Deuteronomi 9:1-29
9 “A faaroo mai, e Iseraela, i teie mahana te haere nei outou na roto i te pape Ioridana+ no te rave i te fenua o te mau nunaa rahi aˈe e te puai aˈe ia oe,+ te mau oire rahi tei auahia i te patu tae roa i te raˈi,*+
2 te hoê nunaa rahi e te roa, te mau tamaiti a te ati Anaka,+ ta oe i matau e i faaroo i teie parau: ‘O vai te nehenehe e faaû i te mau tamaiti a Anaka?’
3 Ia ite ïa oe i teie mahana e na mua Iehova to Atua ia oe i te haere i te tahi atu pae.+ E auahi ura oia,+ e e haamou oia ia ratou. E pau ratou ia ˈna i mua i to oe mata, a nehenehe atu ai oe e tiahi oioi ia ratou* e e haamou ia ratou, mai ta Iehova iho â i fafau ia oe.+
4 “Ia tiahi Iehova to Atua ia ratou mai mua ia oe, eiaha oe e parau i roto i to aau: ‘No ta ˈu parau-tia i aratai ai Iehova ia ˈu ia fatu i teie fenua.’+ Te tiahi nei râ Iehova i teie mau nunaa mai mua ia oe no to ratou ino.+
5 E ere no ta oe parau-tia aore ra no to aau tia e fatu ai oe i to ratou fenua. Te tiahi nei râ Iehova to Atua i teie mau nunaa mai mua ia oe no to ratou ino+ e ia tupu te parau ta Iehova i horeo i to mau tupuna o Aberahama,+ Isaaka+ e Iakoba.+
6 Ia ite ïa oe e ere no ta oe parau-tia e horoa ˈi Iehova to Atua i teie fenua maitai no oe ia fatu oe, no te mea e nunaa mârô* oe.+
7 “A haamanaˈo, eiaha ia moˈe ia oe, i to oe aaraa ia Iehova to Atua i te medebara.+ Mai te mahana i faarue ai outou i te fenua o Aiphiti e tae roa mai ai outou i teie vahi, ua orure hau noa outou ia Iehova.+
8 I Horeba atoa, ua aa outou ia Iehova, e no to Iehova riri rahi ia outou ua hinaaro oia e haamou ia outou.+
9 I to ˈu paumaraa i nia i te mouˈa ia horoahia mai na pǎpǎ ofai,+ na pǎpǎ o te faufaa ta Iehova i faaau ia outou,+ ua faaea vau i nia i te mouˈa e 40 ao e 40 po,+ ma te ore e amu i te maa e e inu i te pape.
10 Horoa maira Iehova ia ˈu i na pǎpǎ ofai e piti tei papaihia i te manimani rima o te Atua, e tei nia iho pauroa te parau ta Iehova i parau ia outou i nia i te mouˈa no roto mai i te auahi i te mahana rururaa.*+
11 I te hoperaa na 40 ao e 40 po, horoa maira Iehova ia ˈu i na pǎpǎ ofai e piti, na pǎpǎ o te faufaa,
12 e na ô maira Iehova: ‘A tia, a pou haaviti atu i raro, no te mea ua rave to oe nunaa ta oe i aratai i rapae i Aiphiti i te tahi ohipa viivii.+ Ua hahi ê oioi ratou i te eˈa ta ˈu i faaue ia ratou ia na reira i te haere. Ua hamani ratou i te hoê tii faatôhia* no ratou.’+
13 Na ô maira Iehova ia ˈu: ‘Ua ite atu vau i teie nunaa, e inaha, e nunaa mârô.*+
14 A vaiiho na ia ˈu, e haamou vau ia ratou e e faaore au i to ratou iˈoa mai raro aˈe i te raˈi, e e faariro vau ia oe ei nunaa puai aˈe e te rahi aˈe ia ratou.’+
15 “Fariu maira vau e pou ihora mai nia mai i te mouˈa e ura ra i te auahi,+ e to roto na pǎpǎ e piti o te faufaa i to ˈu rima.+
16 Hiˈo maira vau e ite ihora e ua hara outou ia Iehova to outou Atua! Ua hamani outou i te hoê tii fanauˈa puaatoro faatôhia no outou. Ua hahi ê oioi outou i te eˈa ta Iehova i faaue ia outou ia na reira i te haere.+
17 A amo ai i na pǎpǎ i nia, taora ihora vau i te reira i raro e parari aˈera te reira i mua i to outou mata.+
18 Tipapa ihora ïa vau i raro i mua ia Iehova, mai i te omuaraa, e 40 ao e 40 po. Aita vau i amu i te maa e aita atoa i inu i te pape,+ no te mau hara atoa ta outou i rave ma te rave i te mea ino i te aro o Iehova, a inoino atu ai oia.
