Esetera 3:1-15
3 I muri aˈe, faateitei atura te arii Ahasueru ia Hamana+ te tamaiti a Hamedata te ati Agaga+ e horoa ˈtura no ˈna i te hoê tiaraa i nia ˈˈe i to te tahi atu huiarii.+
2 E te mau tavini atoa a te arii e tia ra i te uputa o te aorai o te arii, i piˈo na ïa e i tipapa na ratou i mua ia Hamana, tera hoi ta te arii i faaue no nia ia ˈna. Aita râ Moredekai i farii e piˈo e e tipapa i mua ia ˈna.
3 Parau aˈera ïa te mau tavini a te arii e tia ra i te uputa o te aorai o te arii ia Moredekai: “Eaha oe e ore ai e haapao i te faaueraa a te arii?”
4 I tera e tera mahana to ratou ui-noa-raa ia ˈna, aita râ oia i faaroo ia ratou. Faaara aˈera ratou ia Hamana ia hiˈo e vaiiho anei ia Moredekai ia na reira noa.+ Ua parau hoi oia ia ratou e ati Iuda oia.+
5 I te iteraa Hamana e aita Moredekai i farii e piˈo e e tipapa i mua ia ˈna, riri roa ihora Hamana.+
6 Aita râ oia i au i te manaˈo e haapohe ia Moredekai noa, ua faaitehia hoi ia ˈna o vai te nunaa o Moredekai. Opua ihora Hamana e haamou pauroa te ati Iuda na te fenua taatoa ta Ahasueru e faatere ra, te nunaa taatoa o Moredekai.
7 I te avaˈe matamua, oia hoi te avaˈe no Nisana,* i te 12 o te matahiti faatereraa+ a te arii Ahasueru, tuuhia ˈtura te Pura+ (oia hoi te Kelero) i mua ia Hamana no te faataa i te mahana e te avaˈe, e topa ihora i te 12 o te avaˈe, oia hoi Adara.*+
8 Parau ihora Hamana i te arii Ahasueru: “Te vai ra te tahi nunaa tei purara i roto i te mau nunaa+ i te mau fenua atoa ta oe e faatere ra,+ mea taa ê roa ta ratou mau ture i ta te tahi atu mau nunaa atoa. E aita ratou e auraro ra i te mau ture a te arii, e e ere mea maitai no te arii ia vaiiho noa ia ratou.
9 Ia tia i te arii, ia papaihia hoê faaueraa mana no te haamou ia ratou. E aufau vau i te mau tia mana 10 000 taleni* ario ta ratou e tuu i roto i te faufaa a te arii.”*
10 Tatara ihora ïa te arii i to ˈna tapea rima titiro+ mai nia mai i to ˈna manimani rima e horoa ˈtura ia Hamana+ te tamaiti a Hamedata te ati Agaga,+ te enemi o te ati Iuda.
11 Parau atura te arii ia Hamana: “Te horoahia ˈtu ra te ario e tera nunaa ia oe, ia rave oe mai tei au ia oe.”
12 Titauhia ˈtura te mau papai parau o te arii+ i te 13 o te mahana o te avaˈe matamua. Papai+ aˈera ratou pauroa ta Hamana i faaue i te mau tavana hau a te arii, te mau tavana i nia i te mau fenua, e te huiarii o tera e tera nunaa, te fenua tataitahi i ta ˈna iho papai* e te nunaa tataitahi i to ˈna iho reo. Ua papaihia te reira i te iˈoa o te arii Ahasueru e ua titirohia i te tapea rima titiro o te arii.+
13 Afai atura te tahi mau vea i te mau fenua atoa o te arii i te mau rata, o te faaue ra e faaore, e haapohe e e haamou pauroa te ati Iuda, te taata apî e te taata paari atoa, te tamarii e te vahine, i te hoê noa mahana, i te 13 o te mahana o te 12 o te avaˈe, oia hoi te avaˈe no Adara,+ e e haru i ta ratou mau faufaa.+
14 Ia riro tei papaihia i roto i teie mau rata ei ture i te mau fenua atoa e ia faaitehia i te mau nunaa atoa, ia ineine ratou no taua mahana ra.
15 Reva oioi aˈera te mau vea+ ia au i te faaueraa a te arii. Horoahia ˈtura te ture i Susana*+ te pare.* Parahi ihora te arii e Hamana no te inu, ua rapu râ te oire o Susana.*
Nota i raro i te api
^ Hiˈo i te tuhaa hau B15.
^ Hiˈo i te tuhaa hau B15.
^ Huri-atoa-hia “E tuu vau 10 000 taleni i roto i te faufaa a te arii no te feia e rave i teie ohipa.”
^ 1 taleni: 34,2 kg. Hiˈo i te tuhaa hau B14.
^ Aore ra “huru papairaa.”
^ Aore ra “Susa.”
^ Aore ra “aorai.”
^ Aore ra “Susa.”
