Deuteronomi 2:1-37
2 “Tia aˈera tatou e faareva ˈtura i te medebara na te eˈa e tae atu ai i te miti Uteute, mai ta Iehova iho â i parau mai ia ˈu,+ e haaati aˈera i te mouˈa Seira e rave rahi mahana.
2 Na ô maira Iehova ia ˈu:
3 ‘Mea maoro to outou haaatiraa i teie mouˈa. I teie nei, a tipuu i apatoerau.
4 A horoa i teie faaueraa i te nunaa: “E haere outou na pihai iho i te otia o to outou mau taeae, te huaai o Esau+ e parahi ra i Seira,+ e e mǎtaˈu ratou ia outou.+ A haapao maitai ïa.
5 Eiaha e aro* ia ratou, e ore hoi au e horoa no outou i te tahi tuhaa o to ratou fenua, noa ˈtu mai te tapuae avae te rahi, no te mea ua horoa vau i te mouˈa Seira no Esau ei fenua no ˈna.+
6 E horoa outou i te moni na ratou no te maa ta outou e amu, e e aufau outou i te pape ta outou e inu.+
7 Ua haamaitai hoi Iehova to outou Atua ia outou i roto i ta outou mau ohipa atoa i rave. Ua ite maitai oia i to outou ratereraa na tera medebara rahi. I tera na 40 matahiti, tei pihai iho Iehova to outou Atua ia outou, e aita outou i ere noa ˈˈe i te tahi mea.”’+
8 Haere atura ïa tatou na pihai iho i to tatou mau taeae, te huaai o Esau+ e parahi ra i Seira, na te atea ê i te eˈa o te Araba, ia Elata e ia Eziona-gebera.+
“I muri iho, tipuu aˈera tatou e ratere atura na te eˈa e tae atu ai i te medebara o Moabi.+
9 Na ô maira Iehova ia ˈu: ‘Eiaha e aro aore ra e tamaˈi i to Moabi, e ore hoi au e horoa i te tahi tuhaa o to ratou fenua no outou ia fatu outou, no te mea ua horoa vau ia Ala no te huaai o Lota+ ia fatu ratou.
10 (O te mau Emima+ tei ora i reira na mua ˈˈe, e nahoa rahi puai e te roa mai te ati Anaka.
11 I manaˈo-atoa-hia na e mai te ati Anaka+ te ati Repha,+ e i pii noa na te ati Moabi ia ratou Emima.
12 Na mua ˈˈe, o te ati Hori+ tei ora i Seira. Ua faaere râ te huaai o Esau ia ratou i to ratou fenua, ua haamou ia ratou e ua parahi i reira,+ mai ia Iseraela e na reira i te fenua o ratou te fatu, ta Iehova iho â e horoa no ratou.)
13 I teie nei, a haere i te tahi atu pae o te peho o Zereda.’ Haere atura ïa tatou i te tahi atu pae o te peho o Zereda.+
14 Te roaraa o to tatou haereraa mai Kadesa-barenea tae roa i te tahi atu pae o te peho o Zereda, e 38 ïa matahiti e ia mou pauroa te uˈi taatoa o te feia tamaˈi i rotopu ia tatou, mai ta Iehova iho â i horeo ia ratou.+
15 Tei nia iho ia ratou to Iehova rima no te haamou ia ratou mai rotopu ia tatou e ia mou roa ratou.+
16 “I te poheraa iho â pauroa te taata tamaˈi mai rotopu i te nunaa,+
17 paraparau faahou maira Iehova ia ˈu, a na ô ai:
18 ‘I teie mahana e haere oe na pihai iho i te tuhaa fenua o Moabi, oia hoi Ala.
19 Ia piri atu oe i te ati Amona, eiaha e hamani ino ia ratou, eiaha e imi hara ia ratou, e ore hoi au e horoa i te tahi tuhaa o te fenua o te ati Amona no oe ia fatu oe, no te mea ua horoa vau i te reira no te huaai o Lota ia fatu ratou.+
20 I parau-atoa-hia na taua fenua ra te fenua o te ati Repha.+ (I ora na te ati Repha i reira na mua ˈˈe, e i pii noa na te ati Amona ia ratou Zamazumima.