19 Te riaria ra hoi au no to Iehova riri rahi ia outou,+ ua hinaaro hoi oia e haamou ia outou. Tera râ, ua faaroo mai Iehova ia ˈu i taua taime atoa ra.+
20 “Ua riri roa Iehova ia Aarona a hinaaro atu ai oia e haamou ia ˈna,+ ua taparuparu râ vau no Aarona i taua taime atoa ra.
21 Rave maira vau i te tii fanauˈa puaatoro,+ te hara hoi ta outou i rave, e tanina ihora vau. Pâpâhia e faahuˈahuˈa roa ˈtura vau i te reira mai te huˈa rii repo, e ueue ihora vau i te reira i roto i te pape e tahe ra mai nia mai i te mouˈa.+
22 “Oia atoa i Tabera,+ i Mâsa+ e i Kiberota-hataava,+ ua aa atoa outou ia Iehova a riri atu ai oia.
23 I to Iehova tonoraa ia outou na Kadesa-barenea+ ˈtu e parauraa: ‘A pauma e a fatu i te fenua ta ˈu iho â e horoa no outou!,’ ua patoi â outou i te faaueraa a Iehova to outou Atua,+ aita outou i faatupu i te faaroo+ ia ˈna e aita outou i faaroo ia ˈna.
24 Ua orure hau outou ia Iehova mai to ˈu iho â matauraa ia outou.
25 “Tipapa noa ihora ïa vau i raro i mua ia Iehova e 40 ao e 40 po,+ ua tipapa noa hoi au i raro mai tera no te mea ua parau Iehova e e haamou oia ia outou.
26 Haamata ihora vau i te taparuparu ia Iehova e i te na ô: ‘E te Arii hau ê e Fatu ra e Iehova, eiaha oe e haamou i to nunaa. E nunaa ratou no oe,*+ ta oe i hoo mai maoti to oe mana e ta oe i aratai i rapae i Aiphiti ma te rima puai.+
27 A haamanaˈo i to mau tavini o Aberahama, Isaaka e Iakoba.+ Eiaha oe e haapao i te etaeta o taua nunaa ra, to ratou ino, e ta ratou hara.+
28 Aˈunei hoi te feia o te fenua mai reira mai oe i te aratairaa ia matou i rapae, e parau ai: “Aita i haere ia Iehova ia aratai ia ratou i te fenua ta ˈna i fafau ia ratou, e no to ˈna hae ia ratou, ua aratai oia ia ratou i rapae no te haapohe ia ratou i te medebara.”+
29 E taata hoi ratou no oe e e nunaa no oe,*+ ta oe i aratai i rapae ma to mana rahi e to rima faatorohia.’+
Nota i raro i te api
^ Oia hoi te patu era ˈˈe te teitei.
^ Aore ra “rave oioi i to ratou fenua.”
^ Heb: “aˈî etaeta.”
^ Aore ra “o te amuiraa.”
^ Aore ra “faatahehia.”
^ Heb: “aˈî etaeta.”
^ Aore ra “o oe te fatu.”
^ Aore ra “o oe te fatu.”
