Deuteronomi 28:1-68
28 “E mai te peu e faaroo iho â oe i te reo o Iehova to Atua ma te haapao maitai i te faaohipa i ta ˈna mau faaueraa atoa ta ˈu e faaue nei ia oe i teie mahana, e tuu mau â Iehova to Atua ia oe i nia ˈˈe i te tahi atu mau nunaa atoa o te fenua.+
2 E tae mai teie mau haamaitairaa atoa i nia ia oe e e iri i nia ia oe,+ no te mea te tamau ra oe i te faaroo i te reo o Iehova to Atua:
3 “E haamaitaihia oe i roto i te oire, e e haamaitaihia oe i rapae i te oire.+
4 “E haamaitaihia ta oe mau tamarii+ e te maa o to fenua e te mau fanauˈa a ta oe mau animara, ta oe mau puaatoro e mamoe apî.+
5 “E haamaitaihia ta oe farii maa+ e ta oe farii ôi faraoa.+
6 “E haamaitaihia oe i te mau vahi atoa ta oe e haere e e haamaitaihia ta oe mau ohipa e rave.*
7 “To oe mau enemi o te tia mai no te aro ia oe, e rave Iehova e ia pau ratou i mua ia oe.+ Na te hoê noa eˈa e aro mai ai ratou ia oe, e horo ê râ ratou mai mua ia oe na e hitu eˈa taa ê.+
8 E faaueraa mana ta Iehova no oe ia haamaitaihia ta oe mau fare vairaa maa+ e ta oe mau ohipa atoa, e e haamaitai iho â oia ia oe i te fenua ta Iehova to Atua e horoa nei no oe.
9 E faariro Iehova ia oe ei nunaa moˈa no ˈna,+ mai ta ˈna iho â i horeo ia oe,+ no te mea te tamau ra oe i te auraro i te mau faaueraa a Iehova to Atua e i te haere na to ˈna mau eˈa.
10 Ia ite te mau nunaa atoa o te fenua e ua topahia oe i te iˈoa o Iehova,+ e e mǎtaˈu ratou ia oe.+
11 “I te fenua ta Iehova i horeo i to mau tupuna e horoa no oe,+ e faarahi roa Iehova ia oe i te tamarii, te animara e te maa o te fenua.+
12 E tatara Iehova no oe i ta ˈna fare vairaa taoˈa î maitai, te raˈi, no te horoa mai na to fenua i te ûa i te taime au+ e no te haamaitai i ta oe mau ohipa atoa e rave. E horoa tarahu oe na te mau nunaa e rave rahi. O oe râ, aita ïa e faufaa ia tipee.+
13 E faariro Iehova ia oe ei upoo, eiaha ei aero. E riro oe i nia,+ eiaha i raro, mai te peu e tamau noa oe i te faaroo i te mau faaueraa a Iehova to Atua ta ˈu e faaue nei ia oe i teie mahana ia haapao e ia faaohipa.
14 Eiaha oe e fariu ê i te mau parau atoa ta ˈu e faaue nei ia oe i teie mahana, i te pae atau aore ra i te pae aui,+ no te haere na muri i te tahi atu mau atua no te tavini ia ratou.+
15 “Mai te peu râ eita oe e faaroo i te reo o Iehova to Atua ma te haapao i te faaohipa i ta ˈna mau faaueraa e ta ˈna mau faatureraa atoa ta ˈu e faaue nei ia oe i teie mahana, e tae mai teie mau ati atoa i nia ia oe e e iri i nia ia oe:+
16 “Ua ati* oe i roto i te oire, e ua ati oe i rapae i te oire.+
17 “Ua ati ta oe farii maa+ e ta oe farii ôi faraoa.+
18 “Ua ati ta oe mau tamarii,+ te maa o to fenua e ta oe mau puaatoro e mamoe apî.+
19 “Ua ati oe i te mau vahi atoa ta oe e haere, e ua ati oe i ta oe mau ohipa e rave.*
20 “E faatae mai Iehova i nia ia oe te ati, te ahoaho e te utua i roto i ta oe mau ohipa atoa, e mou oe e e pohe oioi oe, no ta oe mau peu ino e to oe faarueraa ia ˈu.+
21 E rave Iehova ia piri te maˈi i nia ia oe, ia mou roa oe ia ˈna mai te fenua ta oe e fatu.+
22 E tairi Iehova ia oe i te tutoo, te fiva rahi,+ te haapê, te âhu rahi, te ˈoˈe,+ te mataˈi veavea e te tutae ro,+ e eita te reira e tuu ia oe e ia pohe roa oe.
23 E riro te raˈi i nia ˈˈe i to upoo ei veo, e te fenua i raro aˈe ia oe ei auri.+
24 E faariro Iehova i te ûa i nia i to fenua ei repo puehu, e e huˈa repo te mairi i nia ia oe mai te raˈi mai e ia mou roa oe.
