Ua paari au e te hoê tuahine e te hoê taeae paari aˈe ia ˈu, i pihai iho i te oire o Bicester i Beretane. I reira to ˈu na metua i te tarahuraa i te hoê fare. I te 19raa o to ˈu matahiti, ua rave au i te taviniraa pionie mai to ˈu na taeae e tuahine. I muri iho, ua faatoroahia vau ei pionie taa ê i Écosse. I te matahiti 1970, i te 23raa o to ˈu matahiti, ua titau-manihini-hia vau ia tavini i te Betela i Lonedona. I ǒ, ua “haapii” au i te reo apǎraa rima. Ua taui tera reo i to ˈu oraraa. Auê ïa oraraa faahiahia!

Te haapiiraa i te reo apǎraa rima

 I te Betela, tei roto vau i te amuiraa a te mau Ite no Iehova no Mill Hill. I reira to ˈu farereiraa e rave rahi Ite no Iehova tariˈa turi. Ua hinaaro vau e haapaiuma i te fifi o te reo e e faahoa ˈtu ia ratou. Ua faaoti ïa vau e parahi e te mau taeae e tuahine tariˈa turi i te mau putuputuraa.

 I taua tau ra, aita e amuiraa reo apǎraa rima i Beretane. I apiti na te feia tariˈa turi i te putuputuraa na roto i te reo Beretane, i reira te mau taeae e tuahine e huri ai i te porotarama na roto i te apǎraa rima ma te pee i te tarame e te huru paraparau o te reo Beretane. Noa ˈtu râ, ma te faaoromai, ua haapii noa mai to ˈu mau taeae e tuahine tariˈa turi ia ˈu i te reo apǎraa rima e ua taa ia ˈu e mea taa ê roa ta ratou tarame e te apǎpǎraa o te mau taˈo. Ua riro te reo Beretane ei reo ê no ratou! I to ˈu taaraa i te reira, ua here e ua faatura ˈtu â vau i to ˈu mau hoa tariˈa turi no to ratou taiva ore no te haere mai i te mau putuputuraa. E ua tutava atu â vau i te haamaitai mai i roto i te reo apǎraa rima.

 I Beretane, te reo haamanahia, o te reo apǎraa rima Beretane ïa aore ra BSL. A nuu ai te tau, ua haapii te feia huri i ta matou mau putuputuraa i te faaohipa i te BSL eiaha râ i tei faaohipahia i na mua aˈe. Ei faahopearaa, ua faufaa-mau-hia te feia tariˈa turi i te mau putuputuraa. Ua tahoê atu â ratou i te tahi atu mau taeae e tuahine. I teie mahana, a hiˈo ai i na pae ahuru matahiti tei mairi, ua haamaitai rahi mau Iehova i te tuhaa fenua reo apǎraa rima. E faatia ˈtu vau i te tahi o te mau ohipa faufaa ta ˈu i apiti atu maoti Iehova.

Mea rahi tei apiti mai i te reo apǎraa rima

 I 1973, hoê matahiti i muri iho i te riroraa mai ei matahiapo, ua parau mai te hoê taeae tariˈa turi o Michael Eagers, e nehenehe anei e haamau i te tahi mau putuputuraa na roto i te BSL. Ua farii te amaa, e ua faanaho ïa maua e te tahi atu matahiapo ia haamauhia hoê putuputuraa i te avaˈe i Deptford, i te pae apatoa hitia o te râ o Lonedona.

 Mea maere mau te mau faahopearaa! O te mau Ite no Iehova tariˈa turi no Lonedona e no te tahi atu mau tuhaa o te pae apatoa hitia o te râ no Beretane tei tae mai no te putuputuraa matamua na roto i te BSL. Ua fanaˈo ïa te mau taeae e tuahine e te feia anaanatae tariˈa turi i te haapiiraa pae varua na roto i to ratou iho reo. I muri iho i te porotarama, ua nehenehe ïa matou e tauaparau e e faatupu i te tahi amuamuraa. Ua tia atoa ia ˈu ia horoa i te tahi mau faaitoitoraa.

 I muri aˈe, ua haamau-atoa-hia te mau putuputuraa na roto i te reo apǎraa rima i te mau oire o Birmingham e Sheffield. Mea rahi te taeae e tuahine tei hinaaro e haapii i te reo BSL tei tae mai i te mau putuputuraa. I muri aˈe, mea rahi o ratou tei tauturu i te haamau i te pororaa na roto i te reo apǎraa rima i roto i te tahi atu mau tuhaa o Beretane.

