Te hinaaro nei te Tino aratai i te faaohipa i te mau ô no te paturaa no te tauturu ia tatou i roto i te ohipa pororaa. Ei hiˈoraa, i te roaraa o te matahiti taviniraa 2023, ua haamâuˈa te taatiraa e au i te ture faaohipahia na te mau amaa a te mau Ite no Iehova hau atu 56 miria moni farane no te hoo mai, no te patu, no te tataî e no te atuatu i te mau Piha a te Basileia e te mau Piha tairururaa na te ao. E amuihia i teie mau haamâuˈaraa i ta te mau amuiraa na te ao nei i rave no ta ratou mau Piha a te Basileia.

 Hau atu â, ua faaohipahia te mau ô no te patu e no te atuatu i te mau piha ohipa a te amaa no te tauturu ia faanaho e ia turu i te ohipa pororaa na te ao nei. Ua faaohiehia te ohipa i te mau amaa ia nehenehe te mau ô e faaohipahia no te turu i te ohipa paturaa e te faaapîraa o te mau Piha a te Basileia e te mau Piha tairururaa. E titauhia râ hau atu ravea, no te tataî, faaapî aore ra taui te vahi o te mau piha ohipa a te amaa. No te aha mea faufaa teie mau opuaraa? E nafea te mau amaa e turu ai i te ohipa pororaa? Hiˈo anaˈe i te reira.

 E rave rahi amaa e ua hau atu 30 aore ra 40 matahiti i teie nei! Te faataa ra Nicholas, no te Tuhaa haapao i te paturaa i te pu rahi: “Noa ˈtu ua atuatu-maitai-hia te hoê fare tahua, ia tae râ i te hoê taime e fa mai te tahi mau fifi. No reira, e tauturu te tataîraa ia vai maoro te hoê fare tahua ia faaohipa-noa-hia te reira.”

 Titau-atoa-hia i te mau Betela ia faaau ohie ia tuea te ohipa i te mau tauiraa o te faanahonahoraa. Na te ao nei, mai te paturaahia te mau amaa, ua maraa te numera o te feia poro. No te turu i teie maraaraa, titauhia hau atu rima tauturu o te ohipa ra i teie mau amaa. E ua itehia, te mau piha ohipa tei faaohipahia na, eita e navai faahou no te ohipa e ravehia ra i teie nei!

 Mea faufaa atoa te parururaa. A fatata ˈi tatou i te mau mahana hopea, e roo pinepine tatou i te ati natura. (Luka 21:11) Ma te faaohipa i te mau ravea apî o te paturaa i te roaraa o te hoê tataîraa, e paruru atu â tatou i te feia e ohipa ra i taua mau piha ohipa ra tei tataîhia. E tauturu atoa teie mau piha ohipa i te mau taeae ia faanaho i te tauturu e ia tamau i te turu i te ohipa pororaa i muri aˈe i te hoê ati natura.

 I raro aˈe i te aratairaa a te Tino aratai, ua ravehia te ohipa paturaa i roto 43 amaa i te roaraa o te matahiti taviniraa 2023. Fatata ïa te afaraa o te mau Betela na te ao nei tei fanaˈo i teie opuaraa no te paturaa. A tapao na i te tahi o te mau hiˈoraa o te faaite ra i te faufaaraa o teie ohipa.

 Angola. Te parau ra Matt, hoê mero o te Tomite amaa no Angola: “E fanaˈoraa taa ê ta matou i te iteraa i te parau tohu o te Hagai 2:7 i te ohiparaa i roto i teie tupuraa. I roto noa ahuru matahiti, ua ite matou hoê maraaraa 60 i nia i te hanere o te numera o te feia poro! No te turu ia ratou, ua titauhia ia tataitoru te numera o te utuafare o te Betela. No te mea râ, aita i navai te piha ohipa aita te Betela i nehenehe e titau rahi i te taata no te ohipa i reira. Titauhia ïa i te mau mero o te Betela ia ohipa e ia haa rahi e rave rahi iho â ra hora i ta ratou i matau na.”

 Ua anihia i te mau taeae ia imi i te hoê ravea no te turu i teie maraaraa. I te omuaraa, ua manaˈo ratou mea au aˈe ia tataî-noa-hia i te mau fare tahua a te amaa. I to ratou râ faahohonuraa i te maimiraa, ua taa ia ratou mea au aˈe ia faaohipahia te mau ô no te tahi atu opuaraa i te tataî-noa-raa. Ua manaˈo ïa ratou e hoo mai e e tataî i te hoê fare tahua i pihai iho mai. Te parau ra Matt: “I te faaite-matamua-raahia teie ravea i te Tomite amaa, ua haapeapea matou eita teie fare tahua e tano i ta matou iho paturaa. Ia hiˈohia râ i teie nei, nehenehe e parau ua raea te fa. Ua haamaitai Iehova i teie faaotiraa.”

