Te haapao maitai nei te mau Ite no Iehova i to ratou mau taeae e tuahine. (Pet. 1, 2:17) E nehenehe tatou e taa i te mau huru aau o te tuahine Tannis no Kenya. Te na ô ra oia : “Mea au roa na ˈu ia ite eaha te tupuraa ta to ˈu mau taeae e tuahine e faaruru nei na te ao nei.” Nafea Tannis e e rave rahi mirioni Ite no Iehova e ite ai eaha te parau apî roa no nia i to tatou mau taeae e tuahine? Mai 2013 mai â, e nehenehe tatou e na reira maoti te tuhaa Piaraa parau apî a (Salle de presse na roto i te reo Farani) itehia i nia i ta tatou reni jw.org.

 Maoti te tuhaa Piaraa parau apî e fanaˈo ai tatou i te mau parau faaite papu roa no nia i te mau Ite no Iehova mai te matararaa o te Bibilia na roto i te tahi reo, te tauturu i tei roohia i te ati natura, te mau ohipa paturaa e te tahi atu mau tupuraa faufaa roa. Maoti tera tuhaa e ite atoa ai tatou eaha ta to tatou mau taeae e tuahine tei tapeahia no to ratou faaroo e faaruru nei. Te vai atoa ra te mau faatiaraa faaitoito mau ta to tatou mau taeae e tuahine i ite i te roaraa o te mau opereraa taa ê aore ra i te Oroa haamanaˈoraa. O vai te rave nei i te mau maimiraa no te faaineine i tera mau parau faaite e e nafea te reira ia faaineinehia?

 Na te tuhaa haapao i te mau parau faaite e faaineine i tera tuhaa Piaraa parau apî. Te ohipa nei teie tuhaa i te pu rahi i raro aˈe i te aratairaa a te Tomite tiaau a te Tino aratai. Hau atu i te 100 taeae e tuahine o te ohipa nei i roto i te Tuhaa haapao i te mau parau faaite ei taata papai, ei taata o te rave nei i te mau maimiraa, o te faaineine nei i te mau hohoˈa aore ra ei feia huri. E rave rahi o ratou o te ohipa nei ei rima tauturu o te ore e faaea i te Betela. I roto i ta ratou ohipa, te tauaparau vetahi i te feia mana, te mau orometua haapii e te mau papai vea. Te ohipa amui nei te Tuhaa haapao i te mau parau faaite e hau atu 80 piha haapao i te mau parau faaite a te mau amaa na te ao nei.

 No te faaineine i te hoê parau faaite, te ohipa amui nei te Tuhaa haapao i te mau parau faaite e te piha haapao i te mau parau faaite a te mau amaa na te ao nei. Na mua roa, e hiˈopoa te mau taeae mea tano anei ia faaite i te hoê faatiaraa. E rave ratou i te mau maimiraa, e haaputuputu i te mau haamaramaramaraa papu e e nehenehe atoa ratou e rave i te mau uiuiraa manaˈo aore ra e tauaparau i te mau taata îite. I muri aˈe, e papai ratou i te tumu parau, e hiˈopoa faahou ratou i te reira e e tuu atoa ratou i te mau hohoˈa. I te pae hopea, e haponohia tera tumu parau i te Tomite tiaau ia horoa mai ratou i ta ratou parau faatia.

 Eaha te manaˈo o to tatou mau taeae e tuahine no nia i te tuhaa Piaraa parau apî? Teie ta Cheryl, hoê tuahine no Philipino, i parau: “I te mau poipoi atoa, mea au roa na ˈu ia taio i te mau parau apî no nia i te faanahonahoraa a Iehova e no nia i to ˈna nunaa.”

 No e rave rahi taata taio, mea ê iho â te tuhaa Piaraa parau apî i te tahi atu mau vea. Teie ta Tatiana no Kazakhstan i parau: “Auê au i te mauruuru no te mea e nehenehe vau e tiaturi i te mau parau apî i nia jw.org. Mea papu roa te reira.” Te na ô ra o Alma, te hoê tuahine no Mehiko: “Mea faaitoito mau te mau parau faaite i roto i te tuhaa Piaraa parau apî. Area te mau parau apî a te tahi atu mau vea, e mea peapea mau ïa.”

 E faaitoito mai te tuhaa Piaraa parau apî ia tatou e e haapuai atoa te reira i to tatou faaroo. Teie ta Bernard, no Kenya oia, i parau: “Ua tauturu mai te tuhaa Piaraa parau apî ia ˈu ia taa maitai e e mero o to ˈu utuafare te mau taeae e tuahine na te ao nei noa ˈtu to ratou vahi. E nehenehe au e faahiti i to ratou iˈoa e i ta ratou e faaruru nei i roto i ta ˈu mau pure.” Te na ô ra te tuahine Bybron, no Kenya atoa oia: “Oaoa roa vau a taio ai e ua matara te Bibilia na roto i te hoê reo ê! Te haamanaˈo nei teie mau parau faaite ia ˈu e eita Iehova e maitiiti i te taata.”

 E nehenehe atoa te mau parau apî no nia i to tatou mau taeae e tuahine o te faaruru nei i te hamani-ino-raa e faaitoito ia tatou. Teie ta Jackline no Kenya i parau: “Mea puai aˈe to ˈu faaroo a feruriruri ai au i to ratou itoito e te ravea tei tauturu ia ratou ia faaoromai. Ua haapii au e mea faufaa roa te pure, te taioraa i te Bibilia, oia atoa te mau himene, no te mea ua tauturu te reira i te mau taeae ia vai puai noa.”

 Te faaite nei Beatriz, hoê tuahine no Costa Rica, i to ˈna mauruuru no te mau parau apî no nia i te mau ati natura: “Ua ite au maoti te tuhaa Piaraa parau apî eaha ta ta tatou faanahonahoraa e rave nei no te tauturu oioi i to tatou mau taeae ma te here. E haapapuraa teie e na Iehova iho â e faatere nei i ta ˈna faanahonahoraa.”

 Auê i te oaoa ia fanaˈo i te mau parau apî roa no nia i to tatou mau taeae e tuahine na te ao nei! E na reirahia maoti ta outou mau ô horoahia no te turu i te ohipa pororaa na te ao atoa nei. E rave rahi taeae e tuahine o te horoa nei i tera mau ô i nia donate.pr418.com. Mauruuru roa no ta outou mau ô horoa noa.