Ua itehia ia ˈu te hoê apiti faahiahia mau

 I 1974, ua farerei au i te hoê tuahine nehenehe mau o Stella Barker te iˈoa, o tei tavini na ei pionie taa ê i roto i te hoê amuiraa i pihai iho i te Betela. No to mâua here rahi, ua faaipoipo mâua i 1976 e ua tavini ei pionie taa ê i Hackney i Lonedona apatoerau. I reira, ua apiti mai Stella ia ˈu no te turu i te tuhaa fenua reo apǎraa rima. A feruri ai i tera tau, ua riro te taviniraa amui ei pionie ei ravea faahiahia no te haamata i to mâua faaipoiporaa.

 Aita i maoro i muri iho, ua anihia mai mâua Stella ia horoa i te rima tauturu i te Betela. Ua î maitai to mâua oraraa! Ua mono atoa vau i te tiaau haaati, ua faatere i te haapiiraa no te mau taeae faatoroahia e i muri aˈe, ua tauturu vau i te faanaho i te huriraa na roto i te reo apǎraa rima i te mau tairururaa e toru mahana. I te tahi taime, ua rohirohi roa mâua no te rahi o te ohipa, tera râ ua oaoa mau mâua i te rave i te reira.—Mataio 11:28-30.

 E piti tamaiti ta mâua, o Simon e o Mark tei fanauhia i 1979 e 1982. Ua oaoa mau mâua i te reira, e hopoia atoa râ. Ua faaoti ïa mâua Stella e ia haere au i te tahi vahi no te amo i ta ˈu mau hopoia i roto i te taviniraa a Iehova, o matou paatoa te haere a faataa atoa ˈi te taime no te faaanaanatae. Ua hinaaro mâua ia ite ta mâua tamaroa e na te taviniraa ia Iehova e faaoaoa ra ia matou! Eaha ïa te faahopearaa? A paari ai ta mâua na tamaroa, ua haapii raua i te apǎ i te rima e ua haamata atoa i te taviniraa pionie. E 40 matahiti muri iho i te fanauˈa puaatoro a to ˈu na metua, ua haamata atoa Simon e Mark i ta raua taviniraa i te Betela. Auê ïa oaoaraa no mâua!

Te tautururaa i te feia tariˈa turi

 I te hopea o te matahiti 1990, aita e matahiapo tariˈa turi i Beretane, te tahi noa mau tavini tauturu. I titauhia i te mau matahiapo tei ore e ite i te reo apǎraa rima ia faaoti e, ua “ite” anei teie mau tavini tauturu “i te haapii” e i te riro mai ei matahiapo. (Timoteo 1, 3:2) Tei roto hoê o teie mau tavini tauturu, te taeae Bernard Austin, i te hoê amuiraa reo Beretane. Ua here mau o ˈna i te mau taeae e tuahine. Ua oaoa roa ïa vau i te faaroo e, ua faatoroahia Bernard ei matahiapo! E o ˈna te matahiapo tariˈa turi matamua i Beretane.

 I 1996, e ohipa faufaa mau tei tupu, oia hoi ua faatia te amaa ia haamauhia te amuiraa apǎraa rima matamua i Beretane. Tei Ealing, i Lonedona tooa o te râ. Ua faatupu te reira i te hoê maraaraa faahiahia mau.

Te mau putuputuraa atoa na roto i te reo apǎraa rima

 I te mau matahiti 1980 e 1990, i ohipa na vau mai te fare atu no te Tuhaa haapao i te taviniraa i te Betela ma te pahono i te mau uiraa no nia i te mau amuiraa e te tuhaa fenua reo apǎraa rima. I te tahi taime, i papai na hoi te mau taeae i te amaa no te ani e nafea ratou e nehenehe ai e tauturu i te feia tariˈa turi ia taa i te mau oreroraa parau horoahia i te mau putuputuraa e te mau tairururaa na roto i te reo Beretane. I te omuaraa, aita te mau putuputuraa rarahi e hurihia na roto i te reo apǎraa rima e aita atoa e papai no te feia tariˈa turi. I faaitoito noa na vau i te mau taeae tariˈa turi e te tahi atu mau taeae ia faaoromai e ia tiai ia Iehova.

 Ua haamaitaihia to matou faaoromai! Aita hoi i maoro, ua faanaho te amaa ia hurihia te mau putuputuraa e te mau tairururaa reo Beretane na roto i te reo apǎraa rima. Hau atu â, ua faanahohia ia parahi te feia tariˈa turi i mua roa, ia ite maitai ratou i te taeae orero e te taeae huri. I tera taime, ua ite maitai te mau taeae e tuahine tariˈa turi e te here mau ra Iehova ia ratou e e mero faufaa mau ratou o to ˈna utuafare.

 I te 1 no Eperera 1995, ua tupu te mahana tairururaa taa ê reo apǎraa rima matamua i te piha tairururaa i Dudley i Midlands tooa o te râ. Ua tauturu vau i te taeae David Merry, tei tavini na hoi ei tiaau haaati ia faanaho, i te tairururaa. Na te atea roa mai te tahi mau Ite no Iehova tariˈa turi i te haereraa mai no te apiti i te porotarama mai Écosse mai i te pae apatoerau e Cornwall i te pae apatoa tooa o te râ. Te haamanaˈo noa ra vau i te oaoa rahi itehia i nia i na hau atu 1 000 taata tei apiti mai i teie tairururaa taa ê mau.

