Esetera 2:1-23
2 I muri iho i te reira, i te oreraa te riri o te arii Ahasueru,+ haamanaˈo ihora oia i ta Vaseti i rave+ e i tei faaotihia no ˈna.+
2 Na ô atura te mau tavini a te arii: “Ia imihia no te arii te tahi mau vahine apî haviti aita i taoto aˈenei i te tane.
3 E ia faatoroa te arii i te mau taata toroa i te mau fenua atoa ta ˈna e faatere ra+ no te haaputuputu mai i te mau vahine apî haviti aita i taoto aˈenei i te tane i Susana* te pare,* i te fare o te mau vahine. Ia tuuhia ratou ia Hegai+ ra te taata tiaraa teitei* o te arii e te tiai o te mau vahine no te haapao ia ratou, e ia horoahia te monoˈi taurumi ia haviti atu â ratou.
4 E te vahine apî o te au-roa-hia aˈe e te arii e riro ïa oia ei arii vahine ei mono ia Vaseti.”+ Au ihora te arii i tera manaˈo, e rave atura i te reira.
5 Te vai ra hoê tane ati Iuda i Susana*+ te pare,* o Moredekai+ to ˈna iˈoa te tamaiti a Iaira te tamaiti a Simei te tamaiti a Kisa, e ati Beniamina,+
6 o tei hopoi-tîtî-hia mai Ierusalema na muri i te feia tei hopoi-ê-hia e te arii Iekonia*+ no Iuda, ta te arii Nebukanesa no Babulonia i hopoi ê.
7 O ˈna te taata haapao ia Hadasa,* oia hoi Esetera te tamahine a te taeae o to ˈna metua tane,+ aita hoi to ˈna e metua tane aita atoa e metua vahine. E tino nehenehe to te vahine apî e te hohoˈa mata purotu, e i te poheraa to ˈna metua tane e metua vahine, na Moredekai i rave ia ˈna ei tamahine na ˈna.
8 I te faaite-haere-raahia te parau a te arii e ta ˈna ture e i te hopoiraahia e rave rahi vahine apî i Susana* te pare* na Hegai+ e haapao, hopoi-atoa-hia ˈtura Esetera i te aorai* o te arii na Hegai te tiai o te mau vahine e haapao.
9 Au ihora Hegai i te vahine apî, e farii maitai ihora ia ˈna.* Ru atura oia i te faanaho no ˈna i te mau monoˈi taurumi ia haviti atu â oia+ e ta ˈna maa taa ê, e faataa ˈtura e hitu tavini vahine apî no ˈna tei maitihia no roto i te aorai o te arii. Faahaere atoa ˈtura oia ia ˈna e ta ˈna mau tavini vahine apî i te vahi maitai roa ˈˈe i roto i te fare o te mau vahine.
10 Aita Esetera i faaite noa ˈˈe o vai to ˈna nunaa+ e to ˈna fetii, na Moredekai+ hoi i faaue ia ˈna eiaha e faaite.+
11 I te mau mahana atoa, ua haere noa Moredekai na mua i te aua o te fare o te mau vahine no te ite eaha te huru o Esetera e te ahahia ra o ˈna.
12 Tomo atura te vahine apî tataitahi i ǒ te arii Ahasueru i te otiraa na 12 avaˈe taurumiraa faauehia no te mau vahine, mai teie hoi e tupu ai te taurumiraa ia haviti atu â ratou: e ono avaˈe i te monoˈi mura+ e e ono avaˈe i te monoˈi zuri+ e te monoˈi e rave rau no te taurumiraa ia haviti atu â ratou.
13 Ua ineine ïa te vahine apî i te tomo i ǒ te arii, e horoahia ia ˈna te mau mea atoa ta ˈna e ani ia haere mai oia mai te fare o te mau vahine i te aorai o te arii.
14 I te po e tomo ai oia, e i te poipoi e hoˈi ai oia i te piti o te fare o te mau vahine, e na Sasagaza te taata tiaraa teitei* o te arii,+ te tiai o te mau vahine faaipoipo tavini, e haapao ia ratou. Eita oia e haere faahou i ǒ te arii aita anaˈe te arii i au roa ia ˈna e aita anaˈe oia i piihia ma to ˈna iˈoa.+
15 E i te taeraa mai te taime e tomo ai Esetera, te tamahine a Abihaila te taeae o te metua tane o Moredekai tei rave ia ˈna ei tamahine na ˈna,+ i ǒ te arii, aita oia i ani noa ˈˈe i te tahi mea maori râ i ta Hegai te taata tiaraa teitei* o te arii, te tiai o te mau vahine, i faaue ia ˈna. (I farii-maitai-noa-hia na Esetera e te taata atoa tei ite atu ia ˈna.)
16 Afaihia ˈtura Esetera i ǒ te arii Ahasueru i to ˈna aorai i te ahuru o te avaˈe, oia hoi te avaˈe no Tebeta,* i te hitu o te matahiti+ o ta ˈna faatereraa.
17 E here roa ihora te arii ia Esetera hau aˈe i te tahi atu mau vahine atoa, e farii maitai ihora oia e hamani maitai* ihora ia ˈna hau aˈe i te tahi atu mau vahine atoa aita i taoto aˈenei i te tane. Tuu atura ïa oia i te taamu upoo arii i nia i to ˈna upoo e faariro atura ia ˈna ei arii vahine+ ei mono ia Vaseti.+
18 E faatupu atura te arii i te hoê tamaaraa rahi no ta ˈna huiarii e ta ˈna mau tavini atoa, te tamaaraa no Esetera. E faaite atura oia i te tahi parau mana no te tuu i te feia tapeahia* na te mau fenua, e horoa noa ˈtura oia i te mau ô ia au i te mau faufaa a te arii.
19 I te hopoiraahia te mau vahine aita i taoto aˈenei i te tane*+ i te piti o te taime, te parahi ra Moredekai i te uputa o te aorai o te arii.
20 Aita Esetera i faaite noa ˈˈe o vai to ˈna fetii e to ˈna nunaa,+ mai ta Moredekai i faaue ia ˈna. Ua rave noa Esetera i ta Moredekai i parau, mai ta ˈna i rave a haapao noa ˈi oia ia ˈna.+
21 I taua mau mahana ra a parahi ai Moredekai i te uputa o te aorai o te arii, riri ihora Bigatana e Teresa, e piti tia mana o te arii e tiai opani, e opua aˈera e haapohe i te arii Ahasueru.
22 Faaroo ihora râ Moredekai i te reira, e faaite oioi atura i te arii vahine Esetera. Paraparau ihora Esetera i te arii i te iˈoa o Moredekai.*
23 Ravehia ˈtura ïa te mau maimiraa no nia i taua ohipa ra e haapapuhia ˈtura te reira i muri iho. Tarîhia ˈtura na tane i nia i te pou. E tapaohia ˈtura te reira i roto i te buka tuatapaparaa i mua i te aro o te arii.+
Nota i raro i te api
^ Aore ra “Susa.”
^ Aore ra “aorai.”
^ Aore ra “Susa.”
^ Aore ra “aorai.”
^ “Hedesa” te auraa.
^ Aore ra “Susa.”
^ Aore ra “aorai.”
^ Heb: “fare.”
^ Aore ra “faaite ihora ia ˈna i te here taiva ore.”
^ Hiˈo i te tuhaa hau B15.
^ Aore ra “here taiva ore.”
^ Aore ra “faaore i te ô titauhia.” Aita i papu maitai eaha tei faaorehia aore ra tei tuuhia.
^ Aore ra “te mau vahine apî.”
^ Aore ra “no Moredekai.”
