“Ua tiai au 19 matahiti i te maoro!” Eaha ïa ta to tatou taeae i tiai? Ua tiai o ˈna i te Huriraa o te ao apî o te mau Papai Heleni Kerisetiano na roto i to ˈna iho reo, te reo Bengali. Tera atoa te mau huru aau o e rave rahi taata a matara mai ai te Huriraa o te ao apî i roto i to ratou iho reo. Ua ani aˈena anei outou eaha te ohipa tei titauhia no te huri e no te pia i teie mau Bibilia?

 Na mua roa, e maitihia te hoê pǔpǔ huriraa i raro aˈe i te aratairaa a te Tomite papairaa a te Tino aratai. Ehia taime te titauhia ra i te hoê pǔpǔ huriraa no te huri i te Bibilia? Teie ta Nicholas Ahladis i faataa, te ohipa ra o ˈna i roto i te Tuhaa huriraa na te ao nei, i Warwick, i New York: “E titauhia ia feruri ehia taata huri e nehenehe e apiti i roto i teie opuaraa, eaha te mau fifi e farereihia i te pae o te reo aore ra ua ite anei te feia taio i te mau aamu Bibilia. Ia feruri atoa i te taa-ê-raa o te mau taˈo e faaohipahia ra i roto i te mau vahi atoa e paraparauhia ˈi te reo. E titauhia hoê matahiti tae atu e toru matahiti i te maoro no te huri noa i te mau Papai Heleni Kerisetiano, e maha atu â matahiti i te maoro aore ra hau atu â, no te huri i te taatoaraa o te Bibilia. E titauhia hau atu â taime no te huri i te reira na roto i te mau reo apǎraa rima.”

 E titauhia hau atu i te pǔpǔ huriraa no te huri i te Bibilia. E ani-atoa-hia te tauturu a te hoê pǔpǔ taeae e tuahine oraraa rau, o te ore e ohipa ra i roto i te tuhaa huriraa, no te taio i te huriraa ei rima tauturu. I roto i te tahi mau tupuraa, e anihia te tauturu a te feia taio no te tahi atu mau fenua. E tauturu to ratou mau manaˈo i te feia huri ia pia i te hoê huriraa Bibilia papu e te ohie ia taa. Ua na ô te hoê taeae o te faaineine ra i te feia huri i te pae o te huriraa o te Bibilia, i Afirika apatoa: “No te feia huri, e hopoia faahiahia roa te huriraa o te Bibilia i mua ia Iehova e i mua i te feia o te taio ra i ta ˈna Parau.”

 Ia oti te taatoaraa o te huriraa, e mea tia ia neneihia e ia amuihia te mau api atoa o te Bibilia ei hoê noa buka. No te na reira, i roto i te mau vahi neneiraa, e faaohipahia te mau tauihaa mai te papie, te inita, te tauihaa no te tapoˈi, no te tapiri, no te paruru, no te turu e no te amui ia ore te mau api e mataratara hanoa. I 2019, ua raea te mau haamâuˈaraa no te aufau noa i taua mau tauihaa no te pia i te mau Bibilia ra, hau atu i te 20 mirioni tara Marite (1 972 500 000 F CFP). I taua matahiti ra, ua ohipa to tatou mau taeae e tuahine i roto i te tuhaa neneiraa hau atu i te 300 000 hora no te pia e no te hapono atu i te mau Bibilia.

 No te aha tatou e horoa rahi i te taime e te moni no teie mau ohipa? Teie ta Joel Blue, o te ohipa ra i roto i te Tuhaa neneiraa na te ao nei, i parau: “O te Bibilia te buka faufaa roa ˈˈe ta matou e pia. E hinaaro ïa matou ia faahanahana te huru rapaeau o te Bibilia i te Atua ta matou e haamori ra, oia atoa i te poroi ta matou e faaite ra.”

 E pia atoa matou i te Huriraa o te ao apî na te feia taio, e hinaaro taa ê to ratou. Ei hiˈoraa, ua piahia te Huriraa o te ao apî na te matapo na roto ahuru reo. No te nenei i te taatoaraa o te hoê Bibilia na te matapo, e titauhia vaˈu hora i te maoro. Ia tuuhia te buka taatihia e rave rahi o teie Bibilia i pihai iho te tahi e te tahi, e nehenehe e faito 2, 3 metera i te roa. Te pia atoa ra matou i te mau neneiraa taa ê o te Bibilia na te feia mau auri, o te mau tapoˈi mǎrû noa hoi te fariihia ra i te mau fare tapearaa.

 Maoti te Huriraa o te ao apî, e fanaˈo te feia taio i te mau haamaitairaa e rave rahi i roto i to ratou oraraa. A tapao na i te hiˈoraa o te amuiraa reo Kiluba i Tombe, i te République démocratique du Congo. Mea atea te oire no Tombe i te oire pu, oia hoi hau atu i te 1 700 kilometera i te atea. Te fifi, hoê anaˈe Bibilia to te mau taeae i tera vahi e e huriraa Bibilia tahito roa te reira na roto i te reo Kiluba. Ua horoahia tera anaˈe Bibilia, rima e rima, ia nehenehe te mau taeae, e tuhaa to ratou i te putuputuraa, e faaineine ia ratou. Mai Atete 2018, ua matara mai te taatoaraa o te Bibilia Huriraa o te ao apî, na roto i te reo Kiluba. E huriraa ohie ia taa e ua nehenehe te mau mero atoa o te amuiraa e fanaˈo i ta ratou iho Bibilia.

 Teie ta te hoê tuahine, e reo Heremani to ˈna, i parau no nia i te Bibilia Huriraa o te ao apî na roto i to ˈna iho reo: “Aita vau e parau faahou e mea tia ia ˈu ia taio i te Bibilia. I teie nei, e parau vau ‘Hinaaro noa vau e taio, aita vau e fiu.’” Teie ta te hoê mau auri i papai: “Ua fanaˈo vau i te hoê Bibilia Huriraa o te ao apî, e ua taui roa te reira i to ˈu oraraa. Maoti tera huriraa, a tahi ra vau i taa maitai i te Parau a te Atua. Te hinaaro nei au e ite atu â no nia i te mau Ite no Iehova e te hinaaro atoa vau e ite nafea ia riro ei Ite no Iehova.”

 Te faaite nei te feia taio atoa o te Bibilia Huriraa o te ao apî i to ratou mauruuru no te mau ô horoa noa o tei turu i te piaraa o te Bibilia. Ua horoahia teie mau ô horoa noa no te turu i te ohipa na te ao nei, maoti te mau ravea itehia i nia donate.pr418.com. Mauruuru roa no to outou aau horoa noa.