A VAI ARA!

Te faahuehueraa poritita: Eaha ta te Bibilia e parau ra?

FAAROO NA ROTO TE REO

Te rahi noa ˈtu ra te haavîraa uˈana i nia i te mau tia poritita, e ua huru ê roa te taata i te reira.

Ei hiˈoraa, i Mehiko, ua haapohehia e 39 tia poritita. Ua tupu atoa te tahi mau ohipa ino i tera fenua o tei haafifi i te tau maitiraa i te matahiti 2023-2024.
Aita i maoro aˈenei, i Europa, ua tupu e rave rahi faahuehueraa poritita, e i te 15 no Me 2024 ua tamatahia i te haapohe i te faatere hau nui no Slovaquie.
Ua huru ê atoa te taata i Marite, inaha ua tamatahia i te haapohe i te peretiteni tahito o Donald Trump i te 13 no Tiurai 2024.

No te aha teie haavîraa uˈana e tupu ai? E hopea anei to te reira? Eaha ta te Bibilia e parau ra?

Ua tohuhia e amahamaha te taata

Ua tohu te Bibilia e i to tatou nei tau, oia hoi i “te mau mahana hopea,” e iria e e haa te taata ma te tano ore.

“Ia tae i te mau mahana hopea, e tau ino mau ïa e te fifi ia faaruru. E mauruuru ore [te taata], e taiva, . . . e etaeta, . . . e iria, . . . e haavare, e farii ore i te aˈoraa, e faaoru.”—Timoteo 2, 3:1-4.

Ua tohu atoa te Bibilia e orure hau te taata i te faatereraa e e tupu te mau faahuehueraa poritita. (Luka 21:9, nota) Eita râ teie mau ohipa ino e vai noa e a muri noa ˈtu.

Te hopea o te faahuehueraa poritita

Te faataa ra te Bibilia e mono te Atua i te mau faatereraa arii atoa i te hoê faatereraa arii i te raˈi.

“E haamau te Atua o te raˈi i te hoê faatereraa arii . . . e haamou oia i tera mau faatereraa arii atoa, e o ˈna anaˈe te vai mai e a muri noa ˈtu.”—Daniela 2:44.

E tahoê mau â te Faatereraa arii a te Atua i te taata atoa e e faatupu oia i te hau ati aˈe te fenua.

O Iesu Mesia te Faatere. I piihia na oia te “Huiarii o te hau,” e e haapao oia ia vai noa te hau e a muri noa ˈtu.—Isaia 9:6, 7.
I teie mahana, te haapii ra te feia e hinaaro ra e ora i raro aˈe i ta ˈna faatereraa arii e nafea ia faatupu i te hau. Te na ô ra te Bibilia: “E tupai ratou i ta ratou mau ˈoˈe ei auri arote e ta ratou mau omore ei tipi tope raau. E ore te hoê nunaa e amo i ta ratou ˈoˈe i nia i te tahi nunaa, e ore atoa ratou e haapii faahou i te tamaˈi.”—Isaia 2:3, 4.

No te ite atu â, a taio i te tumu parau “Eaha ta te Faatereraa arii a te Atua e rave?” e a mataitai i te video Eaha te Basileia o te Atua?