Exodo 10:1-29
10 Na ô maira ïa Iehova ia Mose: “A tomo i ǒ Pharao, ua vaiiho hoi au i to ˈna aau e te aau atoa o ta ˈna mau tavini ia ore ia mǎrû mai,+ ia faaite hoi au i ta ˈu mau tapao nei i mua roa ia ˈna,+
2 e ia faatia ˈtu hoi oe i ta oe mau tamaiti e ta oe mau mootua i te ati ino mau ta ˈu i tairi i to Aiphiti, e eaha te mau tapao ta ˈu i faatupu i rotopu ia ratou,+ e e ite mau â outou o vau o Iehova.”
3 Tomo aˈera ïa Mose raua Aarona i ǒ Pharao e parau atura: “Teie ta Iehova te Atua o te mau Hebera i parau: ‘Ehia maororaa e ore ai oe e auraro ia ˈu?+ A tuu i to ˈu nunaa ia haere ia nehenehe ratou e tavini ia ˈu.
4 Ia ore â oe e farii e tuu i to ˈu nunaa ia haere, teie au e faatae mai i te vivi i to oe fenua ananahi.
5 E poˈi roa te fenua ia ratou, a ore atu ai e ite-faahou-hia te repo. E amu ratou i tei ore i mou i te ûa paari e tei toe mai na outou, e e amu pauroa ratou i ta outou mau tumu raau e tupu ra.+
6 E î to oe mau fare, te mau fare o ta oe mau tavini atoa, e te mau fare o to Aiphiti atoa i te reira i nia i te hoê faito aita to oe mau metua e to ratou mau metua i ite aˈenei mai to ratou oraraa mai â i teie fenua e tae roa mai i teie mahana.’”+ Fariu ê maira oia e haere atura i rapae mai mua ˈtu ia Pharao.
7 Parau maira ta Pharao mau tavini ia ˈna: “Ehia maororaa e tamau ai teie taata i te haamǎtaˈu ia* tatou? A tuu i taua mau taata ra ia haere ia nehenehe ratou e tavini ia Iehova to ratou Atua. Aita â i taa ˈtura ia oe e ua tuino-roa-hia o Aiphiti?”
8 Faahoˈihia maira ïa Mose raua Aarona ia Pharao ra e parau atura oia ia raua: “A haere, a tavini ia Iehova to outou Atua. Tera noa râ, o vai ma te haere?”
9 Parau maira Mose: “E haere matou e to matou mau taata apî, to matou mau ruhiruhia, ta matou mau tamaiti, ta matou mau tamahine, ta matou mau mamoe, e ta matou nǎnǎ puaatoro,+ no te mea e faatupu matou i te hoê oroa no Iehova.”+
10 Parau atura oia ia raua: “Te manaˈo ra anei outou e tuu vau ia outou e ta outou mau tamarii ia haere? Ia na reira vau, tei ia outou mau ra Iehova!+ Papu roa e te opua ra outou e rave i te tahi ohipa ino.
11 Eiaha ïa! O te mau tane anaˈe i rotopu ia outou te nehenehe e haere, a tavini atu ai ia Iehova, tera hoi ta orua i ani.” Tiahihia aˈera raua i rapae mai mua ˈtu ia Pharao.
12 Na ô maira ïa Iehova ia Mose: “A toro i to rima na nia i te fenua o Aiphiti, ia haere mai hoi te vivi i nia i te fenua o Aiphiti e ia amu ratou pauroa te raau tupu o te fenua, pauroa tei toe mai i te ûa paari.”
13 I reira iho, toro ihora Mose i ta ˈna raau na nia i te fenua o Aiphiti, e rave ihora Iehova ia puhi mai te mataˈi no hitia o te râ i nia i te fenua i taua mahana taatoa ra e ao noa ˈtura. E poipoi aˈera, faatae maira te mataˈi no hitia o te râ i te vivi.
14 Haere maira te mau vivi na nia i te fenua taatoa o Aiphiti e tau ihora na te mau tuhaa fenua atoa o Aiphiti.+ E ati rahi mau.+ Aita i itehia aˈenei te aere vivi mai tera, e ore atoa e ite-faahou-hia mai tera te rahi.
15 Poˈi ihora te fenua taatoa ia ratou, e poiri atura te fenua ia ratou. Amu aˈera ratou pauroa te raau tupu o te fenua e pauroa te maa hotu o te mau tumu raau tei toe mai i te ûa paari. Aita hoê aˈe rauere i toe mai i nia i te mau tumu raau e i nia i te mau raau tupu i te fenua taatoa o Aiphiti.
16 Titau ru atura ïa Pharao ia Mose raua Aarona e parau atura: “Ua hara vau ia Iehova to outou Atua e ia orua.
17 I teie nei, a faaore na i ta ˈu hara i teie noa taime, e a taparu ia Iehova to outou Atua ia hopoi ê oia i teie ati pohe ia ˈu nei.”
18 Haere atura ïa oia* i rapae mai mua ˈtu ia Pharao e taparu atura ia Iehova.+
19 Rave ihora ïa Iehova ia huri te mataˈi, a riro atu ai ei mataˈi puai roa no tooa o te râ, e hopoi-ê-hia ˈtura te mau vivi i roto i te miti Uteute. Aita hoê aˈe vivi i toe mai na te mau tuhaa fenua atoa o Aiphiti.
20 Tera râ, vaiiho atura Iehova i to Pharao aau ia etaeta,+ e aita ˈtura Pharao i tuu i te ati Iseraela ia haere.
21 Na ô maira ïa Iehova ia Mose: “A toro i to rima i nia i te raˈi ia haapoiri na nia i te fenua o Aiphiti, e poiri rahi mau â.”
22 Toro oioi atura Mose i to ˈna rima i nia i te raˈi, e haapoiri rahi ihora na te fenua taatoa o Aiphiti e toru mahana.+
23 Aita ratou i ite te tahi i te tahi, e aita hoê aˈe o ratou i tia i nia mai te vahi ta ratou e parahi ra e toru mahana, area i ǒ te ati Iseraela taatoa, mea maramarama ïa i roto i to ratou mau nohoraa.+
24 Titau atura ïa Pharao ia Mose e parau atura: “A haere, a tavini ia Iehova.+ Ta outou noa mau mamoe e ta outou nǎnǎ puaatoro ta outou e vaiiho mai. Ta outou mau tamarii atoa te nehenehe e haere na muri ia outou.”
25 Parau maira râ Mose: “O oe atoa te horoa mai i te animara no te mau tusia e te mau tusia taauahi, e e pûpû matou i te reira ia Iehova to matou Atua.+
26 E na muri atoa mai ta matou mau animara ia matou. Aita e animara* e nehenehe e vaiihohia mai, no te mea e rave matou vetahi o te reira no te haamori ia Iehova to matou Atua, e aita matou i ite eaha ta matou e pûpû ei haamoriraa ia Iehova e ia tae roa ˈtu matou i ǒ.”
27 Vaiiho atura ïa Iehova i to Pharao aau ia etaeta, e aita ˈtura Pharao i tuu ia ratou ia haere.+
28 Parau atura Pharao ia ˈna: “A haere i rapae! Eiaha roa oe e imi i te tia faahou mai i mua i to ˈu aro. I te mahana e tia mai ai oe i mua i to ˈu aro, e pohe oe.”
29 Parau maira Mose: “Mai ta oe iho â i parau, eita vau e imi i te tia faahou mai i mua i to aro.”
