“Ua faaoti te Tino aratai e faaitoito i te mau amuiraa ia haamata faahou i te putuputu tino roa i te hebedoma o te 1 no Eperera, mai te peu aita i opanihia e te hau.” Ua oaoa roa te mau Ite no Iehova i to ratou taioraa i tera faaararaa piahia i nia jw.org i Mati 2022. Tera râ, i taua taime ra, aita te maˈi pee COVID-19 i ore. a Eaha te mau faatanoraa, faaineineraa e faanahoraa titauhia no te paruru i te feia e haere i te Piha a te Basileia i tera tirotiro? E piti matahiti te maoro aita te mau putuputuraa i faatupu-tino-hia. E ineine anei tatou no te farii faahou i te taata i te mau Piha a te Basileia?

 Papu maitai no te mea tau avaˈe na mua ˈtu, ua rave te mau taeae i te faanahoraa ia nehenehe te mau putuputuraa ia faatupu-tino-faahou-hia.

 Hoê noa avaˈe i muri aˈe i te faaararaa, aita ta matou mau putuputuraa e faatupu-tino-hia i 2020, ua tauaparau te mau taeae o te Tuhaa haapao i te paturaa tiaauhia e te pu rahi (LDC) i Warwick, i New York. Ua feruri ratou e nafea te maˈi COVID-19 e haafifi ai i ta tatou faaohiparaa i te mau Piha a te Basileia. Oia atoa eaha te titauhia ia rave no te paruru i te feia e putuputu tino mai.

 Pinepine mea ê ta te tahi fenua titauraa i ta te tahi atu. Te faataa ra o Matthew De Sanctis, hoê taeae e ohipa ra i te LDC: “I te tahi mau fenua, e ere i te mea ohie ia noaa mai te hoê ravea no te horoi i te rima. Aita anaˈe e pape i te Piha a te Basileia, e titauhia ia hoo mai i te mohina pape aore ra ia haere e tii i te reira i te hoê anavai aore ra apoo pape. I te tahi atu mau fenua, ua faatano te hau faatere i ta ratou mau titauraa no nia i te ravea faatoetoeraa piha, te ravea haapuvaivairaa e te mau hohoˈa piahia no nia i te ea e te vai-mâ-raa.”

 Eaha ta te mau taeae i rave i mua i tera mau fifi? Te parau ra o Matthew e ua itehia ia ratou “i te mau ravea maitai, ohie ia faaohipa e e ere i te mea moni roa” no e rave rahi Piha a te Basileia. Ei hiˈoraa, i Papouasie-Nouvelle-Guinée, ua noaahia mai te tahi mau farii e ravea faataheraa pape to nia iho. E 20 litera to teie mau farii e ua faaohipahia te reira ei ravea no te horoi i te rima. Ia itehia tera ravea i roto i te taatoaraa o te hoê Piha a te Basileia i te mataeinaa, ua titauhia ia aufau-noa-hia 4 800 moni farane. No te mau Piha a te Basileia i Afirika, ua hoohia mai hau atu i te 6 000 farii horoiraa rima maitai roa i te hoê taiete i Asia.

 Ua ravehia te tahi atu mau faatanoraa no te tuu aore ra taui i te mau ravea faatoetoeraa piha aore ra haapuvaivairaa o te mau Piha a te Basileia. E rave rahi amuiraa tei hoo mai i te auri roroa no te tamau atu i te mau taoˈa haapuairaa reo ia ore te reira ia tapeahia e te feia tei putuputu. Ua ravehia te mau tutavaraa ia horoi tamau i te mau tuhaa tapea-pinepine-hia e te taata mai te mau tapearaa opani e tapearaa faataheraa pape. E nehenehe hoi te reira e haaparare i te tirotiro. I te mau vahi haumitiraa, ua faaohipa te tahi mau amuiraa i te mau matini e tuu-noa-hia te rima i mua e e matara mai te mau papie no te tamǎrô atu i te rima. I Tireni, ua aufauhia 170 000 tiahapa moni farane no te mau faatanoraa ravehia i te Piha a te Basileia taitahi.

 Mea faufaa no te mau taeae ia paruruhia te feia e putuputu mai. Mea faufaa atoa râ no ratou ia faaohipa maitai i te mau ô. Ei hiˈoraa, i te tahi mau fenua, ua faaore te hau faatere i te mau tute i nia i te mau ravea horoiraa rima e auri tapearaa taoˈa haapuairaa reo. Hau atu, ia hoo-rahi-hia mai te tahi taoˈa i te hoê taiete, e iti mai te tino moni o tera taoˈa. No reira, ia iti mai te mau haamâuˈaraa, ua hoo amui mai te tahi mau amaa i te mau taoˈa hinaarohia. Pinepine e hoo mai te mau amaa e te Tuhaa hooraa i te mau taoˈa i te taiete iho â e hamanihia ˈi te reira. E iti mai ïa to ˈna tino moni e te taime haponoraa.

 Maoti te mau faanahoraa ravehia i te Piha a te Basileia, ua paruruhia e ua tamahanahanahia te feia tei tae tino mai i te mau putuputuraa. Ua farii Dulcine, hoê tuahine i Pérou, e ua “riaria rii” o ˈna a ite ai e tupu faahou te mau putuputuraa i te Piha a te Basileia. Te parau ra o ˈna: “Ua roohia vau i te maˈi COVID-19 i to ˈna iho â râ haamataraa. Ua huru ê ïa vau a ite ai e titauhia ia hoˈi i te Piha a te Basileia, e nehenehe hoi au e roo-faahou-hia i tera tirotiro. I to ˈu taeraa râ i te Piha a te Basileia, ua tapao vau e ua rave te mau matahiapo e rave rahi faanahoraa no te paruru ia matou, mai te mau ravea horoiraa rima e te mau auri tapearaa taoˈa haapuairaa reo. Oia atoa te porotarama tamâraa i te Piha hou a tupu ai te putuputuraa taitahi e i muri aˈe. Ua tamǎrû te reira ia ˈu.” b

 E fifi ê ta te tuahine Sara i Zambie i faaruru. Te faataa ra o ˈna: “Tau avaˈe i teie nei, ua pohe ta ˈu tane i te maˈi COVID-19. Ua haapeapea vau no te mea aita vau i ite eaha to ˈu huru a haere ai i te putuputuraa o vau anaˈe no te taime matamua.” Eaha ïa ta ˈna e manaˈo ra i teie nei? Te parau ra o ˈna: “A haere tino ai i te mau putuputuraa, ua ite au e tei pihai iho Iehova ia tatou i teie anotau hopea. I teie nei, ua taa maitai ia ˈu e ua fanaˈo vau i te faaitoitoraa, te here e te tauturu ta ˈu i hinaaro mau no ô mai i te mau matahiapo e to ˈu mau taeae e tuahine.”

 Ua mauruuru roa to tatou mau taeae e tuahine na te ao nei i te putuputu faahou i te mau Piha a te Basileia. Mauruuru maitai no ta outou mau ô. Ua faaohipa te rahiraa o outou i te reni natirara donate.pr418.com. Ua tauturu mai teie mau ô ia riro te mau pu o te haamoriraa viivii ore ei vahi maitai, mâ e te papu no te feia e putuputu mai.