Ua tohu te Bibilia no to tatou nei tau, e itehia te tamaˈi, te aueueraa fenua rahi, te maˈi pee, e ‘te tahi mau mea riaria.’ (Luka 21:10, 11) Te tamau noa nei teie mau parau tohu i te tupu i te roaraa o te matahiti taviniraa 2022. a Ei hiˈoraa, te tupu noa ra te tamaˈi i Ukraine e e mirioni taata te hepohepo noa ra. Na te ao nei, e rave rahi o tei roohia i te maˈi COVID-19 e te maitai mai ra. Hau atu â, mea rahi taata tei hepohepo no te mau ati natura, mai te aueueraa fenua tei tupu i Haïti e te mau mataˈi rorofai i Marite no Ropu, i Philipino, i Afirika apatoa hitia o tera. Mea nafea to te mau Ite no Iehova tautururaa i tei hepohepo?

 I te roaraa o te matahiti taviniraa 2022, ua tauturu ta tatou faanahonahoraa i te mau taata o tei faaruru te tahi o na 200 ati! Ua haamâuˈa tatou 12 mirioni tara Marite no te hopoi atu i te tauturu. E hiˈo anaˈe nafea ta outou mau ô i te faaohiparaahia no te tauturu i te feia tei faaruru e piti ati.

 I te 14 no Atete 2021, ua tupu te aueueraa fenua i Haïti apatoa i te faito puai 7,2. Te mea peapea, e toru Ite no Iehova tei pohe: e piti tuahine e e hoê taeae. E no te rahiraa o te ora mai, ua faaruru i te mau fifi i te pae tino e te pae aau ta te aueueraa fenua i faatupu. Te na ô ra hoê taeae, Stephane: “Na te mau oire atoa e rave rahi taata tei pohe e pauroa te mau hebedoma mea rahi tei hunahia hau atu e piti avaˈe.” Te parau ra o Éliézer: “E rave rahi mau Ite no Iehova aita e fare faahou, e ahu, e tia, e te tahi atu mau mea hinaarohia o te oraraa. Tau avaˈe i te maoro, e rave rahi o tei ora i roto i te mǎtaˈu, pinepine hoi te fenua i te aueue.”

 Oioi noa ta tatou faanahonahoraa i te tauturu. Ua faaineine te amaa no Haïti hau atu 53 tǎne maa, oia atoa te fare ie, te ie, te marû roˈi, te ito mahana no te faaî i te mau niuniu afaifai. Hau atu, i te roaraa o te matahiti taviniraa 2022, ua hamanihia aore ra ua tataîhia hau atu i te 100 fare. No te ati natura, ua faaohipahia hau atu i te hoê mirioni tara Marite.

 Ua mauruuru roa to tatou mau taeae e tuahine. Te parau ra Lorette: “Ua vavahi roa te aueueraa fenua i to matou fare e ta matou mau tauihaa. Aita atoa ta matou e maa. Ua tauturu mai râ te faanahonahoraa a Iehova ia matou ma te horoa mai i te mau mea atoa i hinaarohia.” Te parau ra Micheline: “Ua tuino te aueueraa fenua i te fare i reira ta ˈu na tamaiti e o vau i faaea na. Aita vau i ite eaha te rave maori ra e pure ia tauturuhia mai e ua pahono mai Iehova maoti ta ˈna faanahonahoraa. I teie nei, te fanaˈo nei matou i te hoê fare maitai aˈe. Ua faaoti au e rave i te mau mea atoa no te faaite i to ˈu mauruuru ia Iehova.”

 Ua tapao te feia mana i te mau tutavaraa ta tatou i rave no te tauturu i tei roohia i te ati. Ua parau te hoê tia mana o te fare oire no L’Asile: “Te haapopou atu nei au no to outou vitiviti i te tauturu. Auê i te faahiahia ia ite i to outou faatura rahi i te mau mana faatere! Te oaoa nei au i te iteraa e e ere na te moni e turai ia outou. Na te here râ e turai ia outou. Hinaaro mau outou e tauturu i te taata.”

 I te 24 no Tenuare 2022, ua tairi te mataˈi rorofai Ana i te fenua e i muri iho, ua haere i te tuhaa tooa o te râ o Malawi. Ua topa rahi mai te ûa e mea puai te mataˈi, hau atu 100 kilometera i te hora. Ua topa te mau pou uira, ua parari te mau eˈa turu, e ua ite-atoa-hia te pape pue.

