E moni rahi tei haamâuˈahia no te tamaˈi.

•   “Te haamâuˈaraa no te nuu faehau na te ao nei, ua naea 2 200 miria tara i roto i te mau tamaˈi e rave rau.”—The Washington Post, 13 no Fepuare 2024.

 Noa ˈtu ua haamâuˈa-rahi-hia te moni, te vai atoa râ te tahi atu pau. E rave na i te hoê hiˈoraa: Te tamaˈi i Ukraine.

•   Faehau. Ua parauhia, fatata 500 000 faehau tei pohe aore ra tei pepe mai te haamataraa te tamaˈi a piti matahiti i teie nei.

•   Huiraatira. Ia au i te Hau amui, ua hau atu 28 000 taata tei pohe aore ra tei pepe. Tera râ, ua parau te hoê tia a te Hau amui: “Eita e nehenehe e numera te rahiraa taata tei ere i to ratou nohoraa no te tamaˈi.” a

 Te rahiraa taata o te mauiui ra no te tamaˈi e te mau aroraa, mea huru rahi atoa.

•   114 mirioni. Te rahiraa taata tei faarue i to ratou fenua no te tamaˈi e te haavîraa uˈana na te ao nei i Tetepa 2023.

•   783 mirioni. Te rahiraa taata te pohe poia noa ra. “O te mau aroraa te tumu matamua o te pohe poia i te mea e 70 i nia i te hanere o te mau taata o te pohe poia ra na te ao nei i te mau vahi te tupu ra te tamaˈi e te haavîraa uˈana.”—Faanahonahoraa no nia i te opereraa maa na te ao.

 E ore anei te tamaˈi i te hoê mahana? E nehenehe anei e tiaturi e tupu te hau? Te vai ra anei te hoê tau aita e veve faahou e e oaoa te taata i te mau maitai o te fenua e e navai te maa? Eaha ta te Bibilia e parau ra?

 Ua tohu te Bibilia i te hoê tamaˈi na te ao, ma te faataa-taipe-hia mai te hoê taata faahoro puaahorofenua.

•   “Ite atura vau i te tahi atu puaahorofenua, mea uteute, e ua faatiahia tei parahi ra i nia iho ia faaore i te hau i nia i te fenua, ia haapohe hoi te taata te tahi i te tahi. E ˈoˈe rahi tei horoahia na ˈna.”—Apokalupo 6:4.

 I muri i teie taata faahoro puaahorofenua, e piti atu â puaahorofenua o tei faahohoˈahia i te oˈe e te pohe no te maˈi pee e te tahi atu â mau tumu. (Apokalupo 6:5-8) No te haapii hau atu â no nia i teie parau tohu Bibilia e no te aha ia papu ia tatou e e tupu te reira i to tatou tau, a taio i te tumu parau “Na taata faahoro puaarehenua: Te auraa no tatou.”

 Fatata eita te mau faufaa o te ao taatoa e faaohipa-faahou-hia no te tamaˈi. Tera râ, e ere maoti te tutavaraa a te taata. Te parau ra te Bibilia:

•   ‘E faaore te Atua i te mau tamaˈi ati aˈe i te fenua.’—Salamo 46:9.

•   E faaore te Atua i te mauiui ta te tamaˈi e faatupu. “E tamǎrô oia i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”—Apokalupo 21:4.

•   E hopoi mai te Atua i te hau no te taata atoa. “E parahi to ˈu nunaa i te hoê vahi hau e te papu, i te nohoraa papu e te faaearaa hau.”—Isaia 32:18.

 Ia au i te mau parau tohu Bibilia, te haapapu ra te mau tamaˈi e te tahi atu mau tupuraa e itehia ra i teie mahana e te fatata mai ra te taime e itehia te hau.

 Nafea te Atua e hopoi mai ai i te hau no a muri aˈe? E na reira oia maoti ta ˈna faatereraa i te raˈi aore ra Faatereraa arii. (Mataio 6:10) No te ite eaha teie Faatereraa arii e eaha te auraa o te reira no oe, a mataitai i te video Eaha te Basileia o te Atua?