I roto hau atu 200 fenua, te rave nei te mau Ite no Iehova i te mau ohipa i te pae o te faaroo e i te ohipa tauturu. Tera râ, 35 noa fenua o tei fanaˈo i te mau ô tano no ta ratou mau haamâuˈaraa. Mea nafea ïa ta tatou mau ohipa i te tururaahia i roto i te mau fenua navai ore?

 E hiˈopoa hohonu te tino aratai a te mau Ite no Iehova i ta te mau taeae e tuahine e hinaaro nei i te pae varua e tae noa ˈtu i ta ratou e rave nei na te ao atoa nei. E faaoti-maitai-hia nafea ia faaohipa i te mau ô ia au i te mau haamâuˈaraa. E faaohipahia te moni hau a te tahi mau amaa no te tauturu i te mau fenua navai ore. Te pee nei taua faaotiraa ra i te hiˈoraa a te mau Kerisetiano matamua o tei tauturu te tahi e te tahi “na roto i te aifaitoraa.” (Korinetia 2, 8:14) Ua faaohipa ratou i ta ratou moni hau no te tauturu i te tahi atu mau taeae mea iti ta ratou.

 Eaha te huru o to tatou mau taeae o tei fanaˈo i te tauturu no ǒ mai i te tahi atu mau amaa? Ei hiˈoraa, i te fenua Tanzanie, e ora te afaraa o te huiraatira e te tuhaa moni iti aˈe piti hanere farane i te mahana. Ua faaohipahia ïa teie mau ô no te faaapî i te Piha a te Basileia a te amuiraa Mafinga. Teie ta teie amuiraa i papai: “Mai te faaapîraahia ta matou nei piha, ua rahi atu â te mau taata o tei tae mai! Te haamauruuru atu nei matou i te faanahonahoraa a Iehova e te mau taeae atoa o te ao nei no to ratou aau horoa noa. Maoti te reira, ua fana‘o matou i te hoê vahi haamoriraa nehenehe mau.”

 No teie maˈi Covid ahuru ma iva, ua fifi te tahi o to tatou mau taeae i Sri Lanka i te pae o te maa. Tera ïa ta Imara Fernando e ta ˈna tamaiti apî o Enosh i faaruru. Teie nei, maoti te mau ô a te tahi atu mau fenua, ua fanaˈo raua i te tauturu. Teie ta raua i papai: “Te haamauruuru atu nei maua i te mau taeae atoa o tei faaite mai i to ratou here i roto i teie mau taime hepohepo mau. Te oaoa mau nei maua no te mea tei roto maua i taua fetii taeae ra e te tamau nei maua i te pure ia Iehova ia tauturu i te taatoaraa o te mau taeae i teie mau mahana hopea.”

 Noa ˈtu te fenua, te horoa nei to tatou mau taeae e tuahine i ta ratou mau ô. Ei hiˈoraa, ua hamani Enosh i ta ˈna iho afata ô ia nehenehe o ˈna e tauturu atoa i te mau utuafare i roto i te fifi. Ua faaite atoa o Guadalupe Álvarez i te reira manaˈo horoa noa. Te ora nei o ˈna i te fenua Mehiko e, i roto i taua fenua ra, mea iti roa te mau taata o te fanaˈo nei i te moni tahua e o te aufau-tamau-hia nei. Noa ˈtu râ, te horoa nei o ˈna i ta ˈna e nehenehe. Teie ta ˈna i papai : “E mauruuru rahi to ˈu ia Iehova no to ˈna maitai rahi e no to ˈna here taiva ore. Ua ite au e, e faaohipahia ta ˈu mau ô no to ˈu mau taeae o tei hinaaro nei te tauturu.”

 E oaoa rahi to te mau amaa i te hapono i te tino moni i te mau vahi e hinaaro-rahi-hia te tauturu. Te na ô ra o Anthony Carvalho, hoê mero o te Tomite amaa i te fenua Beresilia: “E rave rahi matahiti i te maoro, ua hinaaro-rahi-hia te mau ô i te pae moni no te turu i te ohipa pororaa i to matou nei fenua. Maoti taua turu ra, ua ite matou i te hoê maraaraa manaˈo-ore-hia. I teie nei, ua taui to matou tupuraa e te oaoa nei matou i te tauturu i to matou mau taeae atoa i te pae o te faufaa. Te feruri nei te mau taeae e tuahine i roto i to matou tuhaa fenua i te ohipa pororaa na te ao nei e te hinaaro ra ratou e tauturu ia vetahi ê.

 Nafea te mau Ite no Iehova e nehenehe ai e tauturu i te mau taeae e tuahine? E nehenehe ratou e turu i te mau ohipa na te ao nei, eiaha ma te hapono roa ˈtu i te mau ô i te mau amaa, ma te faaohipa râ i te mau afata ô o tei faataahia i roto i te mau Piha a te Basileia no te turu i te mau ohipa na te ao nei e ma te faaohipa atoa i te mau ô horoahia mai maoti te ravea natirara donate.pr418.com. E mauruuru rahi te mau taeae atoa no teie mau pûpûraa ô taa ê.