21 E nahoa rahi puai ratou e te roa mai te ati Anaka.+ Ua haamou râ Iehova ia ratou i mua i te ati Amona, o tei tiahi ia ratou, a parahi atu ai i reira.
22 Tera ta ˈna i rave no te huaai o Esau, e parahi ra i teie nei i Seira,+ i to ˈna haamouraa i te ati Hori+ i mua ia ratou, a nehenehe atu ai ratou e faaere ia ratou i to ratou fenua e e parahi i reira tae roa mai i teie mahana.
23 Area te ati Avima, i parahi na ratou i roto i te mau nohoraa tae roa i Gaza+ e ia haamou roa te ati Kaphatori,+ no Kaphatori* mai, ia ratou a parahi atu ai i reira.)
24 “‘A tia mai, e a haere i te tahi atu pae o te peho o Aranona.+ A hiˈo, ua tuu atu vau i to outou rima ia Sihona+ te ati Amori, arii no Hesebona. A fatu i to ˈna fenua, e a aro ia ˈna.
25 I teie mahana e haamata vau i te tuu i te riaria e te mǎtaˈu ia outou i nia i te mau nunaa atoa i raro aˈe i te raˈi o te faaroo i to outou parau. E horuhoru e e rûrû* ratou no outou aˈe.’+
26 “Tono atura ïa vau i te vea na te medebara o Kedemota+ ˈtu ia Sihona arii no Hesebona, ma teie mau parau hau:+
27 ‘A vaiiho na ia ˈu ia haere na to oe fenua. E na nia noa vau i te purumu e e ore au e tipuu i te pae atau aore ra i te pae aui.+
28 E amu noa vau i te maa e e inu noa vau i te pape ta oe e hoo mai ia ˈu. A vaiiho noa na ia ˈu ia haere na to oe fenua,
29 mai ta te huaai o Esau e parahi ra i Seira e ta te ati Moabi e parahi ra i Ala i na reira mai ia ˈu. E e na roto atu vau i te pape Ioridana e tae atu ai i te fenua ta Iehova to matou Atua e horoa mai nei no matou.’
30 Aita râ Sihona arii no Hesebona i vaiiho ia matou ia haere na to ˈna fenua, no te mea ua vaiiho Iehova to outou Atua ia ˈna ia haapaari+ e i to ˈna aau ia etaeta, no te tuu atu ia ˈna i to outou rima mai i teie mahana.+
31 “Na ô maira Iehova ia ˈu: ‘A hiˈo, ua haamata ê na vau i te tuu atu ia Sihona e to ˈna fenua ia outou ra. A haamata i te fatu i to ˈna fenua.’+
32 I to Sihona haereraa mai e to ˈna mau taata taatoa e aro ia tatou i Iahaza,+
33 tuu maira Iehova to tatou Atua ia ˈna ia tatou, a pau atu ai oia, ta ˈna mau tamaiti, e to ˈna mau taata taatoa ia tatou.
34 Haru atura tatou i to ˈna mau oire atoa i taua taime ra e haamou atura pauroa te oire, tae noa ˈtu te mau tane, vahine e tamarii. Aita roa ˈtu tatou i vaiiho i te tahi ia ora mai.+
35 O te mau animara anaˈe ta tatou i rave e tei haruhia no roto mai i te mau oire ta tatou i haru.
36 Mai Aroera+ mai, tei te hiti o te peho o Aranona (oia atoa te oire i te peho), tae roa i Gileada, aita e oire aita i noaa ia tatou. Ua tuu pauroa mai Iehova to tatou Atua i te reira ia tatou.+
37 Tera râ, aita outou i tapiri atu i te fenua o te ati Amona,+ te hiti taatoa o te peho o Iaboka+ e te mau oire o te tuhaa fenua mouˈa, aore ra i te tahi atu vahi tei opanihia e Iehova to tatou Atua.
Nota i raro i te api
^ Aore ra “imi hara.”
^ Oia hoi Kereta.
^ Aore ra “mauiui mai te mauiui fanau.”
