I te mau matahiti atoa, e titau-manihini-hia te mau tavini taa ê atoa na te ao nei i te haapiiraa Bibilia no Gileada i te pu haapiiraa no Patterson i New-York. a I roto i teie nei haapiiraa, e haapiihia te mau piahi ia aravihi atu â i roto i ta ratou mau vahi ohiparaa i roto i te faanahonahoraa a Iehova. E tauturu te reira ia ratou ia haapuai e ia turu i te naho-maitai-raa o te mau amuiraa e te mau amaa na te ao atoa nei.

 Te Haapiiraa no Gileada, e haapiiraa te reira no te mau taeae e tuahine o te mau fenua atoa. Ei hiˈoraa, i roto i te 147raa o te haapiiraa o tei tupu i te matahiti 2019, ua tahoê mai 56 piahi no 29 fenua. Te mau piahi o tei ô mai i roto i te Haapiiraa no Gileada, ua rave aˈena ratou i te taviniraa taime taatoa ei mero o te Betela, ei tiaau haaati, ei mitionare, aore ra ei pionie taa ê.

 E titauhia te hoê faaineineraa rahi hou te haamataraa o te haapiiraa. Ei hiˈoraa, e hoo mai te tuhaa haapao i te mau tere i te pu rahi i te mau titeti manureva no teie mau taeae e tuahine o tei haere i taua haapiiraa ra. No te 147raa o te Piha haapiiraa no Gileada, ua titauhia 1 075 tara Marite (105 833 F CFP) no te piahi taitahi o te mau fenua ěê no te haere i Patterson e no te hoˈi mai. Ua titauhia i te mau piahi no te fenua Solomona ia tere e maha taime no te haere atu i Patterson e e toru taime no te hoˈi mai. Oia hoi, hau atu 35 400 kilometera. Ua titauhia 2 300 tara Marite (226 435 F CFP) no te piahi taitahi. No te fanaˈo i te mau titeti mâmâ roa aˈe, e faaohipa te tuhaa haapao i te mau tere i te pu rahi i te hoê porotarama roro uira. E noa ˈtu e ua oti te titeti i te tapaohia, e maimi noa te porotarama roro uira i te tarifa mâmâ aˈe, tau hebedoma aore ra avaˈe. E faaohipa atoa te tuhaa haapao i te mau tere i te pu rahi i te mau moni tahinu a te mau manureva no te rave mai i te mau titeti.

 E titauhia i te piahi e rave rahi i te parau faatia no te tapae atu i te Hau Amui no Marite. No reira, e tauturu te Tuhaa tuatiraa e te ture ia ratou ia noaa mai taua mau parau faatia ra. E titauhia i te piahi taitahi 510 tara Marite (50 209 F CFP) no te aufau i te mau tute e taua mau parau faatia ra.

 Nafea tatou e faufaahia ˈi i te faaineineraa a teie mau piahi? E matahiapo o Hendra Gunawan i te pae apatoa hitia o te râ o te fenua Asia. I roto i ta ˈna amuiraa, te vai ra na hoa faaipoipo mai Gileada mai. Teie ta ˈna e parau nei: “Na mua aˈe, aita e pionie tamau i roto i teie nei amuiraa. I muri aˈe râ i te taeraa mai o teie nau piahi, ua faaitoito to raua huru feruriraa maitai e to raua itoito rahi i te tahi atu mau taeae e tuahine o te amuiraa, e ua faaoti o ratou e riro ei pionie tamau. Ua haere atoa te hoê tuahine o ta matou nei amuiraa i te Haapiiraa no te feia poro i te parau apî oaoa o te Basileia.”

 Te ohipa ra o Sergio Panjaitan i te Betela i te pae apatoa hitia o te râ o te fenua Asia e te mau taeae e tuahine o tei haere i te Haapiiraa no Gileada. Te parau nei o ˈna: “Ua riro te faaineineraa o tei horoahia ia ratou ei haamaitairaa, eiaha noa no ratou iho, no matou atoa râ. Mea rahi te mau mea o ta ratou i haapii! Aita râ ratou i faateitei ia ratou. Ua opere o ratou i ta ratou i haapii. Ua riro te reira ei faaitoitoraa rahi i te pae varua.”

 Nafea te mau haamâuˈaraa o teie nei haapiiraa i te amo-raa-hia? Maoti te mau ô horoa noa e faaohipahia ˈi no te ohipa na te ao nei. E rave rahi o taua mau ô ra o tei horoahia maoti te ravea donate.pr418.com. Ia haamauruuruhia outou no ta outou mau ô horoa noa o te turu nei i teie nei haapiiraa o te farii nei i te mau piahi na te ao atoa nei.