Ua parau Iesu i ta ˈna mau pîpî: “E riro outou ei ite no ˈu . . . e tae noa ˈtu i te hopea o te fenua.” (Ohipa 1:8) I teie mahana, te pee nei te mau Ite no Iehova i teie faaueraa ma te itoito rahi. Te vai noa nei râ te mau tuhaa fenua, mai te mau vahi mea rahi te taata, tei ore i fanaˈo i te parau apî oaoa. I roto i te tahi mau fenua, mea iti roa te mau Ite no Iehova. (Mataio 9:37, 38) Eaha ïa ta tatou e rave no te poro i e rave rahi atu â taata?

 No te tauturu i te mau mitionare ia pee i te faaueraa a Iesu, ua tono te tomite o te taviniraa o te Tino aratai a te mau Ite no Iehova, i te mau mitionare i te mau vahi e hinaaro-rahi-hia te feia poro na te ao nei. I teie mahana, e 3 090 mitionare na te ao nei. a Ua fanaˈo te rahiraa o ratou i te hoê faaineineraa i te tahi haapiiraa Bibilia mai te Haapiiraa no te feia poro i te parau apî oaoa o te Basileia. Ua ineine te mau mitionare i te faarue i to ratou mau fare no te haere i te hoê fenua ê. Maoti to ratou huru feruriraa paari, te faaineineraa ta ratou i fanaˈo e te mau mea ta ratou i faaruru, te tauturu nei te mau mitionare taiva ore ia haaparare i te parau apî oaoa e ia faaite i te hiˈoraa maitai no te mau pǐpǐ apî.

 I te mau amaa atoa, te ohipa amui nei te Tuhaa haapao i te taviniraa e te Tomite amaa no te aupuru i te mau mitionare i te pae o te nohoraa, o te ea e na roto atoa i te horoaraa i te tahi tino moni iti no ta ratou mau haamâuˈaraa. I te roaraa o te matahiti taviniraa 2020, ua titauhia 27 mirioni tara Marite no te aupuru i te mau mitionare. Maoti teie mau huru faanahoraa, e nehenehe te mau mitionare e tiatonu noa i nia i te pororaa e i nia atoa i te tautururaa i ta ratou iho amuiraa.

 Eaha te mau haamaitairaa ta te mau mitionare i fanaˈo i roto i te pororaa? Teie ta Franck Madsen i parau, e mero o ˈna o te tomite amaa no Malawi: “Maoti to ratou itoito e to ratou aravihi, ua tauturu te mau mitionare i te mau amuiraa ia faaite i te parau mau i roto i te mau tuhaa fenua e ere i te mea ohie ia poro atu, mai te mau vahi opanihia e te aua, e te mau tuhaa fenua reo ěê. Oia atoa, e hiˈoraa itoito mau to ratou no vetahi no te mea ua rave ratou i te mau tutavaraa rahi no te haapii i te reo e te taˈere o te tuhaa fenua i reira ratou e tavini ai. E faaitoito atoa to ratou hiˈoraa maitai i te feia apî ia rave i te taviniraa pionie ma te taime taatoa. Mauruuru roa Iehova no teie mau mitionare.”

 Ua parau te hoê mero o te Tomite amaa no te tahi atu fenua: “E haapapuraa te hiˈoraa o te mau mitionare e mea tahoê te mau Ite no Iehova na te ao nei. Te ite papu atoa nei te feia e ere i te mau Ite no Iehova e eita te taˈere e rave rau e faaamahamaha ia tatou. Ua tauturu râ te mau faaueraa Bibilia ia tatou ia vai hoê noa.”

 Nafea te mau mitionare e tauturu ai i te feia poro o te amuiraa? Mea au na Paulo, no Timor-Leste oia, te mau mitionare tei tonohia i roto i ta ˈna amuiraa. Ua na ô oia: “Mea veavea roa i roto i ta matou tuhaa fenua. Ua tere mai teie mau mitionare mai te mau fenua toˈetoˈe mai. Noa ˈtu râ, e haere iho â ratou e poro noa ˈtu te veavea. E tae mai iho â ratou i te mau poipoi atoa i te putuputuraa no te pororaa. Te ite pinepine nei au ia ratou ia hoˈi faahou e farerei i te mau taata i te avatea, i te taime ahu roa, oia atoa i te ahiahi. Ua tauturu ratou i te taata e rave rahi, mai ia ˈu, ia ite i te parau mau. Ma te itoito rahi e ma te oaoa, te faaohipa nei ratou i to ratou aho no te tavini ia Iehova. E e turai te reira i te mau mero atoa o te amuiraa ia tavini atu â ia Iehova.

 Te faataa nei o Ketti, e pionie tamau oia i Malawi, e nafea na hoa faaipoipo mitionare i tauturu ai i to ˈna utuafare: “I te tonoraahia mai na hoa faaipoipo mitionare i ta matou amuiraa, o vau anaˈe i roto i te parau mau. Ua tauturu rahi na hoa faaipoipo ia ˈu, e ua riro mai raua ei hoa piri no to ˈu utuafare. Ua tauturu to raua hiˈoraa maitai i taˈu mau tamarii ia ite e e oaoa noa te feia o te tavini nei ia Iehova. Maoti te faaitoitoraa ta teie na hoa faaipoipo mitionare i horoa i ta ˈu mau tamarii, i teie mahana, te tavini nei ta ˈu mau tamahine e toru ei pionie tamau e ua haamata atoa ta ˈu tane i te haere i te mau putuputuraa.”

 E nafea te mau haamâuˈaraa no te aupuru i te mau mitionare e amohia ai? Maoti te mau ô horoa noa tei faaohipahia no te turu i te ohipa na te ao nei. E rave rahi o taua mau ô ra tei horoahia maoti te mau ravea itehia i nia donate.pr418.com. Mauruuru roa no to outou aau horoa noa.