Mea faahiahia roa te tupuraa o te tairururaa e toru mahana i 2020. A tahi ra hoi ta tatou tairururaa i haruharuhia ˈi e i tuuhia ˈi i nia i te reni natirara. Tera râ, i Malawi e i Mozambique, ua fanaˈo te rahiraa o ta tatou mau taeae e tuahine i taua tairururaa ra ma te ore e faaohipa i te reni natirara. Ua nafea ïa ratou?

 Ua faatia te Tomite tiaauraa e te Tomite haapiiraa o te Tino aratai ia haapurorohia te tairururaa na roto i te afata teata e radio i Malawi e i Mozambique. No te aha? I Malawi te fenua mea moni roa ˈˈe te mau haamâuˈaraa no te natirara. Mea iti ïa te mau Ite no Iehova te nehenehe e fanaˈo i te reira. Te faataa ra o William Chumbi, hoê mero o te amaa i Malawi: “Aita ˈtu ravea no te mau taeae e tuahine no te fanaˈo i te maa pae varua, maori râ te radio e te afata teata.” Te parau atoa ra o Luka Sibeko, te tahi atu mero o te amaa i Malawi: “Aita anaˈe te haapurororaa na roto i te afata teata e te radio, mea iti ïa te mau taeae o ta matou tuhaa fenua te nehenehe e fanaˈo i te tairururaa.” I Mozambique atoa, mea moni roa no te mau taeae ia hoo mai i te hoê matini roro uira tano, oia atoa ia fanaˈo i te hoê reni natirara.

 No te maˈi pee COVID-19, ua haapuroro-aˈena-hia ta tatou mau putuputuraa na roto i te afata teata e te radio. a Ua ani to tatou mau taeae ia haapuroro-atoa-hia te tairururaa.

 Te fifi râ i Malawi, ua taotiahia te taime haapurororaa i te hoê noa hora te maoro no te mea e nehenehe te feia mataitai e fiu ia maoro anaˈe te porotarama. Ua faataa râ to tatou mau taeae e te ohipa ra tatou no te tauturu i te taata atoa. I te taime opanipaniraa, maoti ta tatou porotarama, e nehenehe te taata e fanaˈo i te mau parau Bibilia tamahanahana mau o te tauturu ia ratou ia riro ei taata maitai e ia oaoa i roto i te oraraa utuafare. A faaroo ai i te reira, ua farii te mau taiete haapurororaa i ta te mau taeae i ani atu.

 I Malawi, ua haapuroro hoê taiete afata teata e hoê taiete radio i te tairururaa. E mirioni taata tei fanaˈo i te reira i taua fenua ra. I Mozambique, hoê noa ïa taiete afata teata e 85 taiete radio tei haapuroro i te tairururaa.

 I taua na fenua ra, ua aufauhia piri i te toru mirioni moni farane no te haapuroro i te tairururaa na roto i te afata teata e hau atu i te piti mirioni moni farane na roto i te radio. No te haapurororaa na roto i te radio, ua aufauhia hau atu i te 1 500 moni farane i te hoê taiete iti e piri i te 300 000 moni farane i te hoê taiete rarahi e haapuroro nei na taua fenua taatoa ra.

 Ua haa rahi te mau taeae no te faaohipa maitai roa i te mau ô. Ei hiˈoraa, i Malawi, ua nehenehe ratou e faatopa i te moni aufauraa e 30 i nia i te 100. Ua noaa ïa ia ratou fatata 200 000 moni farane ei moni apî. I Mozambique, ua farii te tahi mau taiete haapurororaa ia faatopa i te tarifa no te mea e roo maitai to te mau taeae, inaha e aufau iho â ratou i ta ratou tuhaa.

 Ua mauruuru roa te mau taeae i te faaroo e i te mataitai i te tairururaa haapurorohia. Te parau ra Patrick, hoê matahiapo i Malawi: “Te haamauruuru nei matou i te mau taeae o te Tino aratai no te mau mea atoa ta ratou i rave i te taime maˈi pee.” Te na ô ra Isaac, e ora atoa ra i Malawi: “Ua mauruuru roa matou i te faanahoraa taa ê ta te faanahonahoraa a Iehova i rave ia nehenehe matou e faaroo i te tairururaa na roto i te radio. Tera noa hoi te ravea ia matou ra. Ei faahopearaa, ua nehenehe to ˈu utuafare taatoa e fanaˈo i te tairururaa. E haapapuraa tera faanahoraa o to Iehova here no ta ˈna mau tavini.”

 Te faataa ra te hoê taata poro i Mozambique e i 2020 o ˈna i fanaˈo matamua ˈi i te tairururaa e toru mahana. Te na ô ra o ˈna: “Na roto i te afata teata, ua mataitai au i te tairururaa. Ua haamanaˈo mai tera faanahoraa e o Iehova te Atua Mana hope. Aita te maˈi pee i tapea ia ˈna ia horoa mai i te maa pae varua e ia pûpû roa i te reira i roto i to matou fare. Ua ite papu vau i te here i rotopu i te nunaa o Iehova. No ˈu, tera te haapaoraa mau.”

 Te parau ra Wyson, hoê matahiapo: “Te hinaaro nei au e haamauruuru i te tavini haapao maitai no to ˈna aupururaa ia matou i te tau maˈi pee. Mea veve roa te rahiraa o matou. E te ora nei matou i te fenua veve roa ˈˈe o teie ao. Maoti te haapurororaa na roto i te radio e te afata teata, ua fanaˈo matou i te tairururaa.”

 No te tairururaa e toru mahana 2021, ua farii faahou te Tomite tiaauraa e te Tomite haapiiraa ia haapurorohia te tairururaa na roto i te afata teata e te radio i te tahi mau fenua. Mea nafea te mau haamâuˈaraa i te aufauraahia? Maoti ïa te mau ô horoahia no ta matou ohipa na te ao nei. E rave rau ravea no te horoa i te mau ô, mai te reni natirara donate.pr418.com. Mauruuru roa no ta outou mau ô horoahia ma te aau tae.