I te 21 no Atopa 1940 i Niu Zelani, ua parauhia no nia i te mau Ite no Iehova e e faanahonahoraa orure hau e mea atâta ratou no te huiraatira. Noa ˈtu te mau fifi rahi ta ratou i faaruru i muri aˈe i tera faahaparaa teimaha, aita te mau Ite no Iehova i haaparuparu. Ei hiˈoraa, ua tamau ratou i te putuputu no te haamori i te Atua noa ˈtu e nehenehe ratou e hamani-ino-hia e e tapeahia e te feia mana.

 Teie ta Andy Clarke e haamanaˈo ra. I taua taime ra, e ere o ˈna i te Ite no Iehova e ua faaipoipo o ˈna ia Mary, hoê Ite no Iehova. Ua ite o ˈna i te hinaaro papu o ta ˈna vahine i te tamau i te haere i te mau putuputuraa noa ˈtu te patoiraa. Ua riaria o ˈna e e tapeahia ta ˈna vahine a putuputu ai. Noa ˈtu aita o ˈna i matau i te na reira, ua haamata o Andy i te haere na muri ia Mary e ua parau o ˈna ia ˈna: “Mai te peu e tapea ratou ia oe, e tapea atoa ïa ratou ia ˈu!” Mai reira mai, ua haere o Andy i te mau putuputuraa atoa na muri i ta ˈna vahine. I muri iho, ua bapetizohia o ˈna ei Ite no Iehova. Ua faaite o Mary i te itoito rahi i mua i te hamani-ino-raa e tera atoa ta e rave rahi Ite no Iehova i rave i Niu Zelani i te piti o te Tamaˈi rahi.

 I te hoê mahana, ua tapea te mau mutoi ia John Murray a haere ai o ˈna i tera e tera fare no te poro. E 78 matahiti ïa to ˈna i taua taime ra. Ua faahapa te tiripuna ia ˈna i te apitiraa i roto i te mau ohipa a te hoê faanahonahoraa orure hau. E rave rahi atu â Ite no Iehova tei afaihia i mua i te tiripuna. Ua faautuahia vetahi ia aufau i te hoê tino moni e ua tapeahia te tahi atu e 3 avaˈe i te maoro.

 Aita te mau Ite no Iehova i rave i te tau faehau no te mea aita te reira e tu ra i ta ratou i haapii i roto i te Bibilia. (Isaia 2:4) Ei faahopearaa, ua faaruru ratou i te hamani-ino-raa i te tau tamaˈi inaha ua faahepohia e rave rahi o ratou ia apiti i te ohipa faehau. Aita râ te mau Ite no Iehova i na reira. Ua tapeahia e 80 tiahapa Ite no Iehova i te roaraa o te tamaˈi. I reira, noa ˈtu te mau hamani-ino-raa e te toetoe rahi, ua tamau teie mau taeae i te haamori ia Iehova ma te oaoa.

 Aita teie mau Ite no Iehova i te fare tapearaa i haamâuˈa i to ratou taime. Ua rave oioi ratou i te mau faanahoraa no ta ratou haamoriraa. Ua haamau ratou i te hoê amuiraa, e te mau putuputuraa tamau. Oia atoa i te ohipa pororaa i te mau taata i te fare tapearaa. Ua faatia-atoa-hia i te mau Ite no Iehova ia rave i te mau tairururaa i te tahi mau fare tapearaa e i raro aˈe i te hiˈopoaraa a te hoê tiai. Ua haapii te tahi mau taata mau auri i te parau mau Bibilia i te fare tapearaa e ua bapetizohia ratou i reira.

 Ua tapeahia o Bruce, te tamaroa apî aˈe o Mary raua Andy, faahitihia na mua ˈˈe. Ua hiˈo râ o ˈna i tera tupuraa mai te hoê ravea no te ite hau atu â no nia i te Atua. Te haamanaˈo ra o ˈna: “No ˈu, i te fare tapearaa, e au ra ua haere au i te fare haapiiraa no te mea ua fanaˈo vau i te mau tauaparauraa hohonu e te mau taeae paari aˈe e ua au roa vau i ta ˈu i haapii.”

 I 1944, ua faaoti te faatereraa i te faatiamâ i te tahi o te feia mau auri. Tera râ, ua patoi te mau tia faehau no te mea ua papu ia ratou e ia faatiamâhia te mau Ite no Iehova, e tamau ratou i te paraparau ia vetahi ê no nia i to ratou faaroo. Te faaite ra te hoê vea: “E nehenehe tatou e tapea maoro aˈe ia ratou no te patoi i ta ratou haamoriraa. Eita roa ˈtu râ te reira e turai ia ratou ia haapae i to ratou faaroo.”

 No te mea ua paraparau-rahi-hia no nia i te patoiraa i te mau Ite no Iehova, e rave rahi taata tei hinaaro e ite atu â no nia i te mau Ite no Iehova. E rave rahi tei taa e ere te mau Ite no Iehova i te mea atâta no te huiraatira. Ua haapii ratou e e mau Kerisetiano maitai e te hau ratou. Ei faahopearaa, ua maraa te numera o te mau Ite no Iehova. I 1939, e 320 ratou e i 1945, e 536 ïa ratou!

 I te hoê taime, ua farii vetahi tia mana feruriraa aifaito e mea parau-tia ore te patoiraa ta te mau Ite no Iehova i ite. I to te hoê taeae faahaparaa no te mea ua poro o ˈna, teie ta te haava i parau: “Ia au i to ˈu manaˈo e to ˈu taaraa i te ture, e ere roa ˈtu i te mea ino ia horoa i te mau neneiraa Bibilia.” Aita te taeae i faautuahia.

 Ua hope te patoiraa i te mau Ite no Iehova i te hopea o te tamaˈi. I taua taime ra, ua faaoti papu atu â te mau Ite no Iehova i te tauturu i te taata ia haapii no nia i te Faatereraa arii a te Atua. I 1945, teie te rata ta te amaa i papai i te mau amuiraa atoa i Niu Zelani: “A paraparau ma te tura, te hamani maitai e te oaoa i te mau taata atoa. Eiaha e faaô ia outou i roto i te mau tatamaˈiraa e te mau tumu parau mârô. A haamanaˈo e te tiaturi papu nei te mau taata ta tatou e farerei i ta ratou haapaoraa e haapii ra. . . . E ‘mamoe’ a te Fatu e rave rahi o ratou e e mea tia ia tatou ia aratai ˈtu ia Iehova e i ta ˈna Faatereraa arii.”

 I teie nei, te tamau ra te mau Ite no Iehova i Niu Zelani i te faaite i te poroi Bibilia i te mau taata e ora ra i te fenua e te mau ratere. I te hoê mahana, tau hora noa te maoro, ua paraparau e 4 Ite no Iehova i Turangi i 67 ratere no 17 fenua!

 Papu maitai, ua farii te nunaa i Niu Zelani e e mau Kerisetiano hau e te itoito te mau Ite no Iehova e te haafaufaa rahi nei ratou i te mau pue parau mau Bibilia i roto i to ratou oraraa. E bapetizohia 100 taata ei Ite no Iehova i te matahiti hoê. I 2019, ua tavini ma te oaoa hau atu i te 14 000 Ite no Iehova i te pae apatoa o te fenua.