, tei te ohipa vau i te tauraa manureva. I te atea, ite atura vau i te tahi mau taata e haere mai ra e ta ratou pupuhi. Ua manaˈo vau e haere mai ratou e tapea i te tahi taata o te tamata ra i te horo ê i te fenua. Aita râ, ua haere mai ratou e tapea ia ˈu. Na ô aˈera vau: “Eaha teie!” Mai tera taime, ua taui taue to ˈu oraraa.

 Ua afaihia vau e te mau faehau i roto i te hoê piha i reira vau i te uiuiraahia e rave rahi hora. Ua ani mai ratou: “Na vai e aufau ra i te mau Ite no Iehova? Te turu ra anei oe i te pǔpǔ orure hau no Érythrée? Te rave ra anei oe aore ra to oe papa i te ohipa na te hau Marite?” Noa ˈtu e tupuraa ahoaho teie, ua faaea hau noa vau maoti te tauturu a Iehova.—Philipi 4:6, 7.

 I muri iho, ua faahoro te mau faehau ia ˈu i roto i te hoê fare tei faarirohia ei fare tapearaa e ua tuuhia vau i roto i te hoê piha 28 metera tuea, tei roto aˈena 15 vahine tei tapeahia no ta ratou ohipa poritita.

 I tera po, a tarava noa ˈi au i nia i te tahua tei roto noa ra vau i to ˈu ahu ohipa, ua haapeapea vau no to ˈu na metua e to ˈu mau taeae e tuahine. Ua ite ratou ua tapeahia vau, aita râ ratou i ite teihea roa vau. Ua ani au ia Iehova ia tauturu i to ˈu utuafare ia ite ihea vau i te tapearaahia.

 I to ˈu araraa mai i te poipoi, ua ite au i te tahi tiai ta ˈu i matau. Ua hitimahuta oia i te iteraa mai ia ˈu e na ô maira: “Aster, eaha ta oe ohipa i ǒ nei?” Ua taparu vau ia ˈna ia haere e parau i to ˈu na metua teihea roa vau. I tera iho â mahana, ua afaihia mai te tahi maa e te ahu, na to ˈu na metua i horoa. Na te tiai i parau ia raua teihea roa vau. Ua pahono Iehova i ta ˈu pure! Ua haapapu te reira e tei pihai iho noa o ˈna ia ˈu.

 Aita i faatiahia te Bibilia aore ra te tahi papai e aita atoa to ˈu utuafare e to ˈu mau hoa i nehenehe e haere mai e hiˈo ia ˈu. Noa ˈtu râ, ua horoa mai Iehova i te faaitoitoraa na roto i te mau vahine tei tapeahia. Ua poro vau ia ratou i te mau mahana atoa e ua faahiahia roa ratou i te iteraa i te parau mau no nia i te Faatereraa a te Atua. Pinepine ratou i te parau mai: “Te turu ra matou i te hoê faatereraa taata, area oe, te turu ra ïa i te Faatereraa a te Atua. Eiaha e fati, noa ˈtu e tamata ratou i te haapohe ia oe!”

 I te tahi mau taime, ia uiui te mau tiai i te feia i tapeahia, e tupai atoa ratou. I te tahi mahana, ua tii mai ratou ia ˈu i te hora 11 i te po. I to matou taeraa i roto i te piha uiuiraa, mea rahi ta ratou pariraa. Ua parau ratou e taata patoi au i te faatereraa. I te oreraa vau e farii i te faahiti i te hoê parau faateniteni i te faatereraa, ua tupai na tane e piti ia ˈu. E rave rahi taime to ratou na reiraraa mai. I tera mau taime, ua pure au ia Iehova ma te tuutuu ore e ua taa ia ˈu na ˈna e turu mai ra.

 E toru avaˈe i muri iho, ua haere mai hoê o te mau tiai e parau e nehenehe au e faarue i tera fare tapearaa. Ua maere e ua oaoa roa vau, ua peapea atoa râ, mea au roa hoi na ˈu i ta ˈu pororaa i tera mau vahine i roto i te fare tapearaa.

