I te matahiti atoa, e raeahia hanere tausani taata o te bapetizohia. No reira, e hinaaro-rahi-hia te mau paturaa apî. No te turu i taua maraaraa ra, ua faanaho te tuhaa o te paturaa LDC na te ao atoa nei, e patu aore ra e faaapî atoa hau atu 2 700 vahi haamoriraa i roto i te matahiti taviniraa 2020. a

 Teie nei râ, ua haafifi teie nei maˈi pee Covid ahuru ma iva i teie nei mau opuaraa. No te paruru i to tatou mau taeae e tuahine, no te auraro atoa i te mau faatureraa a te Hau, ua faataime rii te Tomite piaraa o te Tino aratai i te rahiraa o te mau opuaraa o te paturaa a te faanahonahoraa a Iehova na te ao nei. Noa ˈtu râ te faataimeraa, i roto i te matahiti taviniraa 2020, hau atu i te 1 700 vahi haamoriraa o tei patuhia e o tei faaapîhia hou noa mai te maˈi pee. E ua tae hau atu hanere opuaraa faufaa roa a te amaa i te hopea. A tapao na eaha ta to tatou mau taeae i fanaˈo maoti te otiraa o na piti opuaraa.

 Te amaa no Cameroun. Ua pirihao roa te amaa tahito i Douala, e ua titauhia ia faarahi. Manaˈo atura te Tomite piaraa ia faaapî i te amaa. Teie râ, ua hau aˈe te mau haamâuˈaraa no te faaapî i te faufaaraa o te fenua. Ua feruri atoa ratou ia patu i nia i te hoê fenua apî, aore ra ia hoo mai e ia faaapî i te mau fare patu-aˈena-hia. Aita râ te reira mau opuaraa i manuïa.

 I taua taime ra, faarooroo aˈera te mau taeae e ua opua te mau tia faatere i te hamani i te hoê purumu i te pae apatoerau o Douala, i pihai iho noa mai i te hoê o ta tatou mau Piha tairururaa. E faaohie teie purumu i te afairaa i te mau tauihaa i taua nei vahi ra. Tera iho â ta te amaa i hinaaro. I nia i te fenua tatuhaahia o te vahi tairururaa, ua farii te Tino aratai ia patuhia teie amaa apî.

 Ua ohipa amui te mau Ite e te mau rave ohipa o te tihepuhia. E maoti taua huru raveraa ra, ua iti mai te taime e te mau haamâuˈaraa. Ia faaauhia i te omuaraa, ua tae roa te opuaraa i to ˈna hopea e ua haaputuhia hau atu piti mirioni tara Marite no teie ohipa. Ua nehenehe atura te utuafare o te Betela e tomo atu i roto i te mau paturaa apî hou noa ˈˈe te parareraa o te Covid ahuru ma iva.

 Ua fanaˈo te mau mero o te Betela no Cameroun i te hoê oraraa e te hoê huru raveraa ohipa maitai aˈe. E no ratou, ua riro teie amaa apî mai te hoê ô no ǒ mai ia Iehova ra. Teie ta te hoê tane e ta ˈna vahine faaipoipo i parau: “Hinaaro atura maua e ohipa atu â no te haafaufaa i teie ô ta Iehova i horoa mai.”

 Piha ohipa huriraa atea i te amaa (POH) reo Tojolabal i Mehiko. E rave rahi matahiti to te pǔpǔ huriraa Tojolabal ohipa-noa-raa i te amaa no Marite no ropu i pihai iho noa mai i te oire no Mehiko. I Altamirano e i Las Margaritas e faaohipa-pinepine-hia ˈi te reo Tojolabal. Fatata râ tausani kilometera i te atea i te amaa. No reira, mea fifi no te mau taata huri ia horoa i te hoê huriraa tano no te mea aita ratou i ora i roto i teie nau oire e paraparauhia ˈi te reo Tojolabal. Ua tutava te amaa i te imi i te mau taeae e tuahine aravihi tei ora i pihai iho noa mai i taua mau vahi ra no te tauturu i te tuhaa huriraa e haruharuraa o te reo Tojolabal.

 No tera mau tumu, ua hinaaro te Tomite papairaa o te Tino aratai e afai i te pupu huriraa reo Tojolabal i taua mau oire ra. No te na reira, ua faaoti te amaa e hoo e e faaapî i te hoê fare rahi. Mea mâmâ aˈe ïa te reira i te paturaa aore ra i te tarahuraa i te mau piha ohipa.

 Te faataa nei te hoê taata huri i te mau haamaitairaa ta ˈna i fanaˈo: “I te roaraa ahuru matahiti a ohipa ˈi au i te amaa ei taata huri, aita vau i farerei hoê noa aˈe utuafare i pihai iho noa mai o tei paraparau i to ˈu nei reo. I teie nei, ua tuuhia ta matou pǔpǔ huriraa i te vahi e paraparauhia ˈi te reo Tojolabal. Ua nehenehe atura vau e paraparau i to ˈu reo pauroa i te mahana. Ua haapii au e rave rahi taˈo apî e ua maitai mai te faito o ta ˈu ohipa.”

 No te matahiti taviniraa 2021, mai te peu e nehenehe, e opuahia e ohipa i nia 75 piha ohipa huriraa atea i te amaa, tae roa ˈtu i te mau piha faaohipahia no te mau haapiiraa a te faanahonahoraa. E tamau noa te ohipa i nia na vaˈu opuaraa faufaa roa a te mau amaa, mai te opuaraa i te pu rahi apî i Ramapo i New York, e tae roa ˈtu i te tauiraa i te vahi ohipa o te mau amaa no Raparata e Italia. Hau atu â, e titauhia ia patu hau atu i te tausani Piha a te Basileia apî, ia taui hau atu i te ono tausani vahi haamoriraa e ia faaapî maha tausani Piha a te Basileia.

 Nohea mai te taatoaraa o te faufaa moni o tei faaohipahia no te patu e no te faaapî? Teie te pahonoraa a te taeae Lázaro González, mero o te Tomite amaa no Marite no ropu, no nia i te opuaraa a te piha ohipa huriraa atea i te amaa o te reo Tojolabal: “I roto i te tuhaa fenua o ta matou nei amaa, mea iti roa te faufaa. Auaˈe te tauturu a te taatoaraa o te mau taeae i nehenehe ai matou e patu i te mau piha ohipa huriraa no te mau taeae i roto i tera tuhaa fenua. Maoti te faufaa moni a te mau taeae na te ao atoa nei i nehenehe ai matou e tono i te mau taata huri i pihai iho noa mai i te mau vahi e faaohipahia ˈi taua mau reo ra. Te haamauruuru nei matou ma te aau atoa i to matou nei mau taeae na te ao atoa nei no to ratou aau horoa noa.” Ua manuïa teie mau opuaraa i te pae o te paturaa maoti ta outou mau ô. Ua horoahia te rahiraa o te reira i nia donate.pr418.com.