Te rata i to Ephesia 6:1-24
6 E te mau tamarii, a faaroo i to outou na metua+ mai tei au i te Fatu, e mea tia hoi te reira.
2 “A faatura i to metua tane e to metua vahine,”+ o te faaueraa matamua ïa, apitihia i te hoê parau fafau:
3 “Ia maitai noa oe* e ia ora maoro oe i nia i te fenua.”
4 E te mau metua tane, eiaha e faariri i ta outou mau tamarii,+ a tamau râ i te aupuru ia ratou i te aˈo+ e te faaararaa* a Iehova.*+
5 E te mau tavini, a auraro i to outou mau fatu i te fenua nei+ ma te mǎtaˈu e te rûrû e ma te aau atoa, mai ta outou e auraro i te Mesia,
6 eiaha noa ia hiˈohia mai outou e te taata* e ia au mai ratou ia outou,+ e auraro râ ma to outou aau e puai* atoa mai tei au i te mau tavini a te Mesia o te rave ra i te hinaaro o te Atua.+
7 A tavini ma te aau tae, mai te mea ra e no Iehova,*+ eiaha no te taata,
8 ua ite hoi outou e e haamaitai Iehova* i te taata atoa,+ e tîtî anei aore ra e tiamâ, no te maitai atoa ta ˈna e rave.
9 Outou atoa e te mau fatu, a na reira noa atoa ia ratou e eiaha ei parau haamǎtaˈu, ua ite hoi outou e tei te raˈi to ratou Fatu e to outou atoa,+ e e ore oia e maitiiti i te taata.
10 E i te hopea, a tutava ia noaa ia outou te puai+ no ǒ mai i te Fatu e i te mana rahi o to ˈna puai.
11 A ahu na i te haana tamaˈi taatoa+ no ǒ mai i te Atua ia nehenehe outou ia mau papu i mua i te mau ravea paari* a te Diabolo.
12 E ere hoi te taata* ta tatou e aro* nei,+ te mau faatereraa râ, te mau tia mana, te mau arii o teie nei ao poiri e te mau varua ino+ i te raˈi.
13 No reira, a rave mai i te haana tamaˈi taatoa no ǒ mai i te Atua+ ia nehenehe outou ia faaruru i te mahana ino. E ua hope roa anaˈe teie mau mea atoa i te ravehia e outou, ia mau papu outou.
14 No reira, a mau papu ma te tauupu taamuhia i te hatua o te parau mau,+ ma te ahu mai i te tapoˈi ouma o te parau-tia,+
15 ma te oomo i te tiaa i to outou avae no te poro i te parau apî oaoa o te hau.+
16 Hau atu â, a rave i te paruru rahi o te faaroo,+ e na reira ïa outou e tupohe ai i te mau teˈa* auahi atoa a te varua ino.+
17 A tuu atoa i te taupoo o te faaoraraa,+ e a mau i te ˈoˈe o te varua moˈa, oia hoi te parau a te Atua,+
18 e na roto i te pure e te taparuraa e rave rau,+ ia pure outou ma te tuutuu ore ia au i te varua moˈa.+ No reira, a vai ara e a taparuparu noa no te feia moˈa atoa.
19 A pure atoa no ˈu, ia noaa ia ˈu te aravihi ia parau atu ma te mǎtaˈu ore, ia faaite hoi au i te parau huna moˈa o te parau apî oaoa,+
20 i riro ai hoi au ei tia no te Faatereraa arii*+ i taamuhia i te fifi auri, e ia paraparau vau ma te mǎtaˈu ore mai tei tia ia ˈu.
21 E teie nei, na Tuhiko,+ te hoê taeae herehia e te haapao maitai i roto i te taviniraa i te Fatu, e faaite maitai ia outou i to ˈu nei parau e eaha to ˈu huru.+
22 No reira oia i tonohia ˈtu ai e au, ia ite hoi outou eaha to matou huru e ia tamahanahana oia i to outou aau.
23 Ei te mau taeae te hau e te here e te faaroo atoa no ǒ mai i te Atua ra te Metua e i te Fatu ra o Iesu Mesia.
24 Ia vai â te hamani maitai rahi i te feia atoa e here ra ia Iesu Mesia to tatou Fatu i te here o te ore roa e mou.
Nota i raro i te api
^ Aore ra “Ia faufaahia oe.”
^ Aore ra “haapiiraa,” “aratairaa.” Hel: “te tuuraa i roto i te feruriraa.”
^ Hiˈo i te tuhaa hau A5.
^ Hel: “eiaha noa i mua i te mata o te taata a tavini ai outou.”
^ Hiˈo i te tuhaa hau A5.
^ Hiˈo i te tuhaa hau A5.
^ Aore ra “opuaraa.”
^ Hel: “te toto e te iˈo.”
^ Hel: “taputô.”
^ Aore ra “ihe.”
^ Aore ra “Basileia.”