 Tau avaˈe i muri iho, aita vau i te fare, ua haere mai te mau faehau e haru i te mau tamarii apî atoa o to matou utuafare. Ua tapeahia piti o to ˈu mau tuahine e hoê taeae to ˈu. I reira to ˈu faaotiraa mea maitai aˈe no ˈu ia faarue i tera fenua. Parau mau, mea mauiui ia faarue i to ˈu utuafare. Ua parau mai râ mama ia faaitoito e ia tiaturi ia Iehova. Tapapa ˈtura vau i te hoê manureva no te reva i te fenua Marite. I tera iho â po, ua haere mai te mau faehau i to ˈu fare no te tapea faahou ia ˈu. I to ratou iteraa aita vau i te fare, tapapa ˈtura ratou i te tauraa manureva. Ua reva aˈena râ to ˈu manureva.

 I to ˈu taeraa i Maryland, ua fariihia vau e Haywood e Joan Ward, e mitionare raua i te taime a faatere ai raua i te haapiiraa a to ˈu na metua. Pae avaˈe i muri iho, ua naea ta ˈu fa, ua riro mai au ei pionie. O Cyndi ta raua tamahine to ˈu hoa pionie e mea rahi te mau taime oaoa ta mâua i ite i roto i te taviniraa.

 I te matahiti 1979, ua haere au e mataitai i te Betela, te pu a te mau Ite no Iehova i New York, i reira vau i te farereiraa ia Wesley Parker. Ua tapao vau i to ˈna mau huru maitatai e to ˈna hinaaro ia tavini atu â ia Iehova. I te matahiti 1981, faaipoipo atura mâua e haere atura vau i Wallkill, New York, no te tavini i te Betela na muri ia Wesley. Ua ohipa vau i roto i te Tuhaa o te tamâraa piha, te Tuhaa o te tamâraa ahu mǎrô e i muri aˈe i roto i te pǔpǔ no te MEPS tiaauhia e te Tuhaa haapao i te mau matini roro uira. Ma te tavini i te Betela, ua nehenehe au e horoa i to ˈu taime atoa i roto i te taviniraa a Iehova a haamatau noa ˈi i te mau taeae e tuahine o tei riro mai ei hoa tae roa mai i teie mahana.

 I Etiopia râ, ua faaruru to ˈu utuafare i te hamani-ino-raa uˈana mau e ua haapeapea rahi au no ratou. Tei roto noa â to ˈu na tuahine e hoê taeae to ˈu i te fare tapearaa. b I te mau mahana atoa, e faaineine na mama i te maa a afai atu ai na ratou, aita hoi e faanahoraa i te fare tapearaa no te horoa i te maa.

 Ua haapeapea noa vau no ratou. Ua riro mai râ Iehova ei haapuraa no ˈu e ua horoa atoa mai te utuafare o te Betela i te tamahanahanaraa e te tauturu. (Mareko 10:29, 30) I te tahi mahana, ua na ô mai taeae John Booth: “Te oaoa mau nei matou ua haere mai oe e tavini i te Betela nei. E tapao faaite ïa ua fanaˈo oe i te haamaitairaa a Iehova.” c Ua haapapu mai teie mau parau mahanahana mau ua haamaitai Iehova i ta ˈu faaotiraa e faarue ia Etiopia e e aupuru iho â ïa oia i to ˈu utuafare.

 I Tenuare 1989, faaitehia mai te parau apî ua hapû vau! I te omuaraa, ua maere roa mâua e ua haapeapea atoa. Tau mahana râ i muri iho, ua topa te hau e ua oaoa roa mâua i te reira. Tera râ, ua uiui mâua e riro mai anei mâua ei metua maitai? Ihea matou e ora ˈi e e nafea râ ia faatamaa i to mâua utuafare ia faarue anaˈe mâua i te Betela?

