Te rahi noa ˈtura te maa pae varua tei piahia i nia jw.org ta te mau Ite no Iehova e fanaˈo nei. I te tahi mau fenua râ, mea fifi roa no to tatou mau taeae ia fanaˈo i te natirara, mea moni roa. Te ora ra te tahi atu i te mau fenua eita te natirara e haru maitai, mea taere roa aore ra aita e natirara.

 E rave rahi râ taeae e tuahine o te nehenehe e rave mai i tei piahia i nia i te natirara noa ˈtu e aita e natirara ta ratou! Mea nafea ïa?

 Maoti te JW Box, te hoê ravea nainai ïa. Te haponohia ra te reira i te mau amuiraa i te mau vahi e ere i te mea ohie ia haere i nia i te natirara. I roto i tera JW Box, te vai ra te ofai uira tei hoohia mai i te tahi taiete tapihoo. Te vai atoa ra te porotarama tei faaineinehia e te Tuhaa haapao i te mau matini roro uira, oia atoa te mau papai e te mau video piahia i nia jw.org. E titauhia 75 tara Marite no te aufau i te hoê JW Box.

 I te Piha a te Basileia, e nehenehe te mau taeae e tuahine e faaohipa i tera ravea apî no te rave mai i te mau papai e te mau video i nia i ta ratou mau matini afaifai. Te na reira ra ratou noa ˈtu mea tahito aˈe ta ratou mau matini afaifai aore ra mea mâmâ roa. Mai te peu râ aita e natirara ta te hoê amuiraa, nafea ratou e faaohipa ˈi i te JW Box no te rave mai i te mau papai apî aˈe? E tuu te amaa i tei piahia i nia jw.org i nia i te mau USB e i muri iho, e hapono tamau atu ratou i te reira i te mau amuiraa. E nehenehe ïa te mau taeae e tuahine e rave mai i tei tuuhia i nia i te JW Box. E titauhia 4 tara Marite no te aufau i te hoê USB.

 Nafea te JW Box i tauturu ai i to tatou mau taeae? Te faataa ra te hoê metua tane o Nathan Adruandra to ˈna iˈoa, te ora nei oia i te Repupirita manahune no Congo: “Ua tamata vau e rave rahi taime i te rave mai i te mau hohoˈa hautihia “E Iehova, . . . te tiaturi nei au ia oe” e “A haamanaˈo i te vahine a Lota.” Aita roa ˈtu vau i manuïa, ua taora vau i te tauera. I teie nei râ, te rave mai ra vau i teie mau video i nia i ta ˈu niuniu afaifai e e tauturu mai te reira ia haapii maitai aˈe i ta maua mau tamarii.”

 Ua na ô te hoê taeae o te tauturu nei i te mau amuiraa i Nigéria ia haamau i te JW Box: “No te mau taeae, e ô taa ê roa te JW Box no ǒ mai ia Iehova. Oaoa roa ratou no te mea mea ohie ia rave mai i te mau papai e i te mau video no ǒ mai i te Mauhaa no te taviniraa.”

 Ua haponohia hau atu 1700 JW Box i te mau taeae i Afirika, Patitifa e Marite Apatoa e te opuahia ra ia afaihia te reira i e rave rahi atu â amuiraa. Nohea mai te tino moni no te aufau i te reira? Maoti te mau ô horoa noa tei horoahia no te ohipa na te ao nei, mea rahi tei horoahia maoti donate.pr418.com. Mauruuru roa no te tauturu mai e no to outou huru aau horoa noa.