I to ta ˈu vahine Kaye fanauraa mai ta mâua tamahine matahiapo o Lauren, aita vau i ite eaha te titauhia i te hoê metua tane maitai. E i te fanauraahia mai te piti o ta mâua tamarii, o Michael, aita â i taa ˈtura ia ˈu. Inaha hoi ua paari au i roto i te utuafare e tatamaˈi noa to ˈu na metua e i muri iho, taa ˈtura raua. Ua hinaaro iho â vau e riro mai ei upoo utuafare maitai, aita râ vau i ite e nafea.

 Te mea peapea roa ˈtu â, i to ˈu taurearearaa mea inu roa vau i te ava e ua rave atoa vau i te raau taero. A paari mai ai, aita to ˈu oraraa i maitai mai. Ua au roa vau i te ava, te raau taero e te pere moni. Hopea ore au i te rave i te mau faaotiraa tano ore. Ua ino roa to ˈu oraraa, e faarue mai nei Kaye ia ˈu e ua rave o ˈna i ta mâua na tamarii e piti. Ua hepohepo roa vau i tera taime.

 Ua ani au ia Kaye, eaha ta ˈu e rave ia hoˈi faahou mai o ˈna. Inaha, ua haamata o ˈna i te haapii i te Bibilia e o Gloria te hoê Ite no Iehova, teie ïa ta ˈna i ani mai: “Ia haapii oe i te Bibilia.” Aita vau i taa eaha ta ˈna e hinaaro ra e parau e aita roa ˈtu vau i anaanatae i te haapii i te Bibilia, no to ˈu râ hinaaro ia hoˈi mai ta ˈu vahine, farii atura vau i te farerei ia Gloria e ta ˈna tane o Bill.

 I to Bill raua Gloria haereraa mai i te fare, ua maere roa vau i te iteraa e mea piri roa raua. Ua paari ta raua mau tamarii, hoê â matahiti e to ˈu, e e oraraa oaoa to ratou. Haamata ˈtura vau i te feruri, peneiaˈe e nehenehe te Bibilia e tauturu ia matou ia fanaˈo i te hoê utuafare oaoa.

 I taua mahana ra, ua paraparau Bill raua Gloria no nia i to ˈu mau fifi. Ua faaite mai raua i te Galatia 6:7: “Ta te taata hoi e ueue ra, o ta ˈna atoa ïa e ooti.” Feruri atura vau, ‘Ahani au i faaohipa ê na i teie aratairaa Bibilia, eita ïa vau e faaruru i tera rahiraa fifi!’

 I muri aˈe, ia ˈu i faaohipa i te mau faaueraa tumu Bibilia ua maitai mai to ˈu oraraa. Ua faaea mâua Kaye i te puhipuhi i te avaava, e ua haere ia ˈu ia haapae roa i te mau peu tano ore. I 1985, ua fanauhia mai te toru o ta mâua tamarii, o David ïa, te hoê tamaiti here ta mâua i pii noa na Davey. I tera taime, ua ineine maitai au ei metua tane.

 Ua ite mâua Kaye e ia haapii mâua i ta mâua tamarii ia here ia Iehova, e puai atu â to mâua auhoaraa e o ˈna. Mea rahi ta matou i haapii i roto i ta tatou mau papai, mai te buka Faaroo i te Orometua rahi. Hau atu, i roto i ta matou amuiraa, te vai ra te mau utuafare tei riro ei hiˈoraa maitai ratou no matou.

 Ua riro mai te taatoaraa o ta mâua tamarii ei pionie. I te omuaraa o te matahiti 2004, ua haere Lauren i roto i te hoê amuiraa reo Paniora. Ua faaea Michael i ta ˈna taviniraa i te Betela no te faaipoipo i te hoê tuahine o Diana. Te tavini ra raua i te fenua Guam, e hinaaro-rahi-hia te feia poro i ǒ. E ta mâua hopea Davey, i te 19raa o to ˈna matahiti ua haere ïa o ˈna e tavini i Repupirita Dominicaine.

 Ua haapeu roa mâua Kaye a ite ai i te mau faaotiraa ta ratou i rave. Mai tei papaihia i roto i te Ioane 3, 4: “Aita to ˈu e oaoa rahi aˈe i teie, ia faaroo vau e te pee noa ra ta ˈu mau tamarii i te parau mau.” Aita râ mâua i manaˈo aˈenei e taui roa to mâua oraraa no te hoê noa parau apî.