 I 2001, ua ani te amaa i te taeae Merry e ia ˈu ia faanaho i te tairururaa mataeinaa na roto i te reo apǎraa rima no te matahiti i mua. Mea rahi ïa ohipa! Ua haamaitai râ Iehova i te mau tutavaraa a te rima tauturu e rave rahi e ua tupu maitai te tairururaa e eita roa ˈtu te reira e moehia! I muri iho, ua tia ia ˈu ia tiaau i te mau tairururaa reo apǎraa rima e rave rahi matahiti e tae roa i te taime a horoa mai ai Iehova i te mau taeae apî aˈe e te aravihi no te amo i tera hopoia.

Video no te tariˈa turi

 I 1998, ua oaoa mau matou i te matararaa mai te papai matamua na roto i te BSL, oia hoi te ripene video Eaha ta te Atua e titau ra? Ua faatere matou e rave rahi haapiiraa Bibilia ma te faaohipa i te reira.

 I te tairururaa 2002, ua hurihia te mau himene o te Basileia na roto i te BSL no te taime matamua. Ua nehenehe ïa te mau taeae e tuahine tariˈa turi e “himene” i te mau taˈo nehenehe mau a pee ai i te taata huri e a taa atoa ˈi ia ratou i te huru upaupa e apee ra i te himene. Te haamanaˈo noa ra vau i te hoê taeae tariˈa turi o tei taˈi no to ˈna oaoa i te apǎ i te mau himene o te Basileia no te taime matamua!

 E tupuraa taa ê atoa tei itehia i te tairururaa i 2002. Ua titau-manihini-hia te amuiraa reo apǎraa rima Lonedona ia rave i te hoê hohoˈa hautihia. Aita roa ˈtu to matou e aravihi i roto i tera tuhaa! Ua tauturu â Iehova ia matou i tera taime ia ite mai i te mau taeae tei aravihi i te pata e i te faaineine i te mau video. Ua manuïa mau tera ohipa! Mea rahi ta ˈu i haapii mai i tera taime e ua tauturu mai te reira ia ˈu mai 2003 tae atu 2008, ia tiaau i te mau hohoˈa hautihia e ravehia i te Betela no te mau tairururaa BSL o te mau matahiti i mua.

 Ua au mau mâua Stella i te ohipa i te Betela e ta mâua na tamaiti. Noa ˈtu râ, e ere i te ohipa nainai! I muri iho e rave rahi hebedoma, ua rohirohi roa te feia hauti e te pǔpǔ o te haapao ra i te tuhaa video i te pae tino e i te pae feruriraa. Ua hoona râ ta matou mau tutavaraa! Inaha, ua î to matou aau i te oaoa a ite ai to matou mau taeae e tuahine ia taa i te mau faatiaraa Bibilia e ia ite e rave rahi o ratou ia taˈi no to ratou oaoa.

 Mai reira mai, ua horoa noa Iehova i te mau ô pae varua na roto i te mau video. I 2015, ua fanaˈo matou i Te Pare Tiairaa no te haapiiraa matamua na roto i te BSL, i 2019 ua matara mai te buka Bibilia Mataio. I teie nei, te fanaˈo nei matou te taatoaraa o te mau Papai Heleni Kerisetiano e te hurihia ra te mau Papai Hebera. Te mauruuru rahi nei te mau taeae e tuahine tariˈa turi ia Iehova!

 I roto i te nunaa o Iehova, te fanaˈo nei tatou i te hoê fetii taeae o te pee nei i te here o to tatou Metua i te raˈi o te ore e maitiiti i te taata. (Ohipa 10:34, 35) Te faahiahia noa nei au e to ˈu utuafare i te taime, te itoito e te moni ta te faanahonahoraa a Iehova e horoa ra no te tauturu i te mau huru taata atoa tae noa ˈtu te feia tariˈa turi e te feia matapo. a

 Ua hoona mau teie mau tutavaraa atoa i ravehia, mea rahi hoi te amuiraa BSL i Beretane i teie nei. Te oaoa mau nei au e te mauruuru mau nei au i te apitiraa i te maraaraa o te reo apǎraa rima mai to ˈna “haamataraa haihai” mai ïa. (Zekaria 4:10) Oia mau, mauruuru mau ia Iehova atoa o te aratai ra i ta ˈna faanahonahoraa, o te horoa ra i ta ˈna mau tavini te mau ravea no te poro i te parau apî oaoa i te mau huru taata atoa e o te faatupu ra i te mau huero o te parau mau i roto i te aau o te feia aau haehaa.