Deuteronomi 10:1-22
10 “I taua taime ra, na ô maira Iehova ia ˈu: ‘A tarai na oe e piti pǎpǎ ofai mai na pǎpǎ ofai matamua,+ e a pauma mai ia ˈu nei i nia i te mouˈa. E hamani atoa oe i te hoê afata raau no oe.
2 E papai au i nia iho i na pǎpǎ i te mau parau i vai na i nia i na pǎpǎ matamua, tei parari ia oe, e e tuu oe i te reira i roto i te afata.’
3 Hamani ihora ïa vau i te hoê afata i te raau sitima, tarai ihora vau e piti pǎpǎ ofai mai na pǎpǎ ofai matamua e pauma aˈera vau i nia i te mouˈa e na pǎpǎ ofai e piti i roto i to ˈu rima.+
4 Papai ihora Iehova i nia iho i na pǎpǎ i te mau parau ta ˈna i papai na mua ˈtu,+ na Ture Ahuru,*+ ta Iehova i parau ia outou i nia i te mouˈa na roto mai i te auahi+ i te mahana rururaa,*+ e horoa maira oia i te reira ia ˈu.
5 Fariu maira ïa vau, pou ihora mai nia mai i te mouˈa+ e tuu ihora i na pǎpǎ i roto i te afata ta ˈu i hamani, i roto e vai noa ˈi te reira, mai ta Iehova iho â i faaue ia ˈu.
6 “Faareva aˈera te ati Iseraela i muri iho mai Beerota Bene-iaakana i Mosera. I reira to Aarona poheraa e hunaraahia,+ e haamata ihora ta ˈna tamaiti o Eleazara i te tavini ei tahuˈa ei mono ia ˈna.+
7 Mai reira, faareva aˈera ratou i Gudagoda, e mai Gudagoda i Iotabata,+ te hoê fenua e tahe noa te pape.*
8 “I taua taime ra, faataa ê ihora Iehova i te opu o Levi+ no te amo i te afata o te faufaa a Iehova,+ no te tia i mua ia Iehova no te tavini ia ˈna, e no te haamaitai i te nunaa i to ˈna iˈoa,+ mai ta ratou e rave ra tae roa mai i teie mahana.
9 No reira aita i horoahia to Levi fenua, aita ta ˈna e tuhaa e to ˈna mau taeae. O Iehova ta ˈna tuhaa, mai ta Iehova iho â to Atua i parau ia ˈna.+
10 Faaea ihora vau i nia i te mouˈa mai i te taime matamua, e 40 ao e 40 po,+ e faaroo maira Iehova ia ˈu i taua taime atoa ra.+ Aita ˈtura Iehova i hinaaro faahou e haamou ia oe.
11 Na ô maira Iehova ia ˈu: ‘A haere na mua i te nunaa, e a faaineine i te faareva, ia nehenehe ratou e tomo e e fatu i te fenua ta ˈu i horeo i to ratou mau tupuna e horoa no ratou.’+
12 “I teie nei, e Iseraela, eaha ta Iehova to Atua e titau mai ra ia oe?+ Teie noa ïa: ia mǎtaˈu ia Iehova to Atua,+ ia haere na to ˈna mau eˈa atoa,+ ia here ia ˈna, ia tavini ia Iehova to Atua ma to oe aau atoa e to oe ora* atoa,+
13 e ia auraro i te mau faaueraa e faatureraa a Iehova ta ˈu e faaue nei ia oe i teie mahana no to maitai.+
14 Inaha, na Iehova to Atua te raˈi, tae noa ˈtu te raˈi o te mau raˈi,* e te fenua e pauroa to nia iho.+
15 I to oe noa mau tupuna i faafatata mai ai Iehova e i faaite ai i to ˈna here, e ua maiti oia ia oe, to ratou huaai,+ mai rotopu i te mau nunaa atoa, mai i teie mahana.
16 I teie nei, a tamâ i* to outou aau+ e a faaea i te faaetaeta.*+
17 O Iehova to outou Atua te Atua o te mau atua+ e te Fatu o te mau fatu, te Atua rahi, puai, e te mǎtaˈuhia, o te ore e maitiiti i te taata+ e o te ore e farii i te peu peta.
18 E haava oia ma te parau-tia i te tamarii aita e metua tane* e te vahine ivi.+ Te here ra oia i te taata ê e noho ra i rotopu ia outou,+ a horoa ˈi i te maa na ˈna e te ahu no ˈna.
19 Ia here atoa outou i te taata ê e noho ra i rotopu ia outou, i parahi na hoi outou ei taata ěê i te fenua o Aiphiti.+
20 “O Iehova to Atua ta oe e mǎtaˈu, o ˈna ta oe e tavini,+ o ˈna ta oe e ati maite, e i to ˈna ora e horeo ai oe.
21 O ˈna ta oe e arue.+ O ˈna to Atua, tei rave no oe i tera mau ohipa maere atoa e te riaria ta to oe mata i ite.+
22 I te pouraa to oe mau tupuna i Aiphiti, e 70 ratou,+ e i teie nei ua faarahi Iehova to Atua ia oe mai te mau fetia o te raˈi te rahi.+
Nota i raro i te api
^ Heb: “na parau ahuru.”
^ Aore ra “o te amuiraa.”
^ Aore ra “tahora pape.”
^ Aore ra “te raˈi teitei roa ˈˈe.”
^ Heb: “a peritome i te iri i mua o.”
^ Heb: “e eiaha e faaetaeta faahou i to outou aˈî.”
^ Aore ra “te otare.”
