No te tamaˈi i Ukraine e te tauiraa o te ahuaraˈi, te iti noa ra te tauturu i te pae o te maa. Te itehia ra iho â teie fifi i te mau fenua e ere i te mea ohie no e rave rahi taata ia noaa mai te maa.

•   “Ua haafifihia te hamaniraa e te opereraa maa na te tamaˈi, te tauiraa o te ahuaraˈi, e te maraaraa o te uira e te vai atu â.”—António Guterres, tia mana no te Hau amui, 17 no Tiurai 2023.

•   “Te parau ra te mau aivanaa, no te mea aita o Rusia e turu faahou ra i te faaotiraa e hopoi i te huero maa na te ao nei, e uˈana atu â te oˈe na te ao nei, a maraa ˈtu ai te moni i te mau fenua mai ia Afirika no apatoerau e Hitia o râ no ropu.”—Atalayar.com, 23 no Tiurai 2023.

 A hiˈo eaha ta te Bibilia e parau ra no nia i te oˈe e te a muri aˈe.

•   Ua tohu Iesu: “E aro . . . te tahi nunaa i te tahi atu nunaa e te tahi faatereraa i te tahi atu faatereraa, e e tupu te oˈe.”—Mataio 24:7.

•   I roto i te buka Apokalupo, te faahitihia ra e maha taata faahoro puaahorofenua. E faahohoˈahia hoê o ratou i te tamaˈi. Na muri ia ˈna, te tere ra te taata faahoro puaahorofenua ereere o te faahohoˈahia ra i te oˈe, oia hoi, te hoê tau e taranihia te maa aore ra e maraa ˈtu â te moni o te maa. “Ite atura vau e inaha, te hoê puaahorofenua ereere, e e faito tei te rima o tei parahi ra i nia iho. Faaroo atura vau mai te hoê reo . . . i te parauraa: ‘Hoê kilo sitona, hoê ïa denari. E toru kilo kerite, hoê ïa denari.’”—Apokalupo 6:5, 6.

 Te tupu ra teie mau parau tohu i to tatou nei tau, oia hoi, te tau ta te Bibilia e pii ra “te mau mahana hopea.” (Timoteo 2, 3:1) No te ite atu â no nia i “te mau mahana hopea” e na maha taata faahoro puaahorofenua o te Apokalupo, a mataitai i te video Ua taui te ao mai te matahiti 1914 e a taio i te tumu parau “Na taata faahoro puaarehenua, te auraa no tatou.”

•   I roto i te Bibilia, te vai ra te mau aˈoraa î i te paari o te nehenehe e tauturu ia tatou ia faaoromai tamau i te mau tupuraa fifi, mai te maraaraa o te moni maa e te oˈe. No te tahi mau hiˈoraa, a taio i te tumu parau “E nafea ia tarani i ta oe moni?.”

•   I roto i te Bibilia, te horoa-atoa-hia ra te tiaturiraa e e maitai mai te oraraa. Te fafauhia ra e “e rahi te huero maa i nia i te fenua” e e fanaˈo te taata atoa i te rahi o te maa. (Salamo 72:16) No te ite atu â no nia i te tiaturiraa ta te Bibilia e horoa ra no a muri aˈe e no te aha outou e nehenehe ai e tiaturi i te reira, a taio i te tumu parau “Te hoê tiaturiraa papu no te hoê oraraa maitai aˈe.”