 I te 15 no Eperera 1989, ua tuu mâua i ta mâua mau taihaa atoa i roto i te pereoo e ua tere i Oregon ma te faaoti papu e tamau noa i te horoa i te rahiraa o to mâua taime i roto i te ohipa pororaa no te tavini ei pionie. Tera râ, tau taime i muri aˈe i to mâua taeraa ˈtu, ua parau mai vetahi hoa e ere paha i te mea tano roa i roto i to mâua tupuraa ia riro mai ei pionie. Parau mau, aita rea faufaa ta mâua e fatata hoi mâua i te tamariihia. Aita mâua i taa faahou e nafea râ. I muri iho râ, ua haere mai to matou tiaau ratere o Guy Pierce e ta ˈna vahine o Penny d e faaitoito i ta matou amuiraa. Ua faaitoito mai raua ia tapea i ta mâua fa. Haamata ˈtura mâua i te tavini ei pionie ma te tiaturi e tauturu mai Iehova ia mâua. (Malaki 3:10) Ua tamau mâua i roto i tera taviniraa i muri aˈe i te fanauraahia mai ta mâua tamaiti matahiapo o Lemuel e i muri aˈe atoa i te fanauraahia mai te piti o ta mâua tamaiti o Jadon.

 Mea au roa na mâua ia haamanaˈo i te mau taime i poro ai mâua e ta mâua mau tamaroa i roto i tera taviniraa. Maoti te reira, ua nehenehe mâua e faataa i te Bibilia eiaha noa i te taata no rapae, i ta mâua atoa râ tamarii. (Deuteronomi 11:19) Tera râ, i muri aˈe i te fanauraahia mai te toru o ta mâua tamaiti o Japhet, ua titauhia ia faaea mâua i tera taviniraa no te hoê taime.—Mika 6:8.

 Ua taa roa ia mâua te hopoia faufaa roa ˈˈe a te metua, o te tautururaa ïa i te tamarii ia here e ia tiaturi ia Iehova, o ta mâua ïa i hinaaro no ta mâua mau tamaiti, oia hoi ia faatupu ratou i te hoê auhoaraa piri e o Iehova. No reira, ua tauturu mâua ia ratou ia anaanatae e ia tiai ru i ta matou haamoriraa utuafare. I te tau mea apî roa ˈi ratou, e taio amui matou i te buka Faaroo i te Orometua rahi e Ta ˈu Buka Aamu Bibilia. I te tahi taime, e hauti roa atoa matou i te tahi mau aamu. O vau anaˈe te vahine i te fare, no reira tei nia anaˈe matou i te aamu o Iezebela, o vau iho â ïa te hauti ia Iezebela! Mea au roa na te mau tamaroa ia faahua turai ia ˈu na nia mai i te tofa e a hauti atu ai mai te mea ra o ratou te urî. Taa ê noa ˈtu i ta matou haamoriraa utuafare, e faatere atoa na o Wesley i ta ratou haapiiraa Bibilia, tera tamaiti ta ˈna haapiiraa e tera tamaiti ta ˈna haapiiraa.

 Mea here e mea aupuru roa mâua i ta mâua mau tamaiti e e pure atoa na mâua ia piri noa matou te tahi i te tahi. A paari mai ai ratou, ua haapii atoa mâua ia rave e rave rau ohipa mai te horoiraa i te auˈa, te tamâraa i to ratou piha e te puˈaraa i to ratou ahu. Ua haapii atoa mâua ia ratou e nafea ia tunu i te maa.

 E ere ta mâua anaˈe tamarii tei huti mai i te haapiiraa, o mâua atoa râ. I te tahi taime, ua riri e ua faahiti mâua i te tahi mau parau e ere i te mea maitai. I tera mau taime, e faaite mâua i te haehaa a ani atu ai ia faaore i ta mâua hapa.

 E titau manihini tamau atoa mâua i te mau taeae e tuahine o ta matou amuiraa i te fare. E haere atoa na matou e farerei i te mau taeae e tuahine e ohipa ra i te Betela, i te mau mitionare, i te mau tiaau ratere e na reira atoa tei tavini i te vahi e hinaaro-rahi-hia te feia poro. (Roma 12:13) E manihini anaˈe ta matou i te fare, eita mâua e parau i te mau tamarii ia haere i roto i te tahi atu piha no te hauti. E faaea mai ratou ia matou ra no te faaroo i te mau faatiaraa a apiti atoa ˈi i te mau aparauraa. Pinepine mea haamanaˈo aˈe te mau tamarii i ta matou i paraparau ia mâua Wesley!

