I roto e rave rahi fenua, mea fifi roa te oraraa o te taata, oia atoa no te mau Ite no Iehova. Tera râ, aita te mau Ite no Iehova e hepohepo roa, ua papu hoi ia ratou ‘e ore roa Iehova e faarue’ i ta ˈna mau tavini. (Hebera 13:5) Mai te tau mai â, ua tapea noa Iehova i ta ˈna i fafau. Ua na reira o ˈna i Philipino, te hoê fenua veve roa. I te roaraa o te mau matahiti 1970 e 1980, ua faaruru te taata e ora ra i ǒ i te mau taime fifi roa.

 Te haamanaˈo ra te tuahine Vicky a: “I te tahi taime, e taˈi au no te mea aita rea maa ta matou. Te vai ra te mau taime e toe noa mai te raiti, te miti papaa e te pape.” Te faataa ra te taeae Florencio: “Aita i noaa mai te tahi ohipa na ˈu. E toru noa piriaro e e toru piripou roa, ta ˈu ïa e oomo no te haere i te putuputuraa e te tairururaa.” Mea nafea te mau tavini a Iehova i te faarururaa i teie mau fifi? Eaha tei tauturu ia ratou ia vai puai noa i te pae varua? E nafea to ratou hiˈoraa e tauturu ai ia tatou i teie mahana, ia taui taue noa to tatou oraraa?

 Ua papu i te mau Ite no Iehova i Philipino e aupuru Iehova ia ratou i te taime fifi. (Hebera 13:6) E tera iho â ta ˈna i rave, na roto e rave rau ravea. Ei hiˈoraa, te haamanaˈo ra te tuahine Cecille: “Ua tunu matou i te auˈa raiti hopea, aita faahou ïa e maa no te utuafare. Pure atura matou e maha ia Iehova ia horoa mai i te mea e hinaarohia e matou no taua mahana ra. A tamaa noa ˈi matou, faura mai nei hoê taeae e te pute raiti e pae kilo. Ua taˈi matou i te oaoa e te mauruuru no teie haamaitairaa a Iehova. E rave rahi atu â tupuraa mai teie ta matou i ite.”

 Hau atu, ua faaohipa te mau tavini a te Atua i te mau aˈoraa paari itehia i roto i te Bibilia. (Maseli 2:6, 7) Teie te hiˈoraa o Arcelita, hoê tuahine no bapetizo-noa-hia ˈtura. E tuahine faaea taa noa oia. Mea fifi roa to ˈna oraraa e ua haamahora oia i to ˈna aau ia Iehova ra. Feruri ihora o ˈna i te Maseli 10:4. Te na ôhia ra: “E vevehia te taata rima faatau, e taoˈahia râ te taata rima itoito.” Ua faaohipa Arcelita i teie irava, haamata ˈtura o ˈna i te tanu i te maa. Te faatia ra o ˈna: “Ua haamaitai rahi mai Iehova i ta ˈu mau tutavaraa. Ua nehenehe au e amu i te maa ta ˈu i tanu a hoo atoa ˈi te reira no te aufau i te faurao no te haere i te tahi atu vahi.”

 Aita atoa ta te mau taeae e moni no te hoo mai i te tuhaa fenua e no te patu i te mau Piha a te Basileia. Aita râ te reira i tapea ia ratou ia pee i te faaueraa ia putuputu ratou no te faaitoito te tahi i te tahi. (Hebera 10:24, 25) Ua titauhia ia rave ratou i te tahi mau faatanoraa. Ei hiˈoraa, te na ô ra te tuahine Deborah: “E ono matou tei putuputu i roto i te hoê tiahapa ta mâua hoê tuahine i hamani. Ua faaohipa mâua i te raufara no te tafare, i te niau no te mau papai e te tumu haari no te mau parahiraa.”

 Te rahiraa râ o te mau taeae e tuahine e faatupu ratou i te mau putuputuraa i to ratou fare. Te faatia ra te tuahine Virginia: “Ua hamanihia to matou fare nainai i te aihere e te ofe. Pauroa te Mahana maa e tatara matou i ta matou mau taihaa no te faaateatea i te piha no te putuputuraa ananahi aˈe.” I roto i te tahi atu fare, mea apoopoo te tafare. Te faataa ra te taeae Noel: “Ia topa te ûa, e tahe mai te pape na nia mai i te tafare. E tuu ïa matou i te mau farii i raro aˈe. Aita râ matou i tiatonu i te reira inaha te oaoa ra matou i te haamori ia Iehova e to matou mau taeae e tuahine.”

