I Tenuare 2021, ua faaara te Tino aratai e ua matara mai te hoê buka haapiiraa apî: Ia ora oe e a muri noa ˈtu! a Eaha to oe huru a faaroo ai i te reira? Te parau ra Matthew, no Kanada mai: “Oaoa roa vau! E rahi atu â to ˈu oaoa a faaroo ai i te mau oreroraa parau e a mataitai ai i te mau video o tei faataa i te tumu i matara mai ai tera papai e mea nafea te reira i te tamataraahia. Tiai ru nei au i te ite i te reira e i te faaohipa atoa.”

 No te aha mea taa ê ai teie buka apî? A tahi, mea taa ê ta tatou huru haapiiraa a faaohipa ˈi i te buka Ia ora oe e a muri noa ˈtu! Te piti, mea taa ê atoa te papie. E hiˈo anaˈe ïa mea nafea teie buka i te hamaniraahia.

 Papie meumeu aˈe. No te aha mea faufaa? Ua hau atu i te 600 hohoˈa e te ǔ rau i roto i te buka Ia ora oe e a muri noa ˈtu! Mea rahi roa ˈtu ïa ia faaauhia i te buka Haapii mai. Mea rahi atoa te vahi aita e papai aore ra aita e hohoˈa. Ua riro te reira ei fifi no te mea mea rairai anaˈe te papie e itehia ïa te hohoˈa o to muri mai api. No reira te mau taeae o te Tuhaa o te neneiraa na te ao nei i tamata ai e maha huru papie o te faaohipa-pinepine-hia i roto i ta tatou mau fare neneiraa. Ua hiˈopoa te Tomite papairaa o te Tino aratai i te mau papie e ua maiti ratou i te papie meumeu aˈe. Mea moni aˈe te reira i te mau papie ta tatou i faaohipa na no te tahi atu mau papai. Tera râ, te mea maitai, oia hoi e haapao noa te piahi Bibilia i te api ta ˈna e taio ra i te mea hoi aita o ˈna e ite i te mau hohoˈa i muri i tera api.

 Mea taa ê te paruru o te api hopea e te api matamua. No te aha? No te mea ua tuuhia te hoê paruru taa ê ia ore te api ia ino hanoa e ia ite-maitai-hia te hohoˈa o te api matamua. Teie râ, mea moni aˈe teie paruru i tera i faaohipahia na. No reira te amaa e rave rahi i ohipa amui ai no te faatopa mai i te tino moni o teie paruru.

 No te aha i maitihia ai te papie e te paruru moni aˈe? Te faataa ra te hoê taeae o te ohipa ra i roto i te Tuhaa o te neneiraa na te ao nei: “E faaohipa-pinepine-hia tera papai, ua hinaaro ïa matou ia maitai noa te huru rapaeau o tera buka noa ˈtu te tau e te faaohiparaa.” Te parau ra Eduardo, o te ohipa ra i roto i te Piha neneiraa i te amaa no Beresilia: “Oaoa roa matou i te iteraa mea nafea te faanahonahoraa a Iehova i te faaohiparaa ma te paari i te mau ô ia fanaˈo tatou i te hoê buka nehenehe, te au ia faaohipa e o te vai maoro.”

 Ua haamata matou i te nenei i te buka Ia ora oe e a muri noa tu! i Mati 2021. I te mea e tei roto i te tau o te COVID-19, mea rahi te fifi i itehia. Ua opanipani-atoa-hia te Betela. Aita ïa i nehenehe e tiaturi faahou i nia i te tauturu a te mau taeae e tuahine no rapaeau mai i te Betela aore ra a te mau taeae apî o te haere mai e tavini i te Betela. Te auraa ïa e aita i navai faahou te taata no te ohipa i roto i te tahi mau vahi neneiraa. Area vetahi mau vahi neneiraa, ua opanihia ïa no te hoê taime no te pee i te mau faatureraa a te hau faatere.

 Ua nafea ïa matou? I te tahi mau vahi, ua tauihia te tuhaa ohipa a te tahi mau taeae e tuahine no te tuu ia ratou i roto i te Tuhaa o te neneiraa. Te parau ra Joel o te ohipa ra e te Tuhaa o te neneiraa na te ao nei: “Mea faufaa roa to ratou huru feruriraa haapae e to ratou hinaaro e haapii i te ohipa apî. Ua haere ïa te ohipa i mua.”

 Noa ˈtu teie mau fifi, ua nenei-aˈena-hia e mirioni buka Ia ora oe e a muri noa ˈtu! No te hamani i te reira, i titauhia na ia hoo mai e rave rahi ohipa mai te papie, te inita, te paruru e te vai ra ˈtu â. I na avaˈe matamua e pae, teie te tino moni o te mau haamâuˈaraa no te hoo mai i te reira: Hau atu i te 230 000 000 moni farane. Ua ara ïa te mau taeae ia nenei-noa-hia i te rahiraa buka ta te mau amuiraa i hinaaro.

 Eaha te manaˈo o te feia poro e ta ratou piahi Bibilia no nia i teie buka haapiiraa apî? Te parau ra Paul, te hoê taeae no Auteralia: “Mea au mau te buka Ia ora oe e a muri noa ˈtu! E te tiai ru nei au i te faatere i te mau haapiiraa Bibilia. Hope te au tera buka i te mea hoi e e itehia i roto te mau haamaramaramaraa papu, te mau uiraa o te haaputapû i te aau, te mau video, te mau hohoˈa, te mau tapura, te mau fa no te piahi. E buka nehenehe mau te reira o te turai ia ˈu ia haamaitai mai i ta ˈu huru haapiiraa.”

 Te parau ra te hoê piahi Bibilia i Marite: “Mea au roa na ˈu teie buka apî. E tauturu mai te mau hohoˈa ia taa maitai i te mau manaˈo faufaa. E haaputapû te mau video i to ˈu aau e e turai mai ia ohipa.” Te haapii nei teie piahi e piti taime i te hebedoma e te apiti tamau nei i te mau putuputuraa a te amuiraa.

 E mirioni ïa buka Ia ora oe e a muri noa ˈtu! te titauhia ia neneihia na roto e rave rahi reo. I teie mahana, ua farii te Tino aratai ia piahia teie buka na roto e 710 reo. Ia faaauhia i te rahiraa reo i fariihia no te buka Haapii mai, ua hau atu ïa i te 340 reo.

 Nafea e aufauhia ˈi teie mau haamâuˈaraa atoa? Maoti te mau ô na te ao atoa nei ta e rave rahi e rave ra i nia ia donate.pr418.com. Te mauruuru mau nei matou no to outou aau horoa noa o te tauturu mai ia nenei i te mau buka haapiiraa no te feia o te hinaaro e ite atu â no nia ia Iehova e o te hinaaro e ora e a muri noa ˈtu.—Salamo 22:26.