 I te 24 no Eperera 2004, ua haere mâua Kaye e tamaa na muri e piti atu â taeae e ta raua vahine. Inaha ua hau atu 100 kilometera te atea o te fare tamaaraa, ua haere ïa matou e ono na nia i to ˈu pereoo. I muri iho, ua haere matou i te tahi atu fare tamaaraa no te amu i te tahi faraoa monamona. Ua vaiiho vau ia ratou e pae e ua faahoro vau i te pereoo i te vahi tapearaa pereoo. Taˈi mai nei ta ˈu vini. O te hoê ïa hoa tei niuniu mai. Nia noa to ˈna toparaa reo ua taa ia ˈu e ua tupu te tahi ohipa.

 Parau mai nei o ˈna: “Ua tupu te hoê ati. Ua û David i te pereoo.”

 Ani atura vau: “Eaha ïa to ˈna huru? Ua pêpê roa o ˈna?” Ua riaria râ vau i ta ˈna e pahono mai.

 Aita o ˈna i pahono oioi. I muri iho râ, parau mai nei o ˈna e ua pohe o David.

 I te otiraa ta mâua aparauraa, pure ihora vau ia Iehova ia horoa mai i te itoito. Hoˈi atura vau i te fare tamaaraa, e parau ihora vau i ta ˈu vahine e to ˈu mau hoa, te hinaaro ra vau e hoˈi i te fare. Aita vau e maitai ra. Ua tiai au o mâua Kaye anaˈe no te faaite eaha tei tupu no Davey.

 Ua faaoromai noa vau i te roaraa i na 90 minuti tereraa na nia i te pereoo. Ua faaroo noa vau ia Kaye ia faatia i to mâua mau hoa e fatata Davey i te haere mai e farerei ia mâua, e te tiai ru nei o ˈna i tera taime. Aita â o ˈna i ite atura e ua pohe David. I ta ˈu vini, ua tae mai ïa e rave rahi poroi aroha.

 Ia mâua i faahoˈi i te mau hoa, hoˈi atura mâua i te fare. Hiˈo mai nei Kaye ia ˈu e taa ˈtura ia ˈna e ati tei tupu. Ani mai nei o ˈna: “Eˈha tera?” Ua ite au e mauiui roa o ˈna i ta ˈu e parau atu mai ia ˈu i mauiui to ˈu faarooraa teie parau peapea.

 Ua faaruru mâua Kaye e rave rahi fifi na mua ˈˈe, e ua ite mâua e turu noa Iehova i ta ˈna mau tavini. (Isaia 41:10, 13) Mea taa ê râ teie tupuraa. Ua feruri noa vau, ‘No te aha Davey? Mea rahi hoi ta ˈna i rave no te tavini ia Iehova. No te aha aita Iehova i paruru ia ˈna?’

 Ua mauiui rahi atoa o Lauren raua Michael. Mea here roa na Lauren ia Davey, ua riro hoi o ˈna mai te hoê mama no ˈna, no reira o ˈna i oto roa ˈi. No Michael, noa ˈtu ua faarue o ˈna i te fare a pae matahiti i teie nei, ua oaoa roa o ˈna a ite ai e ua paari roa mai Davey e ua riro mai ei taeae feruriraa paari.

 Mai te haamataraa iho â, ua turu rahi mai te amuiraa ia matou. Ei hiˈoraa, noa ˈtu aita Kaye i farii oioi e ua pohe ta mâua tamaiti, ua tamau noa te mau taeae e tuahine o te amuiraa i te haere mai i te fare no te tamahanahana e no te turu ia mâua. (Maseli 17:17) Eita e moˈehia ia ˈu te here ta ratou i faaite mai!

 No te faaoromai tamau i teie ati, ua tamau mâua Kaye i te pure, i te rave i ta mâua haapiiraa Bibilia, e i te apiti i te mau putuputuraa. Parau mau, aita to mâua mauiui rahi i ore. Ua ite râ mâua e ohipa maitatai teie o te tauturu ia mâua ia puai noa i te pae varua.—Philipi 3:16.

