I roto i na hanere mirioni taata o te ora nei i Marite Latino, te vai ra tau mirioni taata o te paraparau nei i to ratou iho reo e o te rave nei i ta ratou iho mau peu tumu. I rotopu i teie mau taata tumu, te vai ra to tatou mau taeae e tuahine o te haafaufaa nei i to ratou iho taˈere. No te tauturu i te mau taata ia ite atu â no nia i te Atua, te huri nei ratou e te opere atoa nei ratou i te mau papai a te mau Ite no Iehova na roto hau atu i te 130 reo tumu o te fenua Marite Latino. a Ua faaruru râ vetahi o to tatou mau taeae e tuahine i te patoiraa a te mau fetii no ta ratou faaotiraa e tavini ia Iehova e no te mea aita ratou e apiti i te mau peu tumu a to ratou nunaa o te ore e tuati i ta te Bibilia e parau ra. E nafea ïa ta outou mau ô i faaohipahia ˈi no te tauturu ia ratou?

 I Mehiko, te ora nei to tatou mau taeae e tuahine no te nunaa Huichol i nia i te mau mouˈa no Jalisco. Ma te tura, ua patoi ratou i te apiti i te mau peu faaroo o te ore e tuati ra i ta te Bibilia e haapii ra. b Riri atura te tahi mau taata o te nunaa. I te 4 no Titema 2017, ua rave ino te hoê pǔpǔ taata i te tahi mau Ite no Iehova e i te tahi atu mau taata tei apiti ia ratou ma te tiahi ia ratou i rapaeau i te oire e ma te vavahi i to ratou mau fare. Ua faariaria atoa ˈtu ratou ma te parau e e haapohe ratou i to tatou mau taeae e tuahine ia hoˈi noa ˈtu ratou i to ratou fenua.

 Ua haa oioi te mau Ite no Iehova o te ora nei i roto i te mau oire i pihai iho, no te tauturu i to tatou mau taeae e tuahine. Eaha te rave ia nehenehe ratou e hoˈi atu i to ratou fenua? Teie ta te taeae Agustín i faataa: “Aita i navai te moni no te rave i te hoê paruru. Aita roa ˈtu matou i ite nafea ia fanaˈo i te tauturu i te pae o te ture.”

 I te mea e ua haafifihia te tiamâraa o to tatou mau taeae e tuahine i te pae no te haamoriraa, ua haa oioi te amaa no Marite no Ropu. Na mua roa, ua ani te mau mero o te amaa i te mau taata toroa a te Hau ia rave i te mau titorotororaa no nia i te ohipa ino o tei ravehia. I muri aˈe, ua fanaˈo te amaa no Marite no Ropu i te parau faatia no ǒ mai i te Tomite tiaau o te Tino aratai a te mau Ite no Iehova, no te ohipa e te Tuhaa haapao i te pae o te ture e ia haere i te tiripuna no te paturu i to tatou mau taeae e tuahine no te nunaa Huichol. I te pae hopea, ua tae roa teie hororaa i mua i te Tiripuna teitei roa ˈˈe no Mehiko.

 Ua faaineine te hoê pǔpǔ paruru no e rave rau fenua i te hoê patoiraa papu. Oia hoi, mai te titauhia ra ia vetahi ê ia faatura i te taˈere a te mau nunaa tumu, e titau-atoa-hia i te mau taata no te mau nunaa tumu ia faatura e ia paruru i te tiamâraa o te mau mero atoa o to ratou nunaa. E titauhia i te mau taata atoa ia faatura i te tiaraa o te taata.

 I te 8 no Tiurai 2020, ua manuïa rahi te mau Ite no Iehova i mua i te Tiripuna teitei roa ˈˈe. Ua haamana te tiripuna i te faaotiraa ia hoˈi atu te mau Ite no Iehova i to ratou fenua. Ua faaite o Agustín, tei faahiti-aˈena-hia, i to ˈna mauruuru e i te huru aau o te tahi atu ma te parau: “Ua mauruuru roa e ua oaoa atoa matou no ta te mau taeae i rave no matou. Maoti ta ratou tauturu i nehenehe ai matou e hoˈi faahou i to matou fenua aiˈa.”

