I te 24 no Tenuare 2023, ua parau te mau aivanaa e, i nia i te uati o te haavaraa hopea, a ua piri roa mai te hora 12, oia hoi te hopea o teie ao.

•   “Ia parauhia ‘te uati o te haavaraa hopea,’ o te mau fifi atoa ïa itehia na te ao nei o te aratai ra i te huitaata i te haamouraa. No te mau aivanaa, i te mahana piti ra, ua piri atu â tatou i teie hora, no te tamaˈi hoi i Ukraine, te paura atomi e te mau fifi natura.”—AFP International Text Wire.

•   “I te mahana piti, ua faaite te mau aivanaa e, e 90 tetoni e toe ra hou te hora 12 i nia i ‘te uati o te haavaraa hopea.’ Ua piri roa ˈtu â ïa tatou ia Aramagedo.”—ABC News.

•   “Ua faaara te mau aivanaa na te ao nei e, na te taata iho e haamou roa i te huitaata.”—The Guardian.

 Fatata anei te hopea o te huitaata e o te fenua? E mǎtaˈu anei tatou no te ohipa e tupu a muri aˈe? Eaha ta te Bibilia e parau ra?

 Ia au i te Bibilia, “e vai noa . . . te fenua e a muri noa ˈtu” e “e parahi [te taata] i nia iho e a muri noa ˈtu.” (Koheleta 1:4; Salamo 37:29) Eita ïa e haere i te taata ia haamou roa i te fenua aore ra ia faariro i te fenua ei vahi aita faahou e nehenehe ora.

 Tera râ, te faaite ra te Bibilia no nia i te hoê hopea. Ei hiˈoraa, te parauhia ra e fatata “teie nei ao i te mou.”—Ioane 1, 2:17.

•   No te ite eaha ta te Bibilia e parau ra no nia i te hopea o teie ao, a taio i te tumu parau “Fatata anei te hopea o teie nei ao?”

•   No te ite eaha ta te Bibilia e parau ra no nia i te mau tupuraa e tiai mai ra, a taio i te tumu parau “Afea te hopea o teie ao e tae mai ai?”

 E nafea te Bibilia e nehenehe ai e tauturu ia tatou ia tapea noa i te hoê huru feruriraa maitai noa ˈtu te mau fifi e tupu ra?

•   Te horoa ra te Bibilia i te aˈoraa tano maitai. (Timoteo 2, 3:16, 17) Ei hiˈoraa, a taio i te tumu parau “E nafea ia ore ia haapeapea rahi roa?” no te ite e nafea te Bibilia e tauturu ai ia tatou ia tapea noa i te hoê huru feruriraa maitai noa ˈtu te mau fifi o te oraraa.

•   Te horoa ra te Bibilia i te hoê tiaturiraa papu no a muri aˈe. (Roma 15:4) Te faataa-maitai-hia ra eaha te tiai ra ia tatou i teie nei e a muri aˈe, e tauturu te reira ia tatou ia tamau i te tiaturi noa ˈtu eaha te tupu ra na te ao.

 No te ite atu â eaha ta te Bibilia e parau ra, te titau manihini nei matou ia outou ia haamata i te hoê haapiiraa Bibilia e te hoê taata haapii. Mea tamoni ore te reira.