Deuteronomi 3:1-29
3 “Tipuu aˈera ïa tatou e pauma aˈera na te eˈa e tae atu ai i Basana. Haere maira Oga te arii o Basana e to ˈna mau taata taatoa e aro ia tatou i Ederei.+
2 Na ô maira Iehova ia ˈu: ‘Eiaha e mǎtaˈu ia ˈna, e tuu hoi au ia ˈna, ta ˈna nuu taatoa e to ˈna fenua i to oe rima, e e rave oe ia ˈna mai ta oe iho â i rave ia Sihona te arii o te ati Amori, tei ora na i Hesebona.’
3 Tuu atoa maira ïa Iehova to tatou Atua ia Oga te arii o Basana e pauroa ta ˈna nuu i to tatou rima, tairi aˈera tatou ia ˈna, e aita roa ˈtura e taata i ora mai.
4 Haru aˈera ïa tatou i to ˈna mau oire atoa. Aita e oire aita tatou i rave mai ia ratou, e 60 oire, te tuhaa fenua taatoa o Aragoba, te faatereraa arii a Oga i Basana.+
5 Mea auahia tera mau oire atoa i te patu teitei, te opani e te auri tarava, e e rave rahi mataeinaa.
6 Haamou aˈera râ tatou i taua mau oire ra,+ mai ta tatou i rave no Sihona arii o Hesebona, i te haamouraa i te mau oire atoa, tae noa ˈtu te mau tane, vahine e tamarii.+
7 Rave maira tatou pauroa te animara e tei haruhia o taua mau oire ra na tatou.
8 “I taua taime ra, haru aˈera tatou i te fenua o na piti arii ati Amori,+ e parahi ra i te tuhaa fenua o Ioridana, na te peho o Aranona tae roa i te mouˈa Heremona+
9 (te mouˈa ta to Sidona i pii noa o Siriona e ta te ati Amori i pii noa na o Senira),
10 te mau oire atoa o te vahi papu i nia i te mouˈa, Gileada taatoa, e Basana taatoa tae roa i Saleka e i Ederei,+ na oire o te faatereraa arii a Oga i Basana.
11 O Oga hoi arii o Basana te ati Repha hopea. Ua hamanihia to ˈna afata hunaraa i te auri,* e tei Raba â o te ati Amona te reira. E iva kubiti* te roa e e maha kubiti te aano o te afata, ia au i te kubiti matauhia.
12 I taua taime ra, fatu aˈera tatou i taua fenua ra: mai Aroera+ mai, i te hiti peho o Aranona, e te afaraa o te tuhaa fenua mouˈa o Gileada. E ua horoa vau i to reira mau oire no te ati Reubena e te ati Gada.+
13 E te toea o Gileada e Basana taatoa o te faatereraa arii a Oga, ua horoa ïa vau no te afaraa o te opu o Manase.+ Ua matauhia te tuhaa fenua taatoa o Aragoba, no Basana, ei fenua o te ati Repha.
14 “Rave ihora Iaira+ te tamaiti a Manase i te tuhaa fenua taatoa o Aragoba+ tae roa i te otia o te ati Gesura e te ati Maakata,+ e topa ˈtura i tera mau oire rii o Basana i to ˈna iho iˈoa o Havota-iaira*+ tae roa mai i teie mahana.
15 Horoa ˈtura vau ia Gileada no Makira.+
16 E no te ati Reubena e te ati Gada,+ ua horoa ïa vau ia Gileada tae roa i te peho o Aranona, e te ropuraa o te peho ei otia, e tae roa i Iaboka, te peho i te otia o te ati Amona,
17 te Araba, o Ioridana e to ˈna otia, mai Kinereta tae roa i te miti o te Araba, te miti Avaava,* i te tumu o te mau taha aivi o Pisega i te pae hitia o te râ.+
18 “Horoa ˈtura ïa vau i teie faaueraa ia ratou: ‘Ua horoa Iehova to outou Atua no outou i teie fenua ia fatu outou. E rave to outou mau taata itoito atoa i te mauhaa tamaˈi, a na roto atu ai i te pape Ioridana na mua i to outou mau taeae, te ati Iseraela.+
19 Ta outou noa mau vahine faaipoipo, ta outou mau tamarii, e ta outou mau animara (ua ite maitai au e mea rahi roa ta outou animara) te tamau i te parahi i te mau oire ta ˈu i horoa no outou,
20 e ia haaparahi roa Iehova i to outou mau taeae, mai ta ˈna e rave ra no outou, e ua fatu atoa ratou i te fenua ta Iehova to outou Atua e horoa no ratou i te tahi atu pae o Ioridana. I muri iho outou tataitahi e hoˈi mai ai i to outou fenua ta ˈu i horoa no outou.’+
21 “I taua taime ra, horoa ˈtura vau i teie faaueraa ia Iosua:+ ‘Ua ite mata roa oe i ta Iehova to outou Atua i rave i tera na piti arii. E na reira atoa Iehova i te mau faatereraa arii atoa e na roto atu ai outou i te haere.+
22 Eiaha outou e mǎtaˈu ia ratou, na Iehova hoi to outou Atua e aro no outou.’+
23 “I taua taime ra, taparuparu ihora vau ia Iehova, a na ô ai:
24 ‘E te Arii hau ê e Fatu ra e Iehova, ua haamata oe i te faaite i to tavini i to mana e to rima puai,+ o vai hoi atua i te raˈi aore ra i te fenua o te rave i tera mau ohipa puai mai ia oe?+
25 A vaiiho na ia ˈu ia haere i tera pae mai e ia ite i te fenua maitai i tera pae mai o Ioridana, teie tuhaa fenua mouˈa, e ia Lebanona.’+
26 Te riri noa ra râ Iehova ia ˈu no outou,+ e aita oia i faaroo mai ia ˈu. Ua na ô mai râ Iehova ia ˈu: ‘Atira! Eiaha e parau faahou mai ia ˈu i tera parau.
27 A pauma i te tupuai o Pisega,+ e a hiˈo i tooa o te râ, i apatoerau, i apatoa e i hitia o te râ. A hiˈo i taua fenua ra, e ore hoi oe e na roto atu i te pape Ioridana.+
28 A faatoroa ia Iosua,+ a faaitoito ia ˈna e a haapuai ia ˈna, no te mea o ˈna te na roto atu i te pape Ioridana+ i mua i teie nunaa e na ˈna e aratai ia ratou ia fatu i te fenua ta oe e ite.’
29 Ua tupu pauroa teie mau mea a parahi noa ˈi tatou i te peho i mua ia Bete-peora.+
Nota i raro i te api
^ Huri-atoa-hia “ofai ereere.”
^ 1 kubiti: 44,5 cm. Hiˈo i te tuhaa hau B14.
^ “Na fare ie ei puhaparaa no Iaira” te auraa.
^ Oia hoi te miti Pohe.