A tahi roa nei i Tiurai e Atete 2020 e mataitai ai te mau taeae e tuahine na te ao atoa nei i te tairururaa e toru mahana i te hoê â area hebedoma. Ia nehenehe râ e na reira, i titauhia na e huri i te tairururaa na roto hau atu e 500 reo. I te tanoraa, e oti tera huru opuaraa i roto hoê matahiti aore ra hau atu. Tera râ, no te maˈi parare coronavirus, e maha noa ïa avaˈe no te huri i te tairururaa e toru mahana no 2020 “A oaoa noa”!

 Ua ravehia teie tapura ohipa rahi i te pu rahi a te mau Ite no Iehova e na Tuhaa huriraa e hooraa. Ua itehia mai i te tuhaa huriraa e e hinaaro te mau pǔpǔ huriraa i te tahi mau mauhaa no te haapao i te reira, te mau taoˈa haruharu reo maitai iho â râ. Na te tuhaa hooraa i hoo mai 1 000 taoˈa haruharu reo a hapono atu ai i te reira i roto e 200 vahi.

 Eiaha te moni ia mâuˈa rahi roa, ua hoo-rahi-hia mai te taoˈa haruharu reo, ua haponohia te reira i te hoê vahi, ua tatuhaahia a haponohia ˈtu ai i te feia huri na te fenua atoa nei. No te mea ua hoo-rahi-hia mai te taoˈa haruharu reo, fatata 18 500 cfp te moni o te hoê o taua mau taoˈa ra e te haponoraa atoa, mea mâmâ aˈe ïa te reira i nia i te faito 20 i nia i te hanere.

 Ua hoo mai e ua hapono atu te Tuhaa hooraa i taua mau taoˈa haruharu reo ra i roto i Eperera e Me 2020, te hoê ïa area avaˈe i taupupu ai te ohipa a te mau ona no te maˈi parare. Tera râ, i te hopea avaˈe Me, ua fanaˈo te rahiraa o te mau pǔpǔ huriraa, Betela e te tahi atu mau vahi huriraa i te mau mauhaa i hinaarohia.

 “Mea afaro maitai te mau ona e te mau tuhaa o te Betela i te hooraahia mai te mau taoˈa haapuai reo,” te parau ra Jay Swinney, te tiaau o te Tuhaa hooraa. “No te varua o Iehova noa i nehenehe ai matou e faaohipa maitai ai e ma te oioi i te mau ô no te tauturu i te mau taeae e tuahine.”

 Te na ô ra Nicholas Ahladis o te rave ra i te ohipa i te Tuhaa huriraa: “Ua itoito-rahi-hia te feia huri tei mau i to ratou vahi i to ratou fanaˈoraa i teie mau mauhaa. Noa ˈtu mea atea te feia huri i te tahi e te tahi, ua nehenehe noa ratou e huri e e haruharu i te mau oreroraa parau, hohoˈa hautihia e himene na roto hau i te 500 reo.”

 Teie hoê o te mau tapura ohipa tei ravehia ia oti mai te tairururaa e toru mahana no 2020 “A oaoa noa”! no te mau taeae e tuahine na te ao atoa nei. Maoti ta outou mau ô horoa noa na roto donate.pr418.com e te tahi atu mau ravea i nehenehe ai e rave i te reira.