Te upaupa. E ô faahiahia mau te reira no ǒ mai ia Iehova e o te nehenehe e ohipa i nia i to tatou mau manaˈo e to tatou huru. E faaitoito atoa mai te upaupa! Hoê â huru no ta matou mau himene rau. Te mea taa ê râ, e faafatata ˈtu â teie mau himene ia tatou ia Iehova.

 Mai 2014 te matararaa mai te mau himene rau. E nehenehe tatou e faaroo hoê aˈe o tera mau himene na roto hau atu e 500 reo. Teie râ, ‘O vai ma te ohipa nei i nia i teie mau himene? Eaha te ohipa i titauhia?’

 Na te hoê pǔpǔ o te mau Tuhaa haruharuraa e video e haapao i te mau himene rau i raro aˈe i te aratairaa a te Tomite haapiiraa a te Tino aratai. I roto i tera pǔpǔ, 13 taeae e tuahine te tauturu nei no te papai i te himene, no te haapao i te haruharuraa, oia atoa te porotarama e te tahi atu â mau ohipa faufaa. Ua farii atoa te Tomite haapiiraa i te mau rima tauturu ati aˈe te ao no te tauturu ia ratou. Te vai ra te feia papai himene, te feia faataˈi upaupa e te feia himene. Mea haehaa mau teie mau taeae e tuahine, te faaohipa nei hoi ratou i to ratou ite ma te ore e imi i te hanahana.

 A tahi, e faaoti te Tomite haapiiraa i te mau irava e niu ai i te himene e i te huru aau o te taata a faaroo ai i te reira. Te piti, e faaoti te pǔpǔ o te Tuhaa haruharuraa e video na vai e haapao i te upaupa e e papai i te himene. E faatae atu ratou i te tahi haruharuraa i te Tomite haapiiraa o te hiˈopoa i te reira e o te horoa hau atu â aratairaa. I reira ïa te pǔpǔ o te haapao i te upaupa e faatano faahou ai i te himene e te upaupa a haruharu atu ai i te himene hopea hou a hapono ai ati aˈe te ao, i te mau amaa anei aore ra i te mau fare haruharuraa.

 No te papai e te haruharu, e faaohipa to tatou mau taeae i te mau porotarama roro uira rau. Oia atoa i te mau upaupa e te mau mauhaa haruharuraa rau. Ehia moni te taoˈa haapuai reo tataitahi? Mai 10 000 moni farane tae atu i te 100 000 moni farane. I 2020, ua aufau matou hau atu i te 11 600 000 moni farane no te mau mauhaa haruharuraa.

 Aita te mau haamâuˈaraa i rahi, ua faaohipahia hoi te mau rima tauturu i rapaeau mai i te Betela. Aita atoa te feia faataˈi upaupa i faahaerehia mai e i haruharuhia i te Betela. E pinepine to tatou mau taeae i te faaohipa i te hoê porotarama roro uira i reira e faaroohia ˈi te mau taˈi upaupa e rave rau.

 Mea au roa na te mau taeae e tuahine ia faaroo i te mau himene rau. Teie ta Tara, e ora ra i Heremani, e parau ra: “E tauturu teie mau himene ia ˈu ia tamǎrû ia ˈu. A faaroo ai i tera mau himene na roto i to ˈu iho reo, e au ra e te tauahi mai ra Iehova ia ˈu.” Te parau ra te hoê taeae i Kazakhstan, o Dmitry te iˈoa: “Mea au na ˈu ia faaroo i teie mau himene. Aita vau e haapeapea mai te peu te tuati ra te reira i te mau aratairaa Bibilia aore ra aita. Hau atu â, e tauturu mai teie mau himene ia haafaufaa i to ˈu auhoaraa e o Iehova.”

 Teie ta Delia, no Afirika apatoa, e parau ra no nia i te mau himene rau: “Ua tauturu rahi mai te reira ia ˈu i te pae varua. Ia ahoaho vau aore ra i mua i te hoê fifi, te vai ra te hoê himene rau no te tamǎrû ia ˈu. Vetahi taime, navai noa te taˈiraa o te pehe no te taui i to ˈu huru!”

 Te vai ra vetahi himene mea au roa ˈˈe na tatou, e ere anei? Teie ta Lerato no Afirika apatoa e parau ra: “E tauturu mai na himene ‘Tei mua noa ia oe’ e ‘Roto te ao apî’ ia feruri i te taime e ite faahou ai au i to ˈu mama here. I te mau taime atoa e faaroo ai au i tera na himene, e ite au ia ˈna ia horo mai ia ˈu ra.”

 Te vai ra te tahi himene rau tei tauturu i te hoê taurearea i Sri Lanka. Te parau nei teie tamahine: “Ua faahaama mai to ˈu orometua ia ˈu i mua i te tahi atu mau piahi no te mea e Ite no Iehova vau. No to ˈu mǎtaˈu, aita vau i ite faahou nafea ia pahono. I to ˈu hoˈiraa i te fare, faaitoito mai nei to ˈu mama ia faaroo i te himene ‘Haapii ia puai.’ Ua tauturu e ua turai mai teie himene ia rave i te mau maimiraa e ia faaineine i te hoê pahonoraa. I to muri iho mahana, ua paraparau vau i to ˈu orometua. Ua faaroo mai o ˈna ia ˈu e ua parau mai e ua taa maitai aˈe ia ˈna i teie nei i te tiaturiraa a te mau Ite no Iehova. Te haamauruuru nei au i te faanahonahoraa a Iehova no teie mau himene faaitoito mau.”

 Nohea mai te moni no te aufau i te mau haamâuˈaraa titauhia ia matara mai teie mau himene rau? No ǒ mai te moni i te mau ô no te ohipa na te ao atoa nei. Te rahiraa, maoti ïa te mau ravea faataahia i nia ia donate.pr418.com. Mauruuru no ta outou mau ô.