Esetera 6:1-14
-
Faahanahanahia Moredekai e te arii (1-14)
6 I taua po ra, aita te taoto o te arii i topa. Parau atura ïa oia ia afaihia mai te buka tuatapaparaa,+ e taiohia maira te reira i te arii.
2 Itehia ihora e ua papaihia i roto ta Moredekai i faatia no nia ia Bigatana raua Teresa, na piti tia mana o te arii e tiai opani tei opua e haapohe i te arii Ahasueru.+
3 Ui ihora te arii: “Eaha tei ravehia no te faahanahana e no te haamauruuru ia Moredekai no te reira?” Na ô maira ta te arii mau tavini: “Aita hoê aˈe mea i ravehia no ˈna.”
4 Parau atura te arii i muri iho: “O vai to roto i te aua?” Ua haere mai hoi Hamana i roto i te aua i rapae+ o te aorai* o te arii no te parau i te arii e tarî ia Moredekai i nia i te pou ta ˈna i hamani no ˈna.+
5 Parau maira ta te arii mau tavini ia ˈna: “O Hamana+ tera e tia ra i roto i te aua.” Parau atura ïa te arii: “A faatomo mai ia ˈna.”
6 I te tomoraa mai Hamana, na ô atura te arii ia ˈna: “Eaha te ravehia no te taata ta te arii e hinaaro e faahanahana?” Na ô ihora Hamana i roto i to ˈna aau: “O vai atu â ta te arii e hinaaro e faahanahana hau aˈe ia ˈu?”+
7 Parau maira ïa Hamana i te arii: “No te taata ta te arii e hinaaro e faahanahana,
8 ia hopoihia mai te ahu arii+ ta te arii e oomo, e hoê puaahorofenua ta te arii e parahi, e te taamu upoo arii i nia iho i to ˈna afii.
9 E na te tahi huiarii faatura-roa-hia aˈe e haapao i te ahu e te puaahorofenua, e ia faaoomohia te taata ta te arii e hinaaro e faahanahana i te ahu, e ia faaori-haere-hia oia na nia iho i te puaahorofenua na te mahora o te oire. Ia tuôhia na mua ia ˈna: ‘Teie te ravehia no te taata ta te arii e hinaaro e faahanahana!’”+
10 Parau ihora te arii ia Hamana: “Haaviti! A rave i te ahu e te puaahorofenua, e a rave mai ta oe i parau iho nei no Moredekai te ati Iuda e parahi ra i te uputa o te aorai o te arii. Eiaha e haapae hoê aˈe mea ta oe i parau.”
11 Rave maira ïa Hamana i te ahu e te puaahorofenua, faaahu ihora ia Moredekai,+ faaori haere ihora ia ˈna na te mahora o te oire e tuô ihora i mua ia ˈna: “Teie te ravehia no te taata ta te arii e hinaaro e faahanahana!”
12 I muri iho, hoˈi atura Moredekai i te uputa o te aorai o te arii. O Hamana râ, haere ru ihora ïa i to ˈna fare, a oto ai ma te upoo tapoˈihia.
13 I te faatiaraa Hamana i te mau mea atoa tei tupu i nia ia ˈna i ta ˈna vahine faaipoipo o Zeresa+ e pauroa to ˈna hoa, parau maira to ˈna mau taata feruriraa paari e ta ˈna vahine faaipoipo o Zeresa: “Mai te peu e huaai no te ati Iuda o Moredekai, i mua hoi ia ˈna to oe haamataraa i te hiˈa, eita oe e upootia i nia ia ˈna. E hiˈa mau â oe i mua ia ˈna.”
14 Te paraparau noa ra ratou e o ˈna, tae maira te mau tia mana o te arii e hopoi oioi atura ia Hamana i te tamaaraa ta Esetera i faaineine.+
Nota i raro i te api
^ Heb: “fare.”