 Aita i maoro, ua taui Michael raua Diana i te faaearaa. Haere mai nei raua i roto i te hoê fare piri aˈe i to mâua. No Lauren, ua hoˈi mai ïa o ˈna i roto i ta matou amuiraa reo Beretane. Ua hoê faahou â matou pauroa e ua tauturu mai te reira ia mǎrû rii mai to matou oto rahi. I muri aˈe, ua faaipoipo Lauren ia Justin, te hoê taeae tei riro ei faaitoitoraa faahiahia mau no matou.

 I muri iti noa ˈˈe i te poheraa o Davey, ua titauhia ia mâua Kaye ia rave i te tahi taahiraa faufaa roa e te mauiui atoa. I muri aˈe râ, ua riro te reira ei haamaitairaa na mâua. Na Kaye ïa e faatia mai.

 “I te parauraa mai ta ˈu tane e ua pohe Davey, ua oti roa vau i te mauiui, ua hepohepo roa vau e aita vau i oaoa faahou. No to ˈu mauiui rahi, ua iti roa mai to ˈu itoito, to ˈu puai no te raverave i te ohipa i te fare e te tahi atu mau mea. Hopea ore vau i te taˈi. I te tahi taime, e riri roa vau ia Iehova e te feia e ora noa ra. E au ra e, e aita faahou i haere ia ˈu ia feruri maitai.

 “Ua hinaaro vau e haere i Repupirita Dominicaine, te fenua i reira David i te taviniraa ia Iehova te mau avaˈe hou oia a pohe ai. Tera râ, no to ˈu mauiui rahi ua manaˈo vau e ere paha i te mea tano. Eita paha e maraa ia ˈu ia haere roa i tera fenua.

 “Ua tauturu mai râ te hoê hoa here. Ua parau mai o ˈna e te hepohepo atoa ra te mau hoa o Davey i Repupirita Dominicaine. Te hinaaro ra ratou e farerei ia matou te utuafare o Davey. Ua itoito-roa-hia vau i ta mâua aparauraa, ua nehenehe ïa vau e reva i ǒ.

 “O matou pauroa tei reva ˈtu e ua riro teie tereraa ei haamaitairaa na matou. Ua oaoa roa matou i te faarooraa e ua haapao maitai Davey i ta ˈna taviniraa. Ua parau mai te matahiapo o te amuiraa, e taata Davey o te nehenehe e tiaturihia. Ua tutava noa o ˈna i te rave i tei anihia ia ˈna ia rave.

 “Ia matou i haere i te fare i reira Davey i ora ˈi, ua haere mai te taata o te aroâ e farerei ia matou e ua faatia mai i te mau ohipa maitatai ta Davey i rave no ratou. Ua ite au e taata maitai ta ˈu tamaiti, ua tauturu mai râ teie tere ia ite e ua tutava o ˈna i te pee maite i te hiˈoraa o Iesu.

 “Ua farerei atoa matou i te hoê tane tei haapii i te Bibilia na muri ia Davey. Mea veve roa teie taata. Te ora ra oia i roto i te hoê apaapa fare. E tarava noa o ˈna i nia i to ˈna roˈi, no te mea aita ta ˈna e nehenehe e hahaere. Ua faaite mai râ te mau taeae e tuahine e mea maitai roa Davey e mea faatura roa o ˈna i teie piahi Bibilia. Ua haapeu roa vau i ta ˈu tamaiti.

 “Teie te tere mauiui roa ˈˈe ta ˈu i faaruru aˈenei. Ua oaoa roa râ matou i te farerei i te taata tei matau ia Davey e i te tamahanahana te tahi i te tahi. Maoti te reira, ua mǎrû rii mai to matou hepohepo rahi.”

 I roto i te A ara mai na! o te 8 no Tenuare 2005 (Farani), ua faahitihia te pohe o Davey e ta ˈna taviniraa i Repupirita Dominicaine. I taua taime ra, aita matou i manaˈo e riro to ˈna aamu ei faaitoitoraa na vetahi ê. Ei hiˈoraa, i Me 2019 ua papai mai te taeae Nick e faatia mai nei o ˈna:

 “I te hopea o te matahiti 2004, tei te haapiiraa tuatoru vau e aita ta ˈu e fa pae varua. Aita vau i oaoa. Pure atura vau ia Iehova ma te ani ia tauturu mai o ˈna ia faaohipa maitai au i to ˈu apîraa. Aita i maoro, taio atura vau i te aamu o Davey i roto i te A ara mai na! Ua taa ia ˈu e tera te pahonoraa o ta ˈu pure!

