Esetera 4:1-17
4 I to Moredekai+ iteraa i te mau mea atoa tei ravehia,+ hahae ihora oia i to ˈna ahu, oomo ihora i te ahu oto e tuu ihora i te rehu i nia ia ˈna. Haere atura oia i ropu i te oire, a tuô ai no te peapea rahi.
2 Haere atura oia i te uputa noa o te aorai o te arii, aita hoi hoê e nehenehe e tomo atu ma te ahu oto.
3 E i te mau fenua atoa+ i tae ai te parau a te arii e ta ˈna faaueraa mana, tupu ihora i rotopu i te ati Iuda te oto rahi, te haapaeraa maa,+ te taˈi e te auê. Mea rahi tei tarava i nia iho i te ahu oto e te rehu.+
4 I te haereraa mai te mau tavini vahine e tavini tane* a Esetera e faaara ia ˈna, peapea roa ihora te arii vahine. Faatae atura oia i te ahu no Moredekai ia oomo oia i te reira eiaha râ to ˈna ahu oto, aita râ oia i farii.
5 Titau ihora Esetera ia Hataka, hoê o te mau taata tiaraa teitei* o te arii, ta te arii i faatoroa no te tavini ia Esetera, e faaue atura ia ˈna ia haere e ui ia Moredekai eaha te tupu ra.
6 Haere atura ïa Hataka ia Moredekai i te mahora o te oire i mua i te uputa o te aorai o te arii.
7 Faaite pauroa ˈtura Moredekai ia ˈna i tei tupu i nia ia ˈna e te tino moni tia+ ta Hamana i fafau e tuu i roto i te faufaa a te arii ia haamouhia te ati Iuda.+
8 Horoa atoa ˈtura oia ia ˈna hoê o te mau faaueraa mana papaihia tei horoahia i Susana*+ no te haamou ia ratou. Ia faaite Hataka i te reira ia Esetera e ia faataa ia ˈna i te tupuraa e ia faaue ia ˈna+ ia tomo i ǒ te arii no te taparu ia ˈna ia aroha mai i to ˈna nunaa.
9 Hoˈi maira Hataka e faaite ia Esetera i ta Moredekai i parau.
10 Pahono atura Esetera ia Hataka, ma teie mau faaueraa e parau ia Moredekai:+
11 “Ua ite pauroa te tavini a te arii e te nunaa o te mau fenua o te arii e ia tomo noa ˈtu te tahi tane aore ra vahine i roto i to te arii aua i roto mai+ ma te titau-ore-hia, hoê noa ture te faaohipahia: Ia haapohehia oia. E nehenehe oia e ora mai mai te peu noa e toro mai te arii i te sepeta auro.+ E aita vau i titauhia e te arii a 30 atura mahana.”
12 I te parauraahia mai Moredekai eaha ta Esetera i parau,
13 pahono atura oia ia Esetera: “Eiaha oe e manaˈo e no te mea tei roto oe i te utuafare o te arii e ora mai ïa oe a pohe ai pauroa te tahi atu ati Iuda.
14 Ia mamû noa hoi oe i teie taime, e noaa i te ati Iuda te tauturu e te faaoraraa na roto i te tahi atu ravea,+ o oe râ e te utuafare o to metua tane, e pohe ïa outou. E o vai tei ite e ere anei no te hoê tupuraa mai teie i noaa ˈi ia oe to oe tiaraa arii vahine?”+
15 Pahono atura Esetera ia Moredekai:
16 “Haere, a haaputuputu pauroa te ati Iuda e vai ra i Susana* e a haapae i te maa+ no ˈu. Eiaha e tamaa e e inu e toru mahana,+ i te po e te ao. E haapae atoa vau e ta ˈu mau tavini vahine i te maa. E tomo vau i ǒ te arii, ta te ture hoi e ore e faatia, e ia pohe noa ˈtu vau, e pohe au.”
17 Haere atura ïa Moredekai e rave ihora i te mau mea atoa ta Esetera i faaue ia ˈna e rave.
