Ua rave na mua roa te Feia haapii Bibilia nunaa rau, piihia Ite no Iehova i muri aˈe, i te mau faanahoraa ia porohia te feia i Mehiko i 1917. E rave rahi hanere taata aau tae tei farii i te parau mau i na roaraa matahiti. Tera râ, i te piti o te Tamaˈi rahi, aita te hau no Mehiko i farii ia putuputu e ia poro matou i te mau vahi e i te fare tahua i reira matou e amui ai.

 I tera tau, ia au i te ture a to Mehiko, ia faatupuhia te mau haamoriraa atoa i roto i te mau fare tahua a te hau. Ua haafifi te reira ia matou no te mea, e faatupu na matou i te mau tairururaa i te vahi e nehenehe e titau rahi i te taata, e tupu na ta matou putuputuraa hebedoma i te fare o te mau taeae e e poro na matou na te mau aroâ e i tera e tera fare.

 No te faatura i tera ture, i 1943, ua haamau matou i te hoê taatiraa tivira no te haapii i te taata ma te tamoni ore no te maitai o te taata. Te auraa e tiaraa ïa to matou ei faanahonahoraa no te haapii i te taata eiaha râ ei haapaoraa. Aita ïa matou e poro e e putuputu i roto i te mau fare tahua a te hau.

 Ta matou porotarama no nia i te haapiiraa i te taata ia taio. Ua faaî matou i te titauraa a te hau no te mau faanahoraa tivira no te haapii i te taata. (Roma 13:1) Te mea papu, to matou hinaaro e tauturu i te taata ma te haapii ia ratou i te parau mau, aita ïa i taui. (Isaia 48:17, 18) Fatata matou i te ite i te haamaitairaa a Iehova no teie faanahoraa apî. Maoti te reira, e rave rahi taata tei haere mai i roto i te parau mau mai ta e rave rahi Ite no Iehova i teie mahana e haamanaˈo ra.

 Ta matou ohipa matamua i Mehiko, o te poro-noa-raa i te parau apî oaoa no nia i te Faatereraa arii a te Atua. Tera râ, mai te aposetolo Paulo, ua faatano matou i ta matou pororaa ia au i te mau tupuraa. (Korinetia 1, 9:20-23) Ei hiˈoraa, i to Paulo paraparauraa i te mau taata no Ateno i te Areopago, aita oia i faaohipa i te mau Papai. (Ohipa 17:22-31) Hoê â huru no matou, ia poro matou, aita ta matou e Bibilia e aita atoa matou e faaohipa i te reira ia paraparau matou i te taata.

 Te haamanaˈo ra Isabel: “E parau na matou i te taata e tia matou no te hoê taiete no te haapii i te taata ia taio. E pinepine, e faaohipa na vau i te mau tumu parau o te A ara mai na! aita i faahitihia i te mau tumu parau Bibilia. E ia hinaaro te fatu fare e ite hau atu â no nia i te Atua? I muri iho, e faaite na matou i te parau mau Bibilia ia ratou. Te faataa ra Aurora: “No te mea aita ta matou e Bibilia, e tamau aau na matou e rave rahi irava Bibilia.” E anaanatae atoa na te fatu fare ia faaohipa matou i ta ratou iho Bibilia.

 Ua ineine matou i te faataa i te feia o te ui mai, ua haamanahia anei ta matou ohipa. (Philipi 1:7) Ua tauturu rahi mai te parau faatia haamanahia e te hau. a Te haamanaˈo ra María: “Te vai noa ra ia matou te parau tiaraa tarimahia e te papai parau no te mau ohipa ěê.” Te faataa ra Samuel: “Ia tapea te feia mana ia matou, e ia ani mai eaha ta matou e rave ra, e faaite atu matou i ta matou parau tiaraa.”

 Ua tauturu mai ta matou parau tiaraa i mua i te patoiraa. Ei hiˈoraa, te faataa ra o Jesús o tei tavini i Jalisco: “I 1974, ua afai te hoê nahoa taata arataihia e te hoê perepitero, ia ˈu e te tahi hoa faaipoipo Ite no Iehova i te feia mana o tera vahi no te tapea i ta matou ohipa. Ua faaite matou i ta matou parau tiaraa i te feia mana, e ua mǎrû mai te taata. I muri aˈe ua paruruhia matou, e ua nehenehe ïa matou e tauturu i te taata tei anaanatae o tera vahi. I teie mahana, e rave rahi amuiraa i roto i tera oire.”

 Ei taatiraa tivira no te haapii i te taata, ua haapii ïa matou i te taata ia taio ma te tamoni ore. b Te parau ra Ariel: “E taime tano teie no te rave i teie faanahoraa. I tera roaraa matahiti, e rave rahi taata aita i haere i te haapiiraa, tera râ, e hinaaro rahi to ratou e taio i te Bibilia. Ua haapii ïa matou ia ratou ia taio e ia papai, e tau taime i muri iho, e rave rahi o te haapii i te Bibilia e o matou.”

 Te haamanaˈo ra Ruth: “I te taime a haamata ˈi ratou i te taio, aita hoê aˈe mea i tapea ia ratou. Ua haafaufaa ratou i teie ite e ua oaoa roa ratou. Ua ite roa ïa matou i to ratou nuuraa i mua i te pae varua.”

