I te avaˈe Mati 2020, ua haapapu te Faanahonahoraa no te ea e maˈi parare te COVID-19. Aita te rahiraa i manaˈo e fifi roa te oraraa i nia i te fenua nei i teie matahiti. Ua mauiui e mirioni taata, oia atoa te tahi o te mau Ite no Iehova, i te pae tino, i te pae aau e moni. Mea nafea te mau Ite no Iehova i te faanahoraa ia ratou no te tauturu i roto i teie taime fifi?

 I raro aˈe i te hiˈopoaraa a te Tomite tiaau o te Tino aratai a te mau Ite no Iehova, ua haamauhia hau atu 950 tomite ohipa tauturu na te ao nei no te faaruru i te COVID-19. I roto i te tahi mau tupuraa, na ratou i tauturu roa ˈtu i te mau amuiraa, e i roto i te tahi atu, ua fanaˈo te mau Ite no Iehova i te tauturu a te faatereraa. Ua tutava atoa te mau tomite ohipa tauturu i te faanaho i tei hinaarohia ia fanaˈo te rahiraa.

 Teie te tahi hiˈoraa i te fenua Paraguay. Te faatia ra te tahi vea, no teie maˈi parare, “mea rahi te taata e ravai ore ra i te maa.” Tera râ, ua haamata aˈena te tomite ohipa tauturu i Paraguay i te opere i te mau afata e te vai ra te maa i roto e te taoˈa no te tamâraa, no te roaraa e piti hebedoma no te mau utuafare e maha taata. E te tino moni o te afata tataitahi e 30 ïa tara Marite (2936 CFP).

 Mea nafea te mau taeae e ohipa ra i roto i te tomite ohipa tauturu e paruru ai ia ratou e ia vetahi ê i te COVID-19? E paruru vaha to ratou e e faaateatea te tahi i te tahi. Ia faaineine anaˈe te mau taiete hoo i te afata maa, e hiˈopoa maite te mau taeae ua ravehia anei i te vahi mâ maitai. E tia atoa i te feia e tie mai i te mau afata ia paruru ia ratou, ia tamâ maitai i to ratou pereoo e ia vaiiho i te mau afata i te vahi mâ maitai. E haapao maitai te feia e hopoi mai te mau afata i te mau taeae ra i te faaateatea-raa.

 I Tenuare 2021, ua faaoti te Tomite tiaau e hapono hau atu 25 mirioni tara Marite (fatata 2 500 000 000 CFP) no te faaruru i te COVID-19. Ua faaohipa maitai te mau amaa e te mau tomite ohipa tauturu i tera tino moni e ua imi maite i te faito moni mama aˈe no te hoo mai i tei hinaarohia. I te fenua Tireni, ua imi te mau taeae i te mau ravea atoa no te hoo mai 750 kilo pǐpǐ. Tera râ, ua tatai piti te moni hoo o te pǐpǐ i roto noa i te hoê area hoê avaˈe. Piti hora i muri iho te faaauraa e hoo mai i te pǐpǐ i te hoê faito moni teitei, ua faaara te taata hoo i te mau taeae e no faahoˈi noa mai ra te hoê taata i te pǐpǐ ta ˈna i hoo mai. Aita ˈtura te mau taeae i rave mai te pǐpǐ i nia i te faito moni i faaauhia na mua ˈtu. Inaha, ua faatopa mai te taata hoo i te moni o te pǐpǐ i faahoˈihia mai i nia i te faito moni na mua ˈtu tera avaˈe.

 Tera râ, i to te mau taeae haereraa e tii i te pǐpǐ, ua tamata te taata hoo i te taui i te faaauraa ma te pari i te mau taeae eita e tano ta ratou opereraa i te maa mai ta te tahi pae i rave. Pure oioi atura hoê o to tatou mau taeae e parau atura i te taata hoo ua faaau-aˈena-hia e te mau amuiraa o vai mau na tei roto i te fifi. Ua faataa atoa te mau taeae, no te taa-ê-raa o te peu tumu o te feia e hinaaro i te tauturu, e titauhia ïa ia horoa i te mea hinaarohia tano maitai no te mau utuafare tataitahi. E i muri iho, haapapu atura te mau taeae i te taata hoo te mau ô atoa a te mau Ite no Iehova mea horoa noa.Ua putapû roa o ˈna. Aita noa te taata hoo i faatopa te tino moni, ua tahinu atoa râ 400 kilo pǐpǐ.

 Te ora ra Lusu, te hoê vahine ivi paari no Libéria, e ta ˈna na e pae fetii. I te hoê poipoi, te taofe ra ratou e te taio ra i te irava mahana, ua faaara ta Lusu mootua e hitu matahiti, aita e maa e toe faahou ra i te fare e ani atura: “Eaha ta tatou e amu?” Ua parau Lusu ia ˈna ua pure aˈena o ˈna no te tauturu e e tiaturi rahi to ˈna ia Iehova no te pahono i ta ˈna aniraa. I tera iho â avatea, niuniu mai nei te mau matahiapo o te amuiraa a Lusu ia here mai e tii te tahi maa na ratou. Teie atura ta ˈna i parau: “Ua papu atura i ta ˈu mootua e faaroo e e pahono Iehova i te mau pure no te mea ua pahono oia i ta ˈu pure.”

 Te ora ra te tahi vahine i te Repupirita manahune no Congo i pihai iho noa i te hoê utuafare Ite no Iehova. Ia ˈna i ite ua operehia mai ta ratou maa na te mau taeae, teie ta ˈna i parau: “Ia oti teie maˈi pee, e riro mai matou ei Ite no Iehova no te mea, ua aupuru to ratou mau taeae e tuahine ia ratou i teie tau fifi mau!“ Parau atura ta ˈna tane: “E riro mau oe ei Ite no Iehova no tera noa hoê pute raiti?” Pahono atura o ˈna: “Aita! E tapao râ teie pute raiti o te here mau!”

 Ua tauturu oioi te mau Ite no Iehova i te mau taeae e tuahine i te roaraa o teie maˈi pee maoti ta outou mau ô horoa noa. Mauruuru maitai no ta outou mau ô horoa noa maoti te mau ravea i nia donate.pr418.com.