 I San Juan de Ilumán, hoê oire no Équateur, te ora nei e rave rahi taata tumu no te peho Otavalo. I rotopu ia ratou, te vai ra to tatou mau taeae tei faaruru i te hoê â hamani-ino-raa e to te mau taeae no te nunaa Huichol. I 2014, i muri aˈe i te roaaraa mai i te hoê parau faatia no te patu, ua haamata to tatou mau taeae i te patu i te hoê Piha a te Basileia. Tera râ, ua turai te hoê tahuˈa i te hoê pǔpǔ taata, ua hau atu ratou i te 100 taata, ia faahepo i to tatou mau taeae ia faaea i te paturaa. I muri iho, ua faahepo te oire i te mau Ite no Iehova ia faaea i te putuputu no te haamori i te Atua.

 Ua tahoê te mau Tuhaa tuatiraa e te ture, o te Amaa no Équateur e o te pu rahi, no te paturu i te amuiraa no te mea ua ofatihia te tiamâraa o to tatou mau taeae i te pae no te haamoriraa. Ua tuu to tatou mau taeae i te hoê hororaa i mua i te tiripuna. Ei faahopearaa, ua faaea taue te oire i te hamani ino i to tatou mau taeae. Ua vaiiho ratou i to tatou mau taeae ia putuputu faahou e ia faaoti i te paturaa i ta ratou Piha a te Basileia. Tera râ, no te paruru atoa i te mau tiaraa o to tatou mau taeae i mua nei, ua ani to tatou mau tia i te mau tiripuna teitei roa ˈˈe, ia rave i te hoê faaotiraa no nia i te hoê uiraa faufaa roa: E titauhia anei i te mau taata no te mau nunaa tumu ia faatura i te tiaraa o te taata na te ao nei?

 I te 16 no Tiurai 2020, ua faarooroo te Tiripuna e au i te pǎpǎ ture no Équateur, o te tiripuna teitei roa ˈˈe ïa o te fenua, i te tupuraa o to tatou mau taeae. Te ohipa nei te tahi mau taeae ei paruru i Équateur e ua riro ratou ei tia o te amuiraa. Hau atu â, ua tia e maha o to tatou mau taeae i mua i te tiripuna, e paruru aravihi ratou no e rave rau fenua. No te mau taotiaraa a te COVID ahuru ma iva, ua faaohipa ratou i te natirara no te tauaparau i mua i te tiripuna. A tahi ra te hoê tiripuna i farii ai i te hoê pǔpǔ paruru o tei tia mai no te mau Ite no Iehova na te ao nei, ia faaohipa i te natirara no te tauaparau. c Ua faahiti teie pǔpǔ paruru i te mau tia mana na te ao nei i te pae o te ture no te haapapu e titauhia i te mau taata tumu ia faatura i te mau tiaraa o te taata.

 Te tiai ru nei to tatou mau taeae no te peho no Otavalo i te faaotiraa a te Tiripuna e au i te pǎpǎ ture. I tera atoa taime, e putapû roa te aau o to tatou mau taeae no te tauturu ta ratou i fanaˈo. Teie ta César i parau, e matahiapo o ˈna i roto i te amuiraa no Ilumán Quichua: “O Iehova anaˈe, maoti ta ˈna faanahonahoraa, o te nehenehe e tauturu mai i te mau nunaa rii.”

 E Ite no Iehova te mau paruru atoa o te paturu nei i to tatou mau taeae. Te oaoa nei ratou i te faaohipa i to ratou aravihi ma te tamoni ore. Ua titauhia râ te taime e te moni no te tuu i teie hororaa i mua i te tiripuna, no te faaineine i te reira e no te tauaparau i mua i te mau haava. Ua titauhia hau atu i te 380 hora i ta tatou mau paruru e i te tahi atu mau taeae no te faaineine i te mau haapapuraa i te pae o te ture, e ua titau-atoa-hia 240 hora no te huri i te mau papai no te tiripuna no Mehiko. Fatata 40 paruru na te ao atoa nei o tei ohipa hau atu i te 100 hora i nia i te tupuraa o to tatou mau taeae i Équateur. Nafea tatou i amo ai i te mau haamâuˈaraa no te tauturu i to tatou mau taeae? Na roto hoi i te mau ô ta outou i horoa maoti te mau ravea rau faahitihia i nia donate.pr418.com. No reira, mauruuru roa no to outou aau horoa noa.