 Ua tutava rahi mâua Wesley ia riro te taviniraa ia Iehova ei tuhaa oaoa i roto i to matou oraraa. Ei hiˈoraa, e faaineine atea e e tuu atoa mâua i te moni i te hiti ia nehenehe matou e tere i te fenua e rave rau i te tau faafaaearaa. I te mau tere atoa, e haere matou e mataitai i te pu a te mau Ite no Iehova i tera fenua, e apiti matou i te mau putuputuraa e i te pororaa atoa. Ma te na reira, ua here roa ˈtu â matou i te faanahonahoraa a Iehova na te ao atoa nei e ua piri roa ˈtu â to matou utuafare te tahi i te tahi.

 Ua tapao mâua mea rahi te taata na to matou vahi o te paraparau ra i te reo Paniora, aita râ e poro-tamau-hia nei. No reira, a apî noa ˈi te mau tamaroa, ani atura mâua ia taeae Guy Pierce eaha to ˈna manaˈo mai te peu e haere to matou utuafare i roto i te hoê amuiraa reo Paniora. Ma te mata oaoa mau, na ô mai nei oia: “Mai te peu e taata ravaai oe, e haere oe i te vahi tei reira te iˈa, e ere anei?” Na roto i tera faaitoitoraa, haere atura matou e tavini i roto i te hoê amuiraa reo Paniora i Woodburn i Oregon. Ua oaoa roa matou i te haamata e rave rau haapiiraa Bibilia tei haere i mua e te vai ra atoa vetahi piahi tei bapetizohia e ua ite atoa matou i te hoê pǔpǔ reo Paniora ia riro mai ei amuiraa.

 Taeraa i te hoê taime, ua ere Wesley i ta ˈna ohipa e haere atura matou e ora i Kalifonia no te ohipa apî i noaa mai ia ˈna. E piti matahiti i muri iho, ua rave o vau, o Lemuel e o Jadon i te taviniraa pionie. I te matahiti 2007, ua oaoa roa vau i te apiti i te Haapiiraa no te mau pionie na muri ia raua. Tau taime i muri aˈe, ua tapao matou mea rahi te feia o te paraparau ra i te reo Arabia i roto i ta matou tapura fenua. I muri aˈe 13 matahiti i roto i te hoê amuiraa reo Paniora, faaoti atura to matou utuafare i te turu i te hoê amuiraa reo Arabia. Ua oaoa roa matou i te poro e rave rahi feia e paraparau ra i te reo Arabia o tei horo ê i to ratou fenua e o te ora ra i teie nei na to matou nei vahi. Ua oaoa atoa matou i te haere i te ara no te apiti i te mau pororaa taa ê na roto i tera reo. I teie nei, te tamau ra matou i te tavini ei pionie i roto i te hoê amuiraa reo Arabia i San Diego, Kalifonia.

 E tane faaipoipo maitai roa o Wesley e e upoo utuafare maitai atoa. E faatura rahi to ˈna no te faanahonahoraa a Iehova. Aita roa vau i faaroo aˈenei ia ˈna ia faahiti i te tahi parau e ere i te mea maitai no nia i te Betela aore ra i te mau faanahoraa i roto i te amuiraa. E pure o ˈna na muri ia ˈu e no ˈu atoa. Ia farerei mâua i te tupuraa fifi, e tamahanahana mai ta ˈna mau pure e e tauturu atoa mai ia ˈu ia faaea hau noa.

 Ia feruri au i to mâua oraraa, e rave rahi tumu e oaoa ˈi au. Ua horoa mâua i te rahiraa o to mâua taime i roto i te ohipa pororaa, ua aupuru e ua haapii i ta mâua mau tamarii e ua tavini atoa i roto i te mau amuiraa ua hinaaro-rahi-hia te tauturu. Ua ite mâua e haamaitai Iehova i te feia o te tuu ia ˈna na mua roa e aita mâua i ere noa ˈˈe i te hoê mea. (Salamo 37:25) Aita e feaaraa, ua rave au i te faaotiraa maitai roa ˈˈe, oia hoi e horoa i te taatoaraa o to ˈu oraraa ia Iehova!—Salamo 84:10.