Esetera 1:1-22
1 I te mau mahana o Ahasueru,* oia hoi te Ahasueru tei faatere 127 fenua+ mai Initia tae roa i Etiopia,*
2 i taua mau mahana ra a parahi ai te arii Ahasueru i nia i to ˈna terono arii i Susana*+ te pare,*
3 i te toru o te matahiti o ta ˈna faatereraa, faatupu ihora oia i te hoê tamaaraa no ta ˈna huiarii e ta ˈna mau tavini atoa. To mua ia ˈna te nuu no Peresia+ e Medai,+ te huimana e te huiarii o te mau fenua,
4 e faaite ihora oia ia ratou i te mau faufaa o ta ˈna faatereraa arii hanahana e te rahi e te taa ê mau o to ˈna hanahana e rave rahi mahana, 180 mahana.
5 E i te hoperaa taua mau mahana ra, faatupu ihora te arii i te hoê tamaaraa e hitu mahana no te taata atoa i Susana* te pare,* mai te feia mana tae roa i te feia haihai, i roto i te aua o te ô o te aorai o te arii.
6 Te vai ra te lino, te vavai maitai roa, e te ahu ninamu taamu-maitai-hia i te taura ahu maitai roa, te huruhuru mamoe vareau i nia i te mau potaa ario, te mau pou maremora, e te tofa auro e ario i nia iho i te sesa uteute, te maremora uouo, te pârau, e te maremora ereere tei apǎpǎhia na raro.
7 I inuhia na te uaina i roto i te mau hapaina auro, e mea taa ê te tahi farii i te tahi atu, e mea rahi te uaina a te arii, ia au i te mau faufaa a te arii.
8 Ia au i te ture aita hoê taata e faahepohia* ia inu, na te arii i faaue i te mau raatira o to ˈna aorai ia vaiiho i te taata tataitahi ia inu mai ta ˈna i hinaaro.
9 Faatupu atoa ihora Vaseti+ te arii vahine i te hoê tamaaraa na te mau vahine i te aorai* o te arii Ahasueru.
10 I te hitu o te mahana, a oaoa ˈi te aau o te arii no te uaina, parau atura oia ia Mehumana, Bizeta, Harabona,+ Bigeta, Abageta, Zetara, e Karakasa na hitu tia mana e tavini na te arii Ahasueru,
11 ia afai mai i mua ia ˈna i te arii vahine o Vaseti, ma te taamu upoo arii, ia faaite i te mau nunaa e te huiarii i to ˈna haviti, e mea haviti roa hoi oia.
12 Patoi noa ihora râ te arii vahine o Vaseti i te haere mai ia au i te faaueraa a te arii tei horoahia na roto i te mau tia mana. Riri roa ihora te arii, e uˈana ihora to ˈna riri rahi.
13 Paraparau atura te arii i te mau tane feruriraa paari tei matau maitai i te mau faaotiraa tei ravehia na mua ˈtu* (mea na reira hoi te mau ohipa a te arii e tuuhia ˈi i mua i te feia atoa mea ite i te ture e te mau ohipa haavaraa,
14 e te feia piri roa ˈˈe ia ˈna o Karesena ïa, Setara, Adamata, Taresisa, Meresa, Maresena, e Memukana, e hitu huiarii+ no Peresia e Medai, te nehenehe e tia i mua i te arii e to ratou te tiaraa teitei roa ˈˈe i roto i te faatereraa arii).
15 Ui atura te arii: “Ia au i te ture, ia aha tatou i te arii vahine o Vaseti no te mea aita oia i faaroo i te faaueraa a te arii Ahasueru tei horoahia na roto i te mau tia mana?”
16 Parau ihora Memukana i te arii e te huiarii: “E ere noa o te arii ta te arii vahine o Vaseti i faaino,+ pauroa atoa râ te huiarii e pauroa te nunaa i te mau fenua atoa o te arii Ahasueru.
17 E itehia hoi eaha ta te arii vahine i rave e te mau vahine faaipoipo atoa, e e vahavaha ratou i ta ratou tane faaipoipo e e na ô ratou: ‘Ua parau te arii Ahasueru ia afaihia mai te arii vahine o Vaseti i mua ia ˈna, ua patoi râ oia i te haere mai.’
18 I te mahana iho â e ite ai te huiarii vahine no Peresia e Medai i ta te arii vahine i rave, e paraparau ratou i te huiarii atoa a te arii, a tupu atu ai te vahavaha e te riri rahi.
19 Ia tia i te arii, ia horoa oia i te tahi faaueraa mana arii e ia papaihia te reira i roto i te mau ture no Peresia e Medai, o te ore e nehenehe e faaorehia,+ eiaha roa o Vaseti e haere faahou mai i mua i te arii Ahasueru, e ia horoa te arii i to ˈna tiaraa arii vahine no te hoê vahine maitai aˈe ia ˈna.
20 E ia faaroohia te faaueraa mana a te arii na te fenua rahi taatoa ta ˈna e faatere ra, e faatura pauroa te vahine faaipoipo i ta ratou tane, e tane mana anei aore ra eita.”
21 Au ihora te arii e te huiarii i tera manaˈo e rave atura te arii mai ta Memukana i parau.
22 Hapono atura ïa oia i te mau rata i te mau fenua atoa ta ˈna e faatere ra,+ te fenua tataitahi i ta ˈna iho papai* e te nunaa tataitahi i to ˈna iho reo, ia riro hoi te tane faaipoipo tataitahi ei fatu* no to ˈna iho utuafare e ia paraparau na roto i te reo o to ˈna iho nunaa.
Nota i raro i te api
^ Piihia Aretehasaseta i roto i te Septante. Manaˈohia o Hasaseta I, tamaiti a Dariu rahi.
^ Aore ra “Kusa.”
^ Aore ra “Susa.”
^ Aore ra “aorai.”
^ Aore ra “Susa.”
^ Aore ra “aorai.”
^ Aore ra “opanihia.”
^ Heb: “fare.”
^ Aore ra “te mau faanahoraa.” Heb: “te mau tau.”
^ Aore ra “huru papairaa.”
^ Aore ra “upoo.”