 I te area matahiti 1943 e 1993, to te mau Ite no Iehova haamauraa i te hoê taatiraa tivira no te haapii i te taata ma te tamoni ore. I tera area matahiti, ua tauturu matou hau atu 127 000 taata ia haapii i te taio e ua hau atu 37 000 taata o te haamaitai atu â i ta ratou taioraa e papairaa. Ua haapopou te mau tia a te hau ia matou no ta matou i rave no te haapii i te taata ia taio. (Roma 13:3) Ei hiˈoraa, i 2010 ua haamauruuru mai ratou no ta matou “i rave no te haapii i te taata ia taio i tera roaraa matahiti. Tautururaa i na tausani taata no Mehiko ia haamaitai i to ratou oraraa i Mehiko e na tera mau vahi atoa.”

 Ia au i ta matou parau haamanaraa, ua faanaho matou i ta matou vahi putuputuraa ei piha haapiiraa no te haapii i te taata. I reira ïa matou e faatupu ai i ta matou mau putuputuraa e e haapii ai i te taata ia taio.

 Te faataa ra Ángel: “E pinepine, tei te fare o te mau taeae teie mau piha. E rave rahi o ratou e ere i te mea navai i te pae materia. Ua faahiahia na vau ia ratou. Ua ineine ratou i te ora i te hoê vahi nainai o to ratou fare, no te vaiiho i te tahi tuhaa o to ratou fare no te putuputuraa.”

 Mea titauhia tera huru haapaeraa. No te mau putuputuraa a te amuiraa, te haamanaˈo ra o Ángel: “I te tahi mau taime, no te rahi o te taata e tia noa na te rahiraa o matou i rapaeau. E hiˈo na matou na te haamaramarama no te horoa i ta matou pahonoraa. Tera râ, ua oaoa noa matou i te mau putuputuraa.”

 Ia ore te fifi e tupu mai, aita matou e himene aore ra e pure haapuai i ta matou putuputuraa. Te haamanaˈo ra Edmundo: “I roto i te oreroraa parau no te taata atoa, e haafaufaa na te taeae orero i te mau tuhaa faufaa o te aˈoraa Bibilia no te tauturu i te feia e faaroo ra ia haamaitai atu â i to ratou oraraa.” Taeraa i te hoê taime, aita matou i faaohipa faahou i te iˈoa o te mau buka o te Bibilia. Nafea te mau irava e faahitihia ˈi? Te horoa mai ra Manuel i te hoê hiˈoraa: “Aita matou e faahiti i te pene 21 o te Apokalupo, irava 3 e te 4, e parau na matou mai teie: ‘Buka 66, 21, 3 e te 4.’” Te parau atoa ra Moïse te tahi atu Ite no Iehova: “Te auraa e titauhia ia matou ia tamau aau i te mau numera o te tuati i te iˈoa o te buka o te Bibilia no te ite mai i te mau irava.”

 I te rahiraa o te taime, te faanahoraa i ravehia i Mehiko, tera atoa i ravehia na te ao taatoa. Noa ˈtu ua taotiahia ta matou haamoriraa, mea papu te mau haamaitairaa a Iehova. I 1943, i to matou haamanaraa ia matou ei taatiraa tivira no te haapii i te taata, te vai ra 1 565 feia poro i Mehiko. I 1993, ua haamanahia matou ei haapaoraa. I tera matahiti, ua naea te faito o te feia poro i nia 366 177. Ua maraa faahou te numera, maoti te ohipa ta te feia poro i rave. I 2021, ua maraa te numera o te feia poro i Mehiko i nia 864 633. Eaha te haapiiraa e huti mai i teie aamu?

 Faatano ia tupu anaˈe te fifi. I Mehiko, maoti tera haamanaraa i nehenehe ai matou e rave i ta matou ohipa i tera roaraa 50 matahiti. Te faataa ra Mario: “I te tahi mau taime, e uiui na vau no te aha aita ta matou e nehenehe e fanaˈo i te hoê â faanahoraa e te feia e ora ra i roto i te tahi atu fenua. Tera râ, aita vau i faaroo aˈenei i te taata e amuamu i te mau aratairaa a te faanahonahoraa. Ua tiaturi noa matou e te aratai ra Iehova i to ˈna nunaa. No reira, ua auraro noa matou.”

 Tamau i te rave i ta Iehova ohipa. Te faataa ra Guadalupe: “No te rahi o ta matou ohipa pororaa, aita ˈtura matou e haapeapea no te tahi atu mau mea. Ua oaoa roa matou i te tavini ia Iehova. No matou, tera te ohipa faufaa roa ˈˈe.”

 Vai piri i te mau hoa Kerisetiano. Te faataa ra Anita: “No te mau mea ta matou e ore e nehenehe e rave i te piha haapiiraa no te haapii i te taata, mai te himeneraa i te mau himene arueraa, e rave na matou i te reira i ǒ matou. Ua vai hoê noa matou e mea pinepine matou i te rave i te taime e te tahi atu. E i roto i ta matou putuputuraa, mea au roa na matou e paraparau no te mau ohipa o te faaitoito ia matou.”

 Teie ta Florentino i parau: “Ia feruri au i tera roaraa matahiti, pauroa te mau ohipa i ravehia, e fa to te reira. E ua haapii matou i te tahi mea faufaa mau. No ˈu, noa ˈtu te mau patoiraa no ta matou ohipa, ua aratai Iehova i te mau mea atoa.”