Te na ô ra o Nicole, te hoê tuahine i Colombie, e 17 matahiti to ˈna: “Mea au roa na ˈu ta ˈu Piha a te Basileia! I tera vahi, e farerei au i to ˈu utuafare pae varua.” Tera atoa anei to oe huru?

 Na te ao nei, te putuputu ra te mau Ite no Iehova i roto 63 000 tiahapa Piha a te Basileia. Ua patuhia te reira ia nehenehe matou e haamori i te Atua i te mau vahi au mau. Te vai nei râ te tahi atu faufaaraa o to teie mau Piha a te Basileia. Ua parau te hoê pionie tamau i Colombie, o David to ˈna iˈoa: “Te faanehenehe roa ˈtu â ra ta tatou mau Piha a te Basileia i ta tatou e haapii nei. Ua maere roa te feia o te haere ra i te Piha a te Basileia i ta tatou e rave nei no te atuatu i te reira.” Papu, te haa rahi nei matou no te tamâ e no te atuatu i ta matou mau Piha a te Basileia. Nafea ïa teie ohipa e ravehia ˈi?

 Na te amuiraa taitahi o te faaohipa nei i te Piha a te Basileia te hopoia e atuatu i te reira. Ia naeahia tera fa, te tamâ tamau ra te mau taeae e tuahine i ta ratou Piha a te Basileia. Te rave atoa ra ratou i te mau faanahoraa no te atuatu i te reira hou a tupu ai te tahi ati e i te tahi mau tataîraa.

 Ua haamauhia te Tuhaa haapao i te paturaa tiaauhia e te amaa o Tahiti (LDC). E faatoroa tera tuhaa i te tahi mau taeae no te tauturu i te mau amuiraa ia atuatu maitai i ta ratou mau Piha a te Basileia. E haapao te taeae tauturu tataitahi e ono tae atu ahuru Piha a te Basileia. E farerei o ˈna i te mau taata poro o tera mau amuiraa no te haapii atu e nafea ia atuatu i ta ratou Piha a te Basileia. Hoê taime i roto e toru matahiti, e hiˈo maite o ˈna i te mau paturaa atoa no te ite te vai ra anei te tahi fifi i te pae o te parururaa aore ra atuaturaa.

 Ua mauruuru roa te mau taeae e tuahine i te faaineineraa ta ratou i fanaˈo. Te na ô ra o Indhumathi, hoê tuahine i Initia: “Mea au roa te faaineineraa. Mea faahiahia roa ia haapii e nafea ia atuatu i ta tatou Piha a te Basileia.” Teie ta Evans, hoê taeae i Kenya, i parau: “Ua haapii matou e nafea ia faaiti i te mau haamâuˈaraa ma te haapao i te mau fifi haihai hou a riro ai ei fifi rahi.”

 I te matahiti taitahi, e titauhia tau ahuru tausani tae atu i te hanere tausani farane no te atuatu i te hoê Piha a te Basileia. Mea taa ê te mau haamâuˈaraa ia au i te vahi o te Piha a te Basileia, ia au i te matahiti i patuhia ˈi te reira e ia au i te rahiraa o te mau amuiraa e faaohipa ra i te reira. Nafea teie mau haamâuˈaraa e aufauhia ˈi?

 E aufauhia te mau haamâuˈaraa i te pae o te atuaturaa maoti te mau ô horoa noa. Teie ta Alexander, hoê taeae i Kazakhstan, i faataa: “E faaohipahia te tahi tuhaa o te mau ô no te aufau i te natirara, i te pape e i te uira. E faaohipahia te tahi atu tuhaa o te mau ô no te aufau i te mau tauera papie, te mau rimarima paruru, te mau taoˈa no te tamâ e te peni.” E faaohipahia te toea o te mau ô no te turu i te ohipa na te ao nei. E nehenehe ïa te mau opuaraa rahi aˈe e moni aˈe i te pae o te atuaturaa na te ao nei e aufauhia.

