I te matahiti 2020, ua tupu e rave rahi ati natura e ua haamata atoa te maˈi pee rahi COVID-19 i te parare na te ao nei. Nafea te mau Ite no Iehova i tauturu ai i tei roohia i te ati natura?

 I te matahiti taviniraa 2020, a ua farii te Tomite tiaau o te Tino aratai e horoa 28 mirioni tara Marite (fatata 2 788 800 000 CFP) no te tauturu i tei roohia i te ati. Ua tauturuhia ïa te mau taata tei roohia 200 ati natura rau mai te maˈi pee rahi COVID-19, te mataˈi rorofai e rave rahi, te pape pue i Afirika, te oˈe i Venezuela e te paˈurâ i Zimbabwe. Maoti te mau ô horoa noa, ua fanaˈo te mau taata i te maa, te pape, te fare, te ahu e te rapaauraa, oia atoa te mau tauihaa no te tamâ, no te tataî e no te patu. Teie te tahi mau hiˈoraa o te tauturu o tei ravehia no te feia tei roohia i te ati natura.

 COVID-19. Na te ao nei, ua haafifi te maˈi pee rahi i to tatou mau taeae e tuahine i te pae tino, i te pae aau e i te pae o te moni. No te tauturu atu ia ratou, ua haamauhia hau atu i te 800 tomite ohipa tauturu na te ao nei. Ua haapao maite teie mau tomite i te mau hinaaro mau o to tatou mau taeae. Maoti ta ratou i tapao, ua ite te mau tomite tiaau eaha te ravea maitai aˈe no te tauturu atu.

 I te roaraa o te matahiti, ua tauturu te mau tomite ohipa tauturu i e rave rahi taata ia fanaˈo i te maa, te pape, te mau tauihaa no te vai-mâ-raa e te tahi mau raau no te rapaau. I te tahi mau vahi, ua ohipa amui te mau tomite ohipa tauturu e te mau matahiapo no ǒ no te tauturu i te mau taeae ia fanaˈo i te tauturu a te faatereraa o to ratou fenua.

 Ua tapao te feia e ere i te Ite no Iehova i ta tatou ohipa tauturu i tei roohia i te ati natura. Ei hiˈoraa, teie ta Field Simwunga, te tavana hau no Nakonde, i Zambie, i parau i to tatou mau taeae: “Mauruuru roa ia outou no te tauturu ta outou i horoa i te mau utuafare tei roohia i te ati. Ua tamǎrûhia ratou i te taime tano.”

 Te oˈe i Angola. No te maˈi pee rahi COVID-19, ua iti mai te maa i Angola e ua maraa te faito moni o te reira. Mea fifi roa ïa no e rave rahi o to tatou mau taeae e tuahine ia hoo mai i te maa na ratou.

 Ua anihia te amaa no Beresilia ia hapono atu i te maa i to tatou mau taeae i Angola na roto i te haapueraa maa e rave rahi. Ua imi to tatou mau taeae i te tino moni mâmâ roa ˈˈe ia iti mai te mau haamâuˈaraa no te hoo mai e no te hapono atu i te maa. Ua hoo rahi ïa to tatou mau taeae i te maa. No te hoo mai e no te hapono atu i te haapueraa tataitahi, ua titau-noa-hia 22 tara Marite (2 192 CFP). I roto i te hoê noa haapueraa maa, ua nehenehe e faaô 20 kilo maa mai te raiti, te pipi e te hinu no te tunu i te maa. E 33 544 haapueraa maa ïa tei haponohia, oia hoi 654 tane tuea. Maoti teie mau ô horoa noa e te maa ta te mau taeae e tuahine no ǒ i horoa ˈtu, ua faatamaahia hau atu i te 50 000 taata!

