Deuteronomi 31:1-30
31 Faafatata ˈtura Mose i te nunaa e parau atura ia Iseraela taatoa i teie mau parau,
2 a na ô ai ia ratou: “E 120 matahiti to ˈu i teie nei.+ Eita vau e nehenehe faahou e aratai ia outou,* ua parau hoi Iehova ia ˈu: ‘Eita oe e na roto atu i te pape Ioridana.’+
3 O Iehova to Atua te haere na mua ia oe, na ˈna e haamou i tera mau nunaa i mua ia oe, e e tiahi oe ia ratou.+ Na Iosua e aratai ia oe i te tahi atu pae,+ mai ta Iehova iho â i parau.
4 E rave Iehova ia ratou mai ta ˈna iho â i rave ia Sihona+ e Oga,+ na arii o te ati Amori, e to ratou fenua i to ˈna haamouraa ia ratou.+
5 E pau ratou ia Iehova no outou, e e rave outou ia ratou ia au i te faaueraa taatoa ta ˈu i horoa ia outou.+
6 Ia itoito e ia puai outou.+ Eiaha e mǎtaˈu e eiaha e riaria i mua ia ratou,+ o Iehova hoi to outou Atua te haere ra na mua ia outou. Eita oia e taiva ia outou, eita atoa oia e faarue ia outou.”+
7 Titau atura Mose ia Iosua e parau atura ia ˈna i mua i te mata o Iseraela taatoa: “Ia itoito e ia puai oe,+ na oe hoi e aratai i teie nunaa i te fenua ta Iehova i horeo i to ratou mau tupuna e horoa no ratou, e na oe e horoa i te reira ei tuhaa na ratou.+
8 O Iehova te haere ra na mua ia oe, e ei pihai iho noa oia ia oe.+ Eita oia e taiva ia oe, eita atoa oia e faarue ia oe. Eiaha e mǎtaˈu e eiaha e riaria.”+
9 Papai ihora ïa Mose i taua Ture ra+ e horoa ˈtura i te reira i te mau tahuˈa, te ati Levi, o te amo i te afata o ta Iehova faufaa, e pauroa te matahiapo o Iseraela.
10 Faaue atura Mose ia ratou: “Ia hope pauroa te hitu matahiti, i te taime faataahia i te matahiti o te tuuraa tarahu,+ i te roaraa o te Oroa patiaraa tiahapa,*+
11 ia tia pauroa to Iseraela i mua i te aro o Iehova+ to Atua i te vahi ta ˈna e maiti, e taio ïa outou i teie Ture no Iseraela taatoa ia faaroo ratou i te reira.+
12 A haaputuputu i te nunaa,+ te tane, te vahine, te tamarii e te taata ê e noho ra i rotopu ia outou i roto i to outou mau oire,* ia faaroo ratou, ia haapii e ia mǎtaˈu ratou ia Iehova to outou Atua e ia haapao maitai ratou i te faaohipa i te mau parau atoa o teie Ture.
13 I reira ta ratou mau tamarii tei ore i ite i teie Ture e faaroo ai+ e e haapii ai i te mǎtaˈu ia Iehova to outou Atua pauroa te mahana e ora ˈi outou i te fenua ta outou e fatu+ i te tahi atu pae o Ioridana.”
14 Na ô maira Iehova ia Mose: “Inaha, te piri mai ra te taime e pohe ai oe.+ A titau ia Iosua e a tia orua i te tiahapa o te amuiraa, ia nehenehe au e faatoroa ia ˈna.”+ Haere aˈera ïa Mose raua Iosua e tia aˈera i te tiahapa o te amuiraa.