25 E rave Iehova ia pau oe i mua i to oe mau enemi.+ Na te hoê noa eˈa e aro ai oe ia ratou, e horo ê râ oe mai mua ia ratou na e hitu eˈa taa ê. E riro oe ei riariaraa na te mau faatereraa arii atoa o te fenua.+
26 E riro to tino pohe ei maa na te mau manu atoa o te raˈi e te mau animara atoa o te fenua, aita e taata e faariaria ia ratou.+
27 “E tairi Iehova ia oe i te fêfê o Aiphiti, te maˈi ô, te maˈi maero e te maˈi iri, o te ore roa e ora.
28 E tairi Iehova ia oe i te maamaa, te matapo+ e te ahoaho.*
29 E perehahu oe i te avatea, mai te hoê matapo o te perehahu i roto i te poiri,+ e eita oe e manuïa i roto i te mau mea atoa ta oe e rave. E tamau noa oe i te tavirihia e te eiâhia, aita e taata e faaora ia oe.+
30 E momoˈahia oe i te hoê vahine, e maferahia râ oia e te tahi atu tane. E hamani oe i te hoê fare, eita râ oe e ora i roto.+ E tanu oe i te vine, eita râ oe e pofai i te reira.+
31 E tupaihia ta oe puaatoro oni i mua i to mata, eita râ oe e amu i te reira. E eiâhia ta oe asini i mua maitai ia oe, eita râ te reira e faahoˈihia mai ia oe. E horoahia ta oe mamoe na to oe mau enemi, aita râ e taata e faaora ia oe.
32 E horoahia ta oe mau tamaiti e ta oe mau tamahine na te tahi atu nunaa+ a hiˈo noa ˈtu ai oe, e e mihi noa oe ia ratou, aita râ e puai i to rima.
33 E amuhia te maa o to fenua e pauroa tei noaa mai ia oe e te hoê nunaa aita oe i matau,+ e tamau noa oe i te tavirihia e te haavîhia.
34 E maamaahia oe no ta to mata e ite.
35 “E tairi Iehova ia oe i te fêfê mauiui e te ora ore i nia i to oe na turi e huha, mai to tapuae avae tae roa i to tupuai upoo.
36 E hopoi Iehova ia oe e te arii ta oe e faatoroa i nia iho ia oe i te hoê nunaa aita oe e to mau tupuna i matau,+ e i reira oe e tavini ai i te tahi atu mau atua, e atua raau e ofai.+
37 E riro oe ei riariaraa, ei vahavaharaa,* e ei faaoooraa i rotopu i te mau nunaa atoa. Ia ratou ra e hopoi ai Iehova ia oe.+
38 “E ueue rahi oe i te huero i roto i te faaapu, mea iti râ ta oe e haaputu,+ no te mea e pau te reira i te vivi.
39 E vine ta oe e tanu e e faaapu, eita râ oe e inu i te uaina e e pofai i te maa,+ no te mea e pau te reira i te tuˈa.
40 E tumu olive ta oe ati aˈe i to tuhaa fenua, eita râ oe e parai ia oe i te monoˈi, no te mea e marua ta oe mau olive.
41 E tamaiti e e tamahine ta oe e fanauhia mai, eita râ ratou e vai noa mai ia oe ra, no te mea e riro ratou ei tîtî.+
42 E poˈi roa ta oe mau tumu raau atoa e te maa o to fenua i te mau aere manumanu.*
43 E tamau noa te taata ê e noho ra i ǒ oe i te na nia ˈˈe ia oe e te na nia ˈtu â. O oe râ, e tamau noa ïa i te na raro aˈe e te na raro atu â.
44 E horoa tarahu oia na oe, eita râ oe e horoa tarahu na ˈna.+ E riro oia ei upoo, o oe râ, e riro ïa ei aero.+
45 “E tae mai iho â teie mau ati atoa+ i nia ia oe, e pee e e iri te reira i nia ia oe e ia mou roa oe,+ no te mea aita oe i faaroo i te reo o Iehova to Atua ma te auraro i ta ˈna mau faaueraa e ta ˈna mau faatureraa ta ˈna i faaue ia oe.+
46 E vai noa te reira i nia ia oe e to huaai ei tapao e ei faaararaa+ vai tamau,
47 no te mea aita oe i tavini ia Iehova to Atua ma te oaoa e te oaoa o te aau a fanaˈo ai oe e rave rahi mau mea.+
48 E tono Iehova i to oe mau enemi e aro ia oe, e e tavini oe ia ratou+ a pohe ai oe i te poia+ e te poihâ, a ore ai e navai to oe ahu e a ere ai oe i te mau mea atoa. E tuu oia i te zugo auri i nia i to aˈî e ia haamou roa oia ia oe.