 Fatata 30 000 Ite no Iehova i Malawi e i Mozambique tei fifihia i te mataˈi rorofai. Te na ô ra o Charles, hoê taeae tei tauturu i te feia tei roohia i te ati natura: “I to ˈu iteraa i te mauiui o te mau taeae e te mau mea ta ratou i ere, ua putapû roa to ˈu aau e ua hinaaro vau e tauturu.” Hau atu â, mea iti te maa no te mea ua vavahihia te mau faaapu. Mea rahi tei ere i to ratou fare. Te mea peapea roa, ua paremo te vahine e e piti tamahine a te hoê taeae no te mea ua taahuri to ratou poti.

 E mataˈi rorofai riaria mau. I te hora hoê i te poipoi i Nchalo, Malawi, ua faaroo te utuafare Sengeredo i te maniania puai o te pape. Ua parari e piti tahora pape! Ua faaoti te taeae Sengeredo e faarue ratou i te fare. E faaotiraa paari mau teie no te mea ua haafifi te pape i te fare. Ua parari te tahi o ta ratou mau tauihaa aore ra ua hopoi-ê-hia e te pape. Ua faaoti te utuafare ia haere i te Piha a te Basileia. I te tanoraa, fatata 30 minuti noa i te atea na avae. I tera râ taime, ua titauhia e piti hora. I to ratou taeraa ˈtu, ua rari roa, ua rohirohi roa, ua ora mai râ.

 Ua faaineine oioi te mau amaa no Malawi e no Mozambique i te tauturu no te mau taeae tei roohia i te ati. Ua faaohipahia te mau tiaau haaati e te mau matahiapo no te fafa i te mau hinaaro o te mau taeae i fifihia, ia nehenehe ratou e fanaˈo i te maa pae varua e te faaitoitoraa. Ua anihia te mau Tomite tauturu i tei ati ia faanaho i te ohipa no te tauturu i te mau taeae. Ua haa oioi teie mau tomite ia fanaˈo te mau taeae i te maa e te mau mea atoa i hinaarohia. Hau atu i te 30 000 tara Marite (3 510 000 CFP) i haamâuˈahia no te tauturu i te mau taeae e hau atu i te 300 000 tara Marite (35 100 000 CFP) no te tataî aore ra no te patu faahou i te mau fare.

 Ua faaohipa-maitai-hia te mau ô e te Tomite tauturu. Ua na reira ratou no te mea ua maraa rahi roa te moni o te oraraa. Ei hiˈoraa, i roto noa e ono avaˈe, ua maraa te faito moni o te faraoa ota, maa amu-rahi-hia i Malawi, hau atu 70 i nia i te hanere. Hoê â no te mori arahu. No te faaiti i te mau haamâuˈaraa, ua hoo rahi mai e ua hoo amui te mau taeae i te maa e te mau tauihaa no te patu i te fare no taua vahi ra. Ua iti mai ïa ta ratou i aufau no te mau tauihaa e te utaraa.

 Ua putapû te aau o te mau Ite no Iehova i mua i teie tauturu ta ratou i fanaˈo. Te parau ra o Felisberto, hoê taeae no Mozambique: “Aita vau i ite aˈenei hoê faanahonahoraa mai tera o te horoa rahi nei i te mau materia paturaa, te utaraa, te rave ohipa no te paturaa, te maa e te aratairaa î i te here. E faaiteraa faahiahia mau teie o te here taeae ta Iesu i faahiti i roto te Ioane 13:34, 35.” Te parau ra o Ester, hoê tuahine ivi no Malawi tei ere i to ˈna fare: “Ua hepohepo roa vau. Mea iti roa hoi ta ˈu faufaa no te patu i te tahi atu fare. I to te mau taeae râ haereraa mai e patu i te hoê fare no ˈu, mai te huru ra e tei roto aˈena vau i te paradaiso.”

 A piri mai ai te ao apî fafauhia, e itehia e rave rahi atu â ati natura. (Mataio 24:7, 8) No reira, maoti ta outou mau ô horoa noa, te tiaturi nei matou e e fanaˈo to Iehova nunaa i te tauturu hinaarohia. Ua faataahia te tahi o te mau ravea no te ô horoa noa i nia donate.pr418.com. Te haamauruuru nei matou ia outou no to outou aau horoa noa.