15 Fa maira Iehova i te tiahapa i roto i te pou ata, e tia noa ihora te pou ata i te tomoraa o te tiahapa.+
16 Na ô maira Iehova ia Mose: “Inaha, fatata oe i te pohe,* e e haamata teie nunaa i te rave i te peu taiata pae varua e te mau atua ěê ati aˈe ia ratou i te fenua ta ratou e haere ra.+ E faarue ratou ia ˈu+ e e ofati ratou i ta ˈu faufaa ta ˈu i faaau ia ratou.+
17 I tera taime, e ura to ˈu riri ia ratou,+ e faarue au ia ratou+ e e huna vau i to ˈu aro ia ratou+ e ia pau roa ratou. E ua roo-anaˈe-hia ratou i te ati e te tupuraa ahoaho e rave rahi,+ e parau ratou: ‘E ere anei no te mea aita to tatou Atua i rotopu ia tatou i roohia ˈi tatou i teie mau ati?’+
18 E huna noa râ vau i to ˈu aro ia ratou i taua mahana ra no te ino atoa ta ratou i rave i te fariuraa i te tahi atu mau atua.+
19 “I teie nei a papai i teie himene na orua+ e a haapii atu i te ati Iseraela.+ E haapii ratou i te reira* ia riro teie himene ei ite na ˈu no ta te nunaa o Iseraela e rave.+
20 Ia aratai au ia ratou i te fenua ta ˈu i horeo i to ratou mau tupuna,+ e fenua e tahe noa te û e te meri,+ ia tamaa ratou, ia paia roa e ia rahi ta ratou faufaa,*+ e fariu ratou i te tahi mau atua, e tavini ratou ia ratou, e faatura ore ratou ia ˈu e e ofati ratou i ta ˈu faufaa.+
21 Ua roo-anaˈe-hia ratou i te ati e te tupuraa ahoaho e rave rahi,+ e riro teie himene ei haamanaˈoraa ia ratou eaha te tupu ia faaroo ore ratou i te Atua (eiaha hoi te reira ia moˈe i to ratou huaai), hou hoi au a aratai ai ia ratou i te fenua ta ˈu i horeo, ua ite ê na vau i te huru feruriraa ta ratou e faatupu.”+
22 Papai ihora Mose i teie himene i taua mahana ra, e haapii atura i te reira i te ati Iseraela.
23 Faatoroa ˈtura oia* ia Iosua+ te tamaiti a Nuna e parau atura ia ˈna: “Ia itoito e ia puai oe,+ na oe hoi e aratai i te ati Iseraela i te fenua ta ˈu i horeo ia ratou,+ e ei pihai iho noa vau ia oe.”
24 I te otiraa iho â ia Mose i te papai i te mau parau atoa o teie Ture i roto i te hoê buka,+
25 faaue atura Mose i te ati Levi o te amo i te afata o ta Iehova faufaa:
26 “A rave i teie buka o te Ture+ e a tuu i pihai iho i te afata+ o te faufaa a Iehova to outou Atua, e i reira e riro ai te reira ei haamanaˈoraa ia outou i ta ˈu mau faaararaa.
27 Ua ite maitai hoi au i to outou huru orure hau+ e to outou etaeta.*+ I te mea e ua orure hau noa outou ia Iehova a ora noa ˈi au i rotopu ia outou, eaha ˈtu â ïa ua pohe anaˈe au!
28 A haaputuputu i te mau matahiapo atoa o to outou mau opu e to outou feia toroa ia ˈu nei. E parau vau i teie mau parau i to ratou tariˈa e e rave au i te raˈi e te fenua ei ite no ta ratou e rave.+
29 Ua ite maitai hoi au e ua pohe anaˈe au, e rave iho â outou i te ino+ e e fariu ê outou i te eˈa ta ˈu i faaue ia outou. E e roohia outou i te ati+ ia hope taua mau mahana ra, no te mea e rave outou i te mea ino i te aro o Iehova e e faainoino outou ia ˈna i te ohipa a to outou rima.”
30 Faahiti atura ïa Mose i te tariˈa o te amuiraa taatoa o Iseraela i te mau parau o teie himene mai te omuaraa e tae roa i te hopea:+
Nota i raro i te api
^ Heb: “haere i rapae e e tomo i roto.”
^ Aore ra “tamaru no tau mahana noa.”
^ Heb: “uputa.”
^ Heb: “taoto e to mau metua.”
^ Heb: “A tuu i te reira i roto i to ratou vaha.”
^ Heb: “ia poria.”
^ Oia hoi te Atua.
^ Heb: “aˈî etaeta.”
