Aita i maoro aˈenei, ua faaite te feia faatere, te mau aivanaa e te feia aravihi i te pae roro uira i to ratou manaˈo no nia i te haaraa o te porotarama roro uira hamanihia no te feruri e haa mai te taata. Ua tu to ratou manaˈo no nia i te faufaaraa o te reira, te haapeapea atoa râ ratou e nafea te reira e faaohipahia ˈi ma te tano ore.

•   “E ravea apî faufaa mau te reira i teie mahana o te nehenehe e haamaitai i te oraraa o te taata . . . E i te hoê â taime, e nehenehe atoa te reira e haafifi i te parururaa, i te tiaraa o te taata e to ratou oraraa e i te tiaturiraa o te mau taata i roto i te faatereraa manahune.”—Kamala Harris, mono peretiteni no Marite, 4 no Me 2023.

•   Ua papai te hoê pǔpǔ taote nunaa rau e te mau aivanaa aravihi i te pae o te ea arataihia na te taote Frederik Federspiel i roto i te hoê tumu parau piahia i te 9 no Me 2023 i roto i te BMJ Global Health: a “Noa ˈtu te horoa nei teie porotarama roro uira hamanihia no te feruri e haa mai te taata i te mau ravea i te pae rapaauraa, te vai atoa râ e rave rahi fifi no te ea e te maitai o te taata.”

•   “Ua riro aˈena teie ravea ei mauhaa no te haaparare i te mau parau haavare. Fatata te reira e riro mai ei fifi no te ohipa. I te tahi atu vahi, te haapeapea nei te feia aravihi i te pae roro uira e riro te reira ei haafifiraa no te huitaata.”—The New York Times, 1 no Me 2023.

 Na te tau e faaite mai e faaohipa-maitai-hia anei teie ravea apî aore ra aita. Eaha ta te Bibilia e parau ra?

 Te faaite ra te Bibilia no te aha aita te mau taata e nehenehe e haapapu e faaohipa-noa-hia te mau ravea apî ma te tano.

1.  1. Noa ˈtu e opuaraa maitai ta te taata, aita ratou e nehenehe e ite oioi i te fifi o ta ratou mau haaraa.

   •   “Te vai ra te tahi eˈa mea maitai i te manaˈo o te hoê taata, i te hopea râ, e aratai te reira i te pohe.”—Maseli 14:12.

2.  2. No te ohipa ta te hoê taata e rave, aita to ˈna e mana i nia te taata o te faaohipa maitai aore ra aita i te reira.

   •   “E vaiiho vau [i ta ˈu ohipa] no te taata no muri mai ia ˈu. E o vai tei ite e riro mai anei oia ei taata paari aore ra ei maamaa? Na ˈna hoi e fatu i te mau mea atoa ta ˈu i rohi e i feruri ma te paari ia noaa mai i raro aˈe i te mahana.”—Koheleta 2:18, 19.

 Te faaite ra teie mau haapeapearaa e titauhia te aratairaa a to tatou Atua poiete.

 Te fafau ra to tatou Atua poiete eita oia e vaiiho i te taata aore ra te tahi ravea apî ta te taata i hamani no te haamou i te huitaata.

•   “E vai noa . . . te fenua e a muri noa ˈtu.”—Koheleta 1:4.

•   “E fatu te feia parau-tia i te fenua, e e parahi ratou i nia iho e a muri noa ˈtu.”—Salamo 37:29.

 Na roto i te Bibilia, te horoa ra to tatou Atua poiete i te mau aratairaa ia fanaˈo tatou i te hoê hau mure ore. No te ite atu â no nia i ta te Bibilia e parau ra, a taio i te mau tumu parau “E nafea ia fanaˈo i te hoê a muri aˈe papu?” e “Te hoê tiaturiraa papu no te hoê oraraa maitai aˈe.”