 “Ua faarue au i te haapiiraa e ua rave au i te taviniraa pionie. Ua haamau atoa vau i te fa e haapii i te reo Paniora no te haere e tavini i te vahi e hinaaro-rahi-hia te feia poro. I muri aˈe, ua haere au e poro i Nicaragua e ua apiti mâua ta ˈu vahine i te Haapiiraa no te feia poro evanelia. Ia ani mai te taata na te aha i faaitoito ia ˈu ia tavini ei pionie e faatia ˈtu vau i te aamu o Davey.”

 I 2019, ua reva mâua no te hoê tairururaa nunaa rau i Buenos Aires, i Argentine. O te tuahine Abi ïa tei haapao ia mâua e te tahi mau tia tei tere atu no teie tairururaa nunaa rau. Ua putapû roa mâua i to ˈna here e hamani maitai. Haamanaˈo atura mâua Kaye ia Davey.

 Ia mâua i hoˈi i to mâua piha i te Hotera, hapono ihora vau i te tumu parau o te A ara mai na! no nia ia Davey. Tau minuti i muri mai, pahono mai nei Abi. Farerei ihora matou e toru i raro mai, i te piha fariiraa ratere o te Hotera. Faatia mai nei Abi e na te hiˈoraa o Davey i faaitoito ia ˈna ia rave i te taviniraa pionie i Tetepa 2011. Mai reira mai, ua haere oia e tavini i te hoê fenua moˈemoˈe. Ua parau mai oia: “Ia hepohepo noa ˈtu vau i roto i ta ˈu taviniraa, e taio faahou vau i teie aamu.” Tei ia ˈna ra te hoê tuhaa o te A ara mai na!

 Te haapapu ra teie huru faatiaraa e fetii taeae tatou pauroa. Aita hoê aˈe faanahonahoraa tahoê mai ia tatou te mau Ite no Iehova!

 Mea tamahanahana mau no mâua Kaye ia ite mea nafea te hiˈoraa o Davey i te faaitoitoraa e rave rahi taata. Mea tano atoa teie parau no te taatoaraa o te feia apî o te tavini ra ia Iehova ma te taime taatoa. Aita paha ratou i ite, tera râ, te faaitoito ra to ratou here, itoito e to ratou hiˈoraa ia vetahi ê ia horoa i te mea maitai roa ˈˈe no Iehova.

 I roto i te Luka 20:37, ua faahiti Iesu i ta Iehova mau parau a pii ai ia ˈna “te Atua o Aberahama e te Atua o Isaaka e te Atua o Iakoba.” Aita Iehova e parau ra o ˈna to ratou Atua, a ora noa ˈi ratou. Ua parau râ oia e o ˈna noa iho â to ratou Atua! No te aha? Ua parau Iesu i te irava 38: “Mea ora hoi ratou pauroa no ˈna.”

 Oia mau, no Iehova, te ora noa ra ta ˈna mau tavini taiva ore. E haapapuraa teie e faatia iho â oia ia ratou mai te pohe mai. (Ioba 14:15; Ioa. 5:28, 29) Ua papu ia ˈu e te tiai ru atoa nei Iehova i te faatia mai ia Davey, e te mau tavini atoa tei pohe.

 Noa ˈtu to ˈu hinaaro rahi e farerei faahou i ta ˈu tamaiti, te tiai ru nei au ia farerei raua to ˈna mama. Aita vau i ite aˈenei i te hoê taata tei oto rahi mai ta ˈu vahine. No reira, mea au roa na ˈu te Luka 7:15: “Tia maira taua taata pohe ra, paraparau ihora e tuu atura Iesu ia ˈna i to ˈna metua vahine.”

 I Tetepa 2005, ua rave atoa vau i te taviniraa pionie mai ia Kaye. Auê ïa haamaitairaa rahi ia tavini ei pionie mai ta ˈu vahine, ta ˈu mau tamarii e to raua hoa faaipoipo. Ei utuafare, te turu nei matou te tahi i te tahi e te tiatonu maite ra matou i te tiaturiraa o te ao apî, i reira matou e farerei faahou ai ia Davey iti e.