Hau atu i te ono ahuru i nia i te hanere o te mau pǔpǔ huriraa, o te ohipa ra ma te taime taatoa, o te ore e ohipa i te Betela, i roto râ i te mau piha ohipa huriraa. No te aha e faanahoraa maitai roa teie? Eaha te mau tauihaa hinaarohia e te feia huri ia tere maitai te ohipa huriraa i roto i te mau piha ohipa huriraa? Ia maitai mai te huriraa, mea faufaa anei ihea te hoê pǔpǔ huriraa e ohipa ˈi?

 Maoti te hoê piha ohipa huriraa, e nehenehe te feia huri e ora i te vahi e paraparau-rahi-hia ˈi to ratou reo. Te faataa ra o Karin, hoê taata huri na roto i te reo rii Heremani parauhia bas Allemand: “Mai te taime i haere ai matou e ohipa i te hoê piha ohipa huriraa i Cuauhtémoc, i Chihuahua, i Mehiko, te paraparau noa ra matou i to matou reo, te reo rii Heremani, pauroa te taime e te feia huri e te feia ta matou e farerei i roto i te pororaa, oia atoa a haere ai matou i te fare toa. Te ora nei matou i rotopu i te mau taata o te paraparau noa ra i to matou reo. Te faarooroo nei matou i te mau parau tei faaohipahia ei auraa parau i roto noa i to matou reo. Mea maoro râ i teie nei aita matou i faaroo i te reira. Te faatano atoa nei matou i te mau taˈo ta matou e faaohipa nei, ia tuati maitai te reira i te mau taˈo ta te taata e faaohipa ra i te mau mahana atoa.

 Te parau ra o James o te ohipa ra e te pǔpǔ huriraa na roto i te reo Frafra i Ghana: “I te tahi taime, e moemoe vau a manaˈo ai i te mau mero o te Betela ta ˈu i matau i te ite.” Te faaite atoa nei râ oia: “Mea au roa na ˈu ia ohipa i te piha ohipa huriraa. Ua putapû to ˈu aau a poro ai au na roto i te reo o te feia o te tuhaa fenua e a ite ai au e te farii ra te taata i te parau mau.”

 Nafea to tatou mau taeae e faaoti ai ihea te vahi tano aˈe no te haamau i te hoê piha ohipa huriraa? Teie ta Joseph, hoê mero o te Tuhaa no te paturaa na te ao nei i Warwick, i Marite i parau: “Hoê fifi ta matou e farerei, te vai ra te mau vahi aita e uira, e pape aore ra e natirara. E hinaaro hoi te feia huri i te natirara no te fanaˈo i te mau papai te titauhia ra ia huri. Hou a haamau ai matou i te hoê piha ohipa huriraa, e titauhia ia matou ia maiti e rave rahi vahi i reira e paraparauhia ˈi te reo.”

 Te ravea ohie aˈe e te mâmâ aˈe, o te haamauraa ïa i te hoê piha ohipa huriraa i te hoê Piha tairururaa, i te hoê Piha a te Basileia aore ra i te hoê fare mitionare. E haere ïa te feia huri i ǒ no te rave i te ohipa. Eaha te tupu peneiaˈe aita e paturaa no te farii i te feia huri? E nehenehe te mau taeae e fanaˈo i te parau faatia no te hoo mai i te mau vahi nohoraa aore ra te mau piha ohipa i reira e nehenehe ai te feia huri e ora e e ohipa. Peneiaˈe e taui te huru tupuraa o te hoê pǔpǔ huriraa, mea ohie aˈe ïa ia hoo atu i teie mau vahi nohoraa e ohipa e i muri aˈe, e nehenehe e hapono i tera tino moni i te vahi e hinaaro-rahi-hia te tauturu.