 Aita te fifi i te pae moni i haaparuparu te itoito rahi o te mau taeae e tuahine no te pororaa. Te faataa ra Lindina e ora ra i te motu Negros: “Mea rahi tamarii matou e o papa anaˈe te rave i te ohipa. Aita ïa ta matou e moni no te aufau i te faurao. No reira, no te tapae i roto i te tuhaa fenua no te pororaa pinepine ïa matou i te haere na raro. Noa ˈtu râ, e taime oaoa mau â inaha o matou pauroa te haere e poro. Ua oaoa atoa matou inaha te mauruuru nei Iehova i ta matou mau tutavaraa.”

 Mea fifi roa ia haere e poro i te mau fenua mouˈa e te mau vahi moˈemoˈe no te mea aita e faurao no te haere atu. Te na ô ra Esther e ora ra i te motu no Luzon: “E ono tae atu 12 feia poro i roto i ta matou pǔpǔ. E faarue matou i te poipoi roa no te mea e titauhia ia taahi e rave rahi kilometera. E poro matou i te mahana taatoa. No te tamaa, e afai matou i te maa ta matou i faaineine i te fare a amu atu ai i raro aˈe i te tumu raau. Te vai ra i roto ia matou e aita ta ratou e maa, e faaitoito râ ratou i te apiti mai no te pororaa. E na ô ïa matou ia ratou: ‘Eiaha outou e haapeapea, e navai iho â te maa no tatou pauroa.’”

 Ua haamaitai rahi Iehova i te itoito rahi o te mau taeae e tuahine. Ei hiˈoraa, i 1970 e 54 789 feia poro i Philipino. I 1989, ua tataipiti te numera o te feia poro, ua naeahia 102 487. I 2023, ua maraa ˈtu â te feia poro i tera fenua e ua tapae roa i te faito 253 876.

 Noa ˈtu ua faaruru te mau taeae e tuahine i te fifi i te pae moni, ua tamau ratou i te tavini ia Iehova ma te oaoa. Te na ô ra taeae Antonio: “Noa ˈtu te veve, ua rahi atu â to matou here ia Iehova.” Te faataa ra te tuahine Fe Abad: “Ua faaruru mâua ta ˈu tane i te fifi i te pae moni. Noa ˈtu râ, ua ati maite mâua ia Iehova e ua faatupu noa mâua i te mauruuru i te mea e vai nei ia mâua. Ei haamaitairaa, ua haapii ta mâua mau tamarii i te tiaturi ia Iehova.”

 Te na ô ra Lucila e ora ra i te motu Samar: “Aita anaˈe ta oe e moni, e ere tera i te fifi no te mea te tavini ra oe ia Iehova. Ia tuu oe i te Atua i te parahiraa matamua o to oe oraraa, e oaoa noa oe. E faatupu oe i te hoê feruriraa maitai. No ˈu nei, ua fanaˈo vau i te oaoa a ite ai i ta ˈu mau piahi Bibilia ia haapii no nia ia Iehova e i muri mai, ua rave ratou i te taviniraa pionie.”

 Ia feruri tatou i te mau tupuraa arepurepu e tiai mai ra ia tatou, e haamanaˈo anaˈe i ta Rodolpho te hoê matahiapo i parau: “Ua faaruru vau i te mau tupuraa peapea mau i te area matahiti 1970 e 1980. Tera râ, ua ite mata roa vau i te rima o Iehova i roto i to ˈu oraraa. Papu, aita rea moni ta ˈu i tera mau taime. Noa ˈtu râ, aita vau i ere i te tahi noa ˈˈe mea. Ua aupuru maitai Iehova ia ˈu. Ua oaoa roa vau i roto i to ˈu oraraa, e te tiai ru nei au i ‘te ora mau’ i roto i te paradaiso e fatata mai ra.”—Timoteo 1, 6:19.