 E titauhia paha no te amaa no Angola i te tahi atu vahi no a muri aˈe. Maoti râ te paturaa apî e te mau fare o te nehenehe e faatano i muri iho i te Betela e te mau piha tarahuhia i rapae i te Betela, ua nehenehe ïa te Betela e turu noa i te maraaraa i roto i te taviniraa.

 Tapone. Ua patuhia te mau fare tahua matamua a te amaa fatata 40 matahiti i teie nei, e te rahiraa o te reira aita i tataîhia. Ua atuatu-rahi-hia teie mau fare tahua, e noa ˈtu teie mau tutavaraa, mea maoro te faaohipa-noa-raahia teie mau fare tahua. No reira matou e opua ˈi i te hoê tataîraa rahi no teie mau fare tahua.

 I te roaraa matahiti ua taui atoa te oraraa i te Betela. I te omuaraa i 2015, e faaineinehia te maa no te utuafare o te Betela. No reira, e rave rahi piha i te Betela no Tapone tei hamanihia e te vahi “tunuraa maa” nainai. E nehenehe ïa te mau mero o te Betela e faaineine i te rahiraa o ta ratou maa. Maoti te tataîraa, ua tuuhia te vahi tunuraa maa i roto i te mau piha mea ohie ïa no te mau mero o te Betela ia tunu i te maa. Te parau ra Kumiko, te hoê tuahine o te tavini ra i te amaa no Tapone: “Ia tunu vau i te maa e au ra e tei te fare au, e tauturu te reira ia ˈu ia turu atu â i te mau faatanotanoraa apî i te Betela.”

 Mea faufaa te ohipa i te amaa no Tapone, no te turu i te ohipa pororaa na te ao. (Mataio 28:19, 20) O Tapone hoê o na piti amaa o te nenei nei i te Bibilia taatoa. No reira, hoê o te ohipa paturaa o te hamaniraa i te hoê ravea no te tâpûpûraa e te haaputuraa i te pehu no te paruru i te feia e ohipa ra i te vahi neneiraa. Ua haamâuˈahia fatata 112 mirioni moni farane no te hoo mai e hamani i teie ravea, te tamau râ te amaa i te nenei e te hapono i te maa pae varua maoti teie ravea.

 Ua rave-noa-hia te neneiraa o te Bibilia i te roaraa o te paturaa. Te faaite ra Trey, hoê mero o te Tomite amaa no Tapone: “I te roaraa o te paturaa, ua matara mai e rave rahi huriraa Bibilia e ua rahi atoa te aniraa no te Bibilia na te ao nei. E rave rahi tuhaa e taata tei haa amui no te faanaho afea matou e nehenehe ai e tamau i te mau mauhaa apî e ia nehenehe atoa matou e nenei i te mau papai.” Noa ˈtu teie mau fifi, fatata 220 000 Bibilia tei neneihia i te mau avaˈe atoa mai Mati tae atu i Atopa 2023 noa ˈtu tei te vahi neneiraa te rahiraa o te ohipa paturaa. Aita te moni i haamâuˈa-rahi-hia tae roa i te hopea o teie opuaraa.

 Te tahi tuhaa faufaa o teie ohipa tataîraa, o te haaputuraa ïa i te ito. E tamauhia te mau apa itora apî no te haaputu 13 mirioni moni farane no te ito i te mau matahiti atoa. E tataitoruhia te meumeu o te hiˈo ia iti mai te haamâuˈaraa o te ito, e haaputuhia hoê mirioni moni farane i te mau matahiti. Noa ˈtu mea moni teie mau mauhaa haaputuraa ito no teie tataîraa, ua taiohia e haaputuhia 395 mirioni moni farane i nia i te mau apa e hiˈo. E paruru atoa te reira i te natura.

 Te faaite ra na opuaraa e piti a te amaa, mea rahi â te ohipa e hinaarohia no ta tatou mau Betela no te turu i te ohipa pororaa. Aita râ te ohipa i oti. Te parau ra Aaron, no te Tuhaa haapao i te paturaa i te pu rahi: “Ua ravehia te rahiraa, tera râ mea rahi â te ohipa e toe ra.” E nafea teie ohipa e ravehia ˈi? Te parau faahou ra oia: “Hau atu te mau ô horoa noa ma te aau tae, o te tauturu i teie mau opuaraa faufaa, te oaoa atoa ra matou i te feruriraa turu o te feia atoa o tei horoa na i te rima tauturu e i te feia o te taui i to ratou oraraa no te horoa i te rima tauturu i mua nei. E haamaitairaa taa ê mau no ǒ mai ia Iehova ra, te turu i te pae tino e te pae moni a to tatou mau taeae.”—Salamo 110:3.

 Na te mau ô horoa noa e turu i ta tatou ohipa paturaa e tataîraa, e e rave rahi o te horoa nei i tera mau ô i nia donate.pr418.com. Mauruuru roa no ta outou mau ô horoa noa.