 I te matahiti taviniraa 2020, ua titauhia 13 mirioni tara Marite ia nehenehe te ohipa e tere maitai i te mau piha ohipa huriraa. Te hinaaro nei te mau pǔpǔ i roto i te mau piha ohipa huriraa i te mau matini roro uira, te mau mauhaa taa ê no te mau matini roro uira, te mau mauhaa no te haruharu, te natirara e te vai atu â. Ei hiˈoraa, ia nehenehe te taata e faaohipa i te mau matini roro uira, e mea tia na mua roa ia tuu i te mau porotarama roro uira i roto. Ua titauhia 750 tara Marite no te taata tataitahi. Ua hoo-atoa-hia te mau parau faatia e ere na te faanahonahoraa e ua tuu-atoa-hia i roto i te mau matini roro uira, te Watchtower Translation System, hoê porotarama roro uira o te tauturu nei i te feia huri ia faanaho i ta ratou ohipa huriraa e ia fanaˈo ohie i te mau papai e titauhia ra ia huri.

 Ua fanaˈo atoa te feia huri i te mau mauhaa no te haruharu a nehenehe atu ai ratou e haruharu i te piha ohipa. A haamata ˈi te maˈi pee Covid-19 i te parare, ua ite te feia huri i te faufaaraa o teie mau mauhaa no te haruharu. Oia mau, ua nehenehe e rave rahi taata huri e afai i tera mau mauhaa i to ratou fare e ua tamau ratou i te haruharu i ta ratou huriraa i te mau papai e i te mau video.

 Te tauturu pinepine ra te mau rima tauturu no te tuhaa fenua i te feia huri, ma te hiˈo faahou i te mau papai tei hurihia aore ra ma te atuatu i te mau piha ohipa huriraa. Teie ta Cirstin i parau, te ohipa ra oia i te piha ohipa huriraa i Cape Town, i Afirika apatoa: “E rave rahi taata poro e pionie tamau o te haere mai ra no te ohipa e o matou.”

 Mea oaoa roa te mau rima tauturu i te fanaˈo i teie fanaˈoraa taa ê. Ua parau te hoê tuahine o te tauturu ra i te feia huri i te hoê piha ohipa huriraa e “mea itoito mau” ia ohipa o ˈna i ǒ. Te apiti atoa nei te tahi mau taeae e tuahine no tera tuhaa fenua i te ohipa huriraa ma te haruharu i to ratou reo. Ua parau Juana, hoê taata huri na roto i te reo Totonac, i Veracruz, i Mehiko: “I teie nei, mea piri aˈe matou i te mau oire i reira e paraparauhia ˈi to matou reo, mea ohie aˈe ïa no e rave rahi taeae e tuahine ia haere mai e tauturu ia matou no te haruharu i te mau papai tei faaroohia e i te mau video.”

 Ua tauturu anei râ te mau piha ohipa huriraa ia haamaitai i te huru o te huriraa? Ia au i na mirioni taata o te taio ra i ta matou papai, oia mau. Ua na ô o Cédric, o te ohipa ra e te pǔpǔ huriraa i te Repupirita Manahune no Congo: “I na mua aˈe, ua matau te tahi mau taeae e tuahine i te parau e ua huri matou i te mau papai na roto i te ‘reo Kongo a te Watchtower.’ No ratou, e ere pai e te reo Kongo ta te feia e faaohipa nei i te mau mahana atoa. I teie nei râ, te na ô ra teie mau taeae e tuahine e te huri nei matou i te mau papai na roto i te reo Kongo no teie mahana, te reo Kongo ta te taata e faaohipa nei i teie nei.”

 Tera atoa ta Andile i faaroo, te ohipa ra oia e te pǔpǔ huriraa na roto i te reo Xhosa i Afirika apatoa: “E rave rahi o te parau mai ia matou e ua maitai atu â te huriraa. Na mua aˈe, ua matau te mau tamarii i te taio i Te Pare Tiairaa na roto i te reo Beretane. I teie nei râ, te taio ra ratou i te reira na roto i te reo Xhosa. Mea au iho â na ratou te neneiraa apî o te Huriraa o te ao apî.”

 Maoti te mau ô horoa noa tei horoahia no te turu i ta tatou ohipa na te ao nei e te mau ô horoahia maoti donate.pr418.com, ua aufauhia te mau haamâuˈaraa no te faaohipa e no te atuatu i te mau piha ohipa huriraa, ia nehenehe atoa te mau rima tauturu e te feia huri e ohipa i ǒ.