Esetera 7:1-10
7 Tae maira ïa te arii raua Hamana+ i te tamaaraa a te arii vahine Esetera.
2 Parau faahou maira te arii ia Esetera i te piti o te mahana e inuhia ˈi te uaina: “Eaha ta oe e hinaaro ra, arii vahine Esetera? E horoa ˈtu vau. E eaha ta oe aniraa? Tae roa i te afaraa o ta ˈu faatereraa arii, e horoa vau na oe!”+
3 Pahono atura te arii vahine Esetera: “Ia farii-maitai-hia vau e oe, e te arii, e ia tia i te arii, teie ta ˈu e hinaaro: ia ora vau. E teie ta ˈu aniraa: ia faaorahia to ˈu nunaa.+
4 Ua hoohia hoi matou,+ o vau e to ˈu nunaa, ia faaorehia, ia haapohehia e ia haamouhia matou.+ Ahani matou i hoo-noa-hia ei tîtî, e mamû noa ïa vau. E ere râ mea tano teie ati, e fifihia hoi te arii i te reira.”
5 Parau maira te arii Ahasueru i te arii vahine Esetera: “O vai te taata tei tae roa e rave i tera ohipa, e teihea oia?”
6 Parau atura Esetera: “O tera taata ino o Hamana te enemi e te taata patoi.”
Riaria roa ihora Hamana no te arii e te arii vahine.
7 Tia aˈera te arii ma te riri rahi, faarue maira i te tamaaraa e haere atura i roto i te ô o te aorai. Tia aˈera râ Hamana no te taparu i te arii vahine Esetera ia faaora ia ˈna, ua taa hoi ia ˈna e ua faaoti papu te arii e faautua ia ˈna.
8 Hoˈi maira te arii i te fare i faatupuhia ˈi te tamaaraa na te ô o te aorai mai, e ite maira ia Hamana tei tarava i nia iho i te roˈi to reira Esetera. Tuô ihora te arii: “E mafera atoa anei o ˈna i te arii vahine i roto i to ˈu iho fare?” I te matararaa iho â tera mau parau na roto i te vaha o te arii, tapoˈihia ihora te hohoˈa mata o Hamana.
9 Parau ihora Harabona,+ e tia mana o te arii: “Ua faaineine atoa Hamana i te tahi pou no Moredekai,+ tei faaora i te arii+ na roto i ta ˈna faatiaraa. Te tia ra te reira i pihai iho i te fare o Hamana, e 50 kubiti* te teitei.” Parau ihora te arii: “A tarî ia ˈna i nia iho.”
10 Tarîhia ihora ïa Hamana i nia iho i te pou ta ˈna i faaineine no Moredekai, e ore ihora te riri o te arii.
Nota i raro i te api
^ Piri i te 22,3 m. Hiˈo i te tuhaa hau B14.
