Ua hope te rururaa COP27 a te Hau amui no nia i te mau tauiraa e titauhia no te maitai o te fenua i te Tapati 20 no Novema 2022. Noa ˈtu ua tarimahia i te hoê faaauraa no te horoa i te tauturu i te mau tuhaa fenua veve o tei fifi roa no te mau tauiraa i itehia i nia i te fenua, e rave rahi tei farii e ere na te reira e faatitiaifaro mau i te fifi.

•   I te 19 no Novema 2022, ua parau António Guterres, papai parau rahi o te Hau amui: “Te oaoa nei au e ua ravehia te faaotiraa no te faataa i te tahi tino moni no tei roohia i te fifi no te mau tauiraa i itehia i nia i te fenua, eita râ te reira e navai, mea ru noa â ia ravehia te tahi mau faanahoraa papu ia ore to tatou paraneta ia mou.”

•   I te 20 no Novema 2022, ua parau Mary Robinson, Peretiteni tahito o Irelane, mero tahito o te Tomite no te tiaraa o te taata a te Hau amui: “Fatata te hoê ati rahi i te tupu i nia i to tatou fenua e e ino roa te oraraa o te taata tataitahi.”

 Te haapeapea mau nei te feia apî no te maitai o to tatou paraneta. E nehenehe mau anei râ te mau faatereraa e rave amui i te tauiraa? Eaha ta te Bibilia e parau ra?

 Te faaite ra te Bibilia noa ˈtu e manaˈo maitai e e tutava te feia mana eita ratou e nehenehe e faatitiaifaro i te tupuraa o te fenua. Na te aha e haapapu ra? Teie e piti tumu:

•   “Eita te tahi mea fefe e nehenehe e faaafarohia.”—Koheleta 1:15.

   Te auraa: Eita te mau faatereraa a te taata e nehenehe e rave i te mau mea atoa ta ratou e opua no te mea aita te taata i hamanihia no te faatere ia ratou iho. (Ieremia 10:23) Noa ˈtu e tutava amui te mau faatereraa, eita iho â e haere ia ratou ia faatitiaifaro i te mau fifi atoa na te ao nei.

•   “E haapao noa te taata ia ratou iho, e nounou i te moni, . . . e etaeta.”—Timoteo 2, 3:2, 3.

   Te auraa: Mai ta te Bibilia i tohu e rave rahi i teie mahana o te haapao noa ia ratou iho e o te ore e farii i te ohipa amui no te maitai o vetahi ê.

 Aita te a muri aˈe o to tatou paraneta i roto i te rima o te mau faatereraa taata. Ua horoa râ te Atua i te ravea na roto i te arii puai ta ˈna i maiti ra o Iesu Mesia. Teie ta te Bibilia e parau ra no ˈna:

•   “E vai noa te faatereraa i nia i to ˈna tapono. E topahia to ˈna iˈoa o Aˈo faahiahia, Atua puai, Metua mure ore, Huiarii o te hau.”—Isaia 9:6.

 O Iesu te Arii o te Basileia o te Atua aore ra o te Faatereraa arii i te raˈi. (Mataio 6:10) E mana e e paari to ˈna, e te hinaaro ra oia i te maitai no to tatou fenua e no te feia e parahi ra i nia iho. (Salamo 72:12, 16) I raro aˈe i ta ˈna faatereraa, e haamouhia te feia e “tuino ra i te fenua” e e maitai faahou mai to tatou nei paraneta.—Apokalupo 11:18; Isaia 35:1, 7.

 No te ite atu â no nia i te ravea hoê roa no to tatou paraneta, a taio i te tumu parau “Te fenua e to ˈna a muri aˈe: Eaha ta te Bibilia e parau ra?”