 Eaha te huru o to tatou mau taeae no nia i teie tautururaa? Teie ta Alexandre o te ora nei i te hoê vahi atea no Angola, i parau: “No ˈu, e haapapuraa teie e te here ra Iehova ia ˈu e tei pihai iho noa oia ia ˈu. Mea faufaa roa vau no te faanahonahoraa a Iehova!” Ua parau o Mariza, te hoê metua vahine taa noa: “Ua faaroo Iehova i ta ˈu pure. Mauruuru roa ia ˈna e i ta ˈna faanahonahoraa!”

 Te paˈurâ i Zimbabwe. I te matahiti taviniraa 2020, ua tupu te hoê paˈurâ rahi i Zimbabwe. Tau mirioni taata tei pohe i te poia. No e tausani Ite no Iehova i Zimbabwe, aita i ravai te maa.

 Ua haamauhia 5 tomite ohipa tauturu no te hapono i te maa i to tatou mau taeae. Tau hanere taata poro tei tauturu atu ma te faaineine, ma te faauta i te mau haapueraa maa aore ra ma te horoa i to ratou iho pereoo. b I te matahiti taviniraa 2020, ua faaohipahia 691 561 tara Marite (fatata 69 000 000 CFP) no te faatamaa hau atu i te 22 700 taata!

 Ua pau roa te maa a te tahi o to tatou mau taeae. E i tera iho â taime, ua tae mai te tauturu. A fanaˈo ai to tatou mau taeae i te maa, ua haamauruuru ratou ia Iehova na roto i te arueraa e te himeneraa.

 I te hoê vahi, ua apiti e piti tuahine, e vahine ivi raua, i te hoê putuputuraa tei faanahohia e te hoê faanahonahoraa e ere na te hau. Ua hinaaro tera faanahonahoraa e tauturu i te oire i te pae o te maa. Tera râ, ua riro te putuputuraa ei aparauraa poritita. Ua faaoti ïa na tuahine e piti eita raua e nehenehe e farii i te mau titauraa no te fanaˈo i tera tauturu. A faarue ai raua i te putuputuraa, ua faaooohia raua a parauhia ˈtu ai: “Eiaha roa ˈtu orua e haere mai faahou no te taparu i ta matou maa.” E piti noa râ hebedoma i muri aˈe, ua haere to tatou mau taeae i tera vahi e ua tauturu ratou i to tatou mau tuahine i te pae o te maa, hou te tauturu a te faanahonahoraa e ere na te hau a tae mai ai!

 Maoti te ohipa tauturu i Zimbabwe, ua hiˈo maitai te mau taata i te mau Ite no Iehova. Teie te hiˈoraa o Prisca o te ora nei i roto i te hoê oire iti. Noa ˈtu e ua faaruru oia i te mau fifi no te paˈurâ, ua poro o Prisca i te mau mahana toru e i te mau mahana pae atoa. Ua na reira atoa oia i te roaraa o te tau ueueraa. Ua faaooo râ te mau taata i roto i to ˈna oire iti ia ˈna, ma te parau e: “Mai te mea e poro noa oe, e pohe to oe utuafare i te poia.” Ua pahono râ o Prisca: “Eita roa ˈtu Iehova e faarue i ta ˈna mau tavini.” Tau taime noa i muri aˈe, ua fanaˈo oia i te tauturu a ta tatou faanahonahoraa. Ua maere roa te tahi o ta ˈna mau taata tapiri e ua parau ratou ia Prisca: “Aita roa ˈtu te Atua i faarue ia oe. Te hinaaro nei matou e ite atu â no nia ia ˈna.” I teie nei, te faaroo ra e hitu taata tapiri i te mau putuputuraa a te amuiraa o te haapurorohia ra i roto i te radio.

 A piri noa ˈtu ai tatou i te hopea o teie nei ao, e faaruru noa â tatou i te mau ati natura. (Mataio 24:3, 7) Mauruuru roa no ta outou mau ô horoa noa tei horoahia maoti te mau ravea i nia donate.pr418.com. E faaohipa-maitai-hia te reira no te tauturu i te taime tano i te feia tei roohia i te ati natura.