 E titauhia te moni no te faaohipa e no te atuatu i te hoê Piha a te Basileia i te avaˈe taitahi. Mai te peu râ e titauhia hau atu moni no te rave i te hoê ohipa atuaturaa, hau aˈe i te mau haamâuˈaraa matauhia i e piti aore ra toru avaˈe, e titauhia ïa ia ani i te manaˈo o te taeae o te LDC. Ia farii te LDC i tera opuaraa, e faaohipa-pinepine-hia te mau ô horoa noa no te turu i te ohipa na te ao nei no te aufau i te mau haamâuˈaraa. I te roaraa o te matahiti taviniraa 2023, e 8 793 o tera mau opuaraa tei ravehia. Ua titauhia hau atu i te 800 mirioni farane. A hiˈopoa e piti o teie mau opuaraa.

 I Angola, ua farereihia e rave rahi fifi no te atuatu i te hoê Piha a te Basileia tei patuhia a 15 matahiti i teie nei. Ua titauhia ia faaapî roa i te faanahoraa no te fanaˈo i te uira, ua itehia te mau afafa i nia i te iri pǎpai e ua faaite atoa te mau taata tapiri e ua ô te pape i roto i to ratou fare. Ua haamau ïa te LDC i te opuaraa no te faaafaro i tera mau fifi. Ua titauhia hau atu i te hoê mirioni farane. Ua mauruuru roa te mau taata tapiri e ua maere roa ratou a ite ai nafea te ohipa i ravehia ˈi.

 I Poronia, ua ô mai te pape i roto i te tafare o te hoê Piha a te Basileia e ua ino roa te vauvau tahua. Ua farii te LDC i te opuaraa no te tataî, no te paruru i te tafare e no te taui roa i te vauvau tahua. Ua titauhia hau atu i te hoê mirioni farane. I te mea e ua ravehia tera mau ohipa atuaturaa, aita ïa e faufaa ia faaapî faahou i teie Piha a te Basileia no e rave rahi matahiti.

 Maoti te atuaturaa, e haaputuhia te moni e e faahanahanahia Iehova. Te na ô ra o Shaun, hoê taeae i Tonga: “Maoti ta matou ohipa atuaturaa, e nehenehe matou e haamori ia Iehova i roto i te hoê Piha a te Basileia mâ, nahonaho maitai o te faahanahana ra i te iˈoa o te Atua i rotopu i te feia e ite ra i te Piha. Oaoa roa matou i te titau manihini i te taata i ta matou Piha a te Basileia.”

 E nehenehe tatou pauroa e tauturu no te tamâ e no te atuatu i ta tatou vahi haamoriraa. Te na ô ra o Marino, hoê taeae tauturu i te pae o te atuaturaa i Auteralia: “No tatou pauroa teie fanaˈoraa taa ê e atuatu i ta matou mau Piha a te Basileia. Ia na reira tatou, e haaputuhia te mau ô horoa noa a nehenehe atu ai e faaohipa i te reira i te tahi atu vahi e hinaaro-rahi-hia.”

 Mea au roa na Joel, hoê taeae i Initia, ia atuatu i ta ˈna Piha a te Basileia. Te na ô ra o ˈna: “Ia rave au i te ohipa e to ˈu mau taeae, te feruri nei au i te huru oraraa i roto i te ao apî.” Ua parau o Nicole, tei faahitihia i na mua ˈtu: “Aita i maoro aˈenei, ua taahu vau i te tahua a tapea ˈi te mau taeae i te hoê taheraa pape i roto i te vahi haumitiraa. Noa ˈtu e aita vau i faaafaro i te fifi, ua tauturu vau i te tamǎrô i te tahua hou a tupu ai hoê ati.”

 Mai te peu e hinaaro oe e tauturu ia atuatu i ta oe Piha a te Basileia, a faaite atu i te reira i te mau matahiapo o ta oe amuiraa. Hau atu â, maoti ta oe mau ô horoa noa, e nehenehe ta oe Piha a te Basileia e atuatu-maitai-hia, oia atoa te tahi atu mau Piha a te Basileia na te ao nei. E pûpûhia teie mau ô horoa noa maoti te mau afata ô i ta oe Piha a te Basileia aore ra i nia donate.pr418.com. Te mauruuru rahi nei matou i to oe aau horoa noa.