49 “E tono Iehova i te hoê nunaa atea+ e aro ia oe, mai te hopea o te fenua. E haru tera nunaa i ta ˈna e aˈuaˈu ra mai te hoê aeto,+ e nunaa eita oe e taa i to ˈna reo,+
50 e nunaa mea riaria ia hiˈo atu o te ore e haapao e ruhiruhia anei, o te ore atoa e aroha i te taata apî.+
51 E amu ratou i te mau fanauˈa a ta oe mau animara e te maa a to fenua e ia mou roa oe. Eita ratou e vaiiho mai i te tahi huero maa, uaina aore ra hinu apî, puaatoro aore ra mamoe apî na oe e ia haamou roa ratou ia oe.+
52 E haaati ratou ia oe, a mau atu ai oe i roto i to mau oire* atoa na to fenua taatoa e ia marua roa to mau patu teitei ta oe e tiaturi ra. E haaati iho â ratou ia oe i roto i to mau oire atoa na to fenua taatoa ta Iehova to Atua i horoa no oe.+
53 E e amu oe i ta oe iho mau tamarii, te iˈo o ta oe mau tamaiti e ta oe mau tamahine+ ta Iehova to Atua i horoa na oe, no te mea e haaati to oe mau enemi i to mau oire e e faaahoaho ratou ia oe.
54 “Tae noa ˈtu te tane mǎrû roa ˈˈe e te aroha hanoa i ǒ oe, eita ïa e aroha i to ˈna taeae, ta ˈna vahine faaipoipo here aore ra ta ˈna mau tamarii e toe ra,
55 e eita oia e horoa atoa na ratou maa iˈo o ta ˈna mau tamarii ta ˈna e amu, aita hoi ta ˈna e maa faahou no te mea e haaati to oe mau enemi i to mau oire e e faaahoaho ratou i to reira mau taata.+
56 E te vahine mǎrû e te aroha hanoa i ǒ oe o te ore roa ˈtu e manaˈo e tuu i to ˈna tapuae avae i nia i te repo no te mea e oraraa fanaˈo to ˈna,+ eita ïa e aroha i ta ˈna tane faaipoipo here, ta ˈna tamaiti aore ra ta ˈna tamahine,
57 e te pufenua no roto mai i to ˈna opu e te mau tamarii ta ˈna e fanau mai, e amu omoˈe oia i te reira no te mea e haaati to oe mau enemi i to mau oire e e faaahoaho ratou i to reira mau taata.
58 “Ia ore oe e haapao maitai pauroa te parau o teie Ture tei papaihia i roto i teie buka,+ e ia ore oe e mǎtaˈu i teie iˈoa hanahana e te mǎtaˈuhia,+ to Iehova+ to Atua,
59 e tairi Iehova ia oe e to huaai i te ati ino mau, e ati rahi e te vai maoro,+ e te maˈi ino e te vai maoro.
60 E faatae mai oia i nia ia oe pauroa te maˈi o Aiphiti ta oe i taiâ na, e e piri mau te reira i nia ia oe.
61 E faatae atoa mai Iehova i nia ia oe pauroa te maˈi e ati aita i papaihia i roto i te buka o teie Ture e ia mou roa oe.
62 Noa ˈtu ua rahi mai outou mai te mau fetia o te raˈi,+ mea iti roa o outou te toe mai,+ no te mea aita oe i faaroo i te reo o Iehova to Atua.
63 “E mai ia Iehova iho â i oaoa na i te faarahi i ta outou mau faufaa e i te faarahi i to outou huaai, e oaoa atoa Iehova i te haamou roa ia outou, e e iriti-ê-hia outou mai te fenua ta oe e fatata i te fatu.
64 “E haapurara Iehova ia oe i rotopu i te mau nunaa atoa, mai te tahi hopea o te fenua i te tahi atu hopea o te fenua,+ e i reira oe e tavini ai i te mau atua raau e ofai, aita oe e to mau tupuna i matau.+
65 Eita oe e ite i te hau i rotopu i tera mau nunaa,+ aita atoa e vahi taahiraa no to tapuae avae. E horoa râ Iehova no oe i reira i te hoê aau taiâ+ e te mata rohirohi e te huru aau hepohepo.+
66 E roohia oe i te fifi atâta, e e riaria oe i te po e te ao. E aita i papu ia oe e ora anei oe.
67 I te poipoi, e parau oe: ‘Ahiri e ahiahi teie!’ e i te ahiahi, e parau oe: ‘Ahiri e poipoi teie!’ no te riaria i roto i to aau e no ta to oe mata e ite.
68 E e faahoˈi mau â Iehova ia oe i Aiphiti na nia i te pahi, na te eˈa ta ˈu i parau ia oe: ‘E ore roa oe e ite faahou i te reira,’ e i reira oe e hoo atu ai ia oe i to oe mau enemi ei tavini tane e tavini vahine, aita râ e taata e hoo mai ia oe.”
Nota i raro i te api
^ Heb: “E haamaitaihia oe ia haere oe i roto e ia haere oe i rapae.”
^ Heb: “Ua ati oe ia haere oe i roto e ia haere oe i rapae.”
^ Aore ra “horuhoru o te aau.”
^ Heb: “parau paari.”
^ Aore ra “manumanu rere.”
^ Heb: “uputa.”
