Deuteronomi 22:1-30
22 “Ia ite oe i te puaatoro a to taeae aore ra ta ˈna mamoe e overe ra, eiaha oe e mata ê atu.+ E faahoˈi mau â oe i taua animara ra i to taeae.
2 Mai te peu râ aita to taeae e ora ra i pihai iho ia oe aore ra aita oe i matau ia ˈna, e putô ïa oe i te animara i to fare, e e vai te animara ia oe ra e ia paimi roa to taeae ia ˈna. I reira oe e faahoˈi atu ai i te animara.+
3 Ia na reira oe i ta ˈna asini, to ˈna ahu, e te mau mea atoa a to taeae tei moˈe e ua itea mai ia oe. Eiaha oe e mata ê atu.
4 “Ia ite oe i te asini a to taeae aore ra ta ˈna puaatoro ua marua i nia i te purumu, eiaha oe e mata ê atu. E tauturu mau â râ oe i te animara ia tia mai i nia.+
5 “Eiaha te hoê vahine e oomo i te ahu o te hoê tane, eiaha atoa te hoê tane e oomo i te ahu o te hoê vahine. Mea faufau hoi no Iehova to Atua te taata o te na reira.
6 “Ia ite noa ˈtu oe i te hoê ofaaraa manu a haere ai oe na nia i te purumu e fanauˈa aore ra e huero manu to roto, to nia iho anei i te hoê tumu raau aore ra to raro, e te parahi ra te maiaa i nia i te mau fanauˈa aore ra huero manu, eiaha oe e rave i te maiaa e ta ˈna atoa mau fanauˈa.+
7 E tuu oe i te maiaa, e nehenehe râ oe e rave i te mau fanauˈa na oe. A na reira ia maitai e ia ora maoro oe.
8 “Ia hamani oe i te hoê fare apî, e hamani atoa ïa oe i te tahi paruru no to tafare,+ ia ore hoi to utuafare ia parihia i te haamaniiraa toto no te mea e taata te marua mai reira mai.
9 “Eiaha oe e ueue i roto i ta oe faaapu vine e piti huru huero maa.+ Ia na reira oe, e haruhia pauroa tei tupu mai i te huero maa ta oe i ueue e oia atoa te hotu o te faaapu vine no te nao.*
10 “Eiaha oe e arote ma te apiti i te hoê puaatoro e te hoê asini.+
11 “Eiaha oe e oomo i te ahu hamanihia i te huruhuru mamoe tei anoihia e te lino.+
12 “Ia tamau oe i te faaunauna i na hiti e maha o te ahu ta oe e oomo.+
13 “Mai te peu e rave te hoê tane i te hoê vahine faaipoipo na ˈna e ua taoto ia ˈna, e hae* râ oia ia ˈna i muri iho,
14 e e pari oia ia ˈna i te haerea tano ore, a faaino atu ai i to ˈna roo a na ô ai: ‘Ua rave au i teie vahine, i to ˈu râ taotoraa ia ˈna, aita vau i ite i te tahi haapapuraa aita oia i taoto aˈenei i te hoê tane,’
15 na te metua tane ïa e te metua vahine o te tamahine e horoa i te mau matahiapo i te uputa o te oire i te haapapuraa aita iho â te tamahine i taoto aˈenei i te hoê tane.
16 E parau ïa te metua tane o te tamahine i te mau matahiapo: ‘Ua horoa vau i ta ˈu tamahine na teie tane ei vahine faaipoipo na ˈna. Tera râ mea hae* na ˈna ia ˈna
17 e te pari nei oia ia ˈna i te haerea tano ore a na ô ai: “Ua itea mai ia ˈu e aita e haapapuraa aita to tamahine i taoto aˈenei i te hoê tane.” Teie râ te haapapuraa aita iho â ta ˈu tamahine i taoto aˈenei i te hoê tane.’ E e hohora na metua i te ahu i mua i te mau matahiapo o te oire.
18 E rave te mau matahiapo o te oire+ i taua tane ra e e aˈo ratou ia ˈna.+
19 E faaaufau ratou ia ˈna i te hoê utua moni 100 sekela* ario e e horoa ratou i tera moni i te metua tane o te tamahine, no te mea ua faaino tera tane i te roo o te hoê tamahine no Iseraela aita i taoto aˈenei i te hoê tane,+ e e riro noa oia ei vahine faaipoipo na ˈna. Eita ta tera tane e nehenehe e faataa ia ˈna a ora noa ˈi oia.
20 “Mai te peu râ e parau mau te pariraa, e aita e haapapuraa aita iho â te tamahine i taoto aˈenei i te hoê tane,
21 e aratai ïa ratou i te tamahine i te uputa o te fare o to ˈna metua tane, e na te feia o to ˈna oire e pehi ia ˈna i te ofai e ia pohe roa, no te mea ua rave oia i te hoê ohipa haama+ i Iseraela ma te rave i te peu taotoraa tia ore* i roto i te fare o to ˈna metua tane.+ E iriti ê ïa oe i te mea ino mai rotopu ia outou.+
22 “Ia itehia te hoê tane i te taotoraa i te hoê vahine e vahine faaipoipo na te tahi atu tane, ia pohe ïa raua, te tane tei taoto i tera vahine e tera atoa vahine.+ E iriti ê ïa oe i te mea ino mai rotopu ia Iseraela.
23 “Mai te peu ua momoˈahia te hoê tamahine aita i taoto aˈenei i te hoê tane, e e farerei te tahi atu tane ia ˈna i roto i te oire e e taoto oia ia ˈna,
24 e aratai ïa outou ia raua i te uputa o taua oire ra e e pehi outou ia raua i te ofai e ia pohe roa, te tamahine no te mea aita oia i tuô i roto i te oire e te tane no te mea ua faahaama oia i te vahine faaipoipo a to ˈna taata tupu.+ E iriti ê ïa oe i te mea ino mai rotopu ia outou.
25 “Mai te peu râ i rapae i te oire to tera tane farereiraa i tera tamahine tei momoˈahia e ua haavî oia ia ˈna a taoto atu ai ia ˈna, o tera tane anaˈe ïa o tei taoto ia ˈna te pohe.
26 Eiaha oe e hauti i tera tamahine. Aita oia i rave i te tahi hara e au ia ˈna te utua pohe. Hoê â teie tupuraa e ia rave ino te hoê tane i to ˈna taata tupu a haapohe atu ai ia ˈna.+
27 I rapae hoi i te oire to tera tane farereiraa ia ˈna, e ua tuô te tamahine tei momoˈahia, aita râ e taata no te tauturu ia ˈna.
28 “Ia farerei noa ˈtu te hoê tane i te hoê tamahine aita i taoto aˈenei i te hoê tane e aita i momoˈahia, ia haru oia ia ˈna, a taoto atu ai ia ˈna, e ua itehia raua,+
29 e horoa ïa tera tane tei taoto ia ˈna e 50 sekela ario i te metua tane o tera tamahine, e e riro oia ei vahine faaipoipo na ˈna.+ No te mea ua faahaama oia ia ˈna, eita ta ˈna e nehenehe e faataa ia ˈna a ora noa ˈi oia.
30 “Eiaha te tahi tane e rave i te vahine faaipoipo a to ˈna metua tane, ia ore hoi oia e faatae i te haama i nia i* to ˈna metua tane.+
Nota i raro i te api
^ Aore ra “vahavaha.”
^ Aore ra “vahavaha.”
^ 1 sekela: 11,4 g. Hiˈo i te tuhaa hau B14.
^ Aore ra “taiata.”
^ Heb: “heheu i te ahu o.”