Exodo 14:1-31
14 Na ô maira ïa Iehova ia Mose:
2 “A parau i te ati Iseraela ia hoˈi i muri e ia puhapa i mua i Pihahirota, i ropu i Migadola e te miti, to mua noa mai Baala-zephona.+ E puhapa outou i mua i taua vahi ra i tatahi.
3 E parau hoi Pharao no te ati Iseraela: ‘Te overe ra ratou ma te taa ore na taua fenua ra. E medebara ati aˈe ia ratou.’
4 E vaiiho vau i to Pharao aau ia etaeta,+ e aˈuaˈu oia ia ratou, e faahanahana vau ia ˈu na roto ia Pharao e ta ˈna nuu taatoa,+ e e ite mau â to Aiphiti e o vau o Iehova.”+ O ta ratou ïa i rave.
5 I muri aˈe, faaitehia maira i te arii o Aiphiti e ua reva te nunaa. I reira iho, taui aˈera to Pharao e to ta ˈna mau tavini manaˈo* no te nunaa,+ e parau aˈera ratou: “Eaha tatou i na ô ai, a faatiamâ ˈtu ai ia Iseraela i te taviniraa ia tatou ei tîtî?”
6 Faaue ihora ïa oia ia faaineinehia ta ˈna mau pereoo tamaˈi, e rave ihora i to ˈna mau taata na muri ia ˈna.+
7 Rave ihora oia na 600 pereoo maitai roa ˈˈe e pauroa te tahi atu pereoo i Aiphiti, e te feia tamaˈi i nia i taua mau pereoo ra.
8 Vaiiho ihora ïa Iehova i te aau o Pharao arii o Aiphiti ia etaeta, e aˈuaˈu ihora oia i te ati Iseraela, a haere ai te ati Iseraela i rapae ma te tiaturi.*+
9 Aˈuaˈu aˈera to Aiphiti ia ratou,+ ma te mau puaahorofenua e pereoo atoa a Pharao e to ˈna mau taata faahoro puaahorofenua e ta ˈna nuu, e noaahia ˈtura ratou o te puhapa ra i tatahi, i pihai iho i Pihahirota, to mua noa mai Baala-zephona.
10 A piri roa ˈtu ai Pharao ia ratou, hiˈo maira te ati Iseraela e ite maira i to Aiphiti e aˈuaˈu ra ia ratou. Riaria ihora te ati Iseraela e tiaoro aˈera ia Iehova.+
11 Parau maira ratou ia Mose: “No te mea anei aita e vahi hunaraa i Aiphiti i aratai mai ai oe ia matou i ǒ nei ia pohe i te medebara?+ Eaha ta oe i rave ia matou a aratai ai ia matou i rapae i Aiphiti?
12 E ere anei teie ta matou i parau ia oe i Aiphiti, a na ô atu ai: ‘Vaiiho noa na ia matou ia tavini i to Aiphiti’? Mea maitai aˈe hoi no matou ia tavini i to Aiphiti i te pohe i te medebara.”+
13 Na ô atura ïa Mose i te nunaa: “Eiaha e mǎtaˈu.+ A mau papu e a hiˈo i te faaoraraa a Iehova ta ˈna e faatupu no outou i teie mahana.+ To Aiphiti ta outou e ite ra i teie mahana, e ore roa outou e ite faahou e a muri noa ˈtu.+
14 Na Iehova iho e aro no outou,+ e e tiai noa outou ma te mamû.”
15 Na ô maira ïa Iehova ia Mose: “Eaha oe e tiaoro noa mai ai ia ˈu? A parau i te ati Iseraela ia haere.
16 O oe râ, a amo i to raau i nia e a toro i to rima na nia i te miti e a faataa ê i te miti, ia nehenehe te ati Iseraela e haere na ropu i te miti na nia i te repo mǎrô.
17 O vau râ, te vaiiho nei ïa vau i te aau o to Aiphiti ia etaeta, a tomo atu ai ratou na muri mai i te ati Iseraela. E faahanahana ïa vau ia ˈu na roto ia Pharao e ta ˈna nuu taatoa, ta ˈna mau pereoo tamaˈi, e to ˈna mau taata faahoro puaahorofenua.+
18 E ite mau â to Aiphiti e o vau o Iehova ia faahanahana vau ia ˈu na roto ia Pharao, ta ˈna mau pereoo tamaˈi, e to ˈna mau taata faahoro puaahorofenua.”+
19 E te melahi a te Atua mau,+ o te haere ra na mua i te ati Iseraela, reva ihora ïa e na muri maira ia ratou, e te pou ata to mua mai ia ratou, haere ihora ïa i muri mai ia ratou e tia ihora i reira.+
20 Haere maira ïa taua pou ata ra i ropu i to Aiphiti e te ati Iseraela.+ I te hoê pae, e ata poiri ïa. I te tahi atu pae, te turama ra ïa te reira i te po.+ Aita ïa to ǒ mai i tapiri mai i to te tahi atu pae i taua po taatoa ra.
21 Toro ihora ïa Mose i to ˈna rima na nia i te miti,+ e faaotohe ihora Iehova i te miti i te mataˈi puai no hitia o te râ i taua po taatoa ra, e vahihia ihora te mau pape,+ a mǎrô atu ai te repo+ e miti to reira na mua ˈtu.
22 Haere atura ïa te ati Iseraela na ropu i te miti na nia i te repo mǎrô,+ a tia noa ˈi te mau pape mai te hoê patu i to ratou pae atau e i to ratou pae aui.+
23 Aˈuaˈu maira to Aiphiti ia ratou, e na muri maira ia ratou i ropu i te miti ta Pharao mau puaahorofenua atoa, ta ˈna mau pereoo tamaˈi, e to ˈna mau taata faahoro puaahorofenua.+
24 I te araraa poipoi,* hiˈo maira Iehova i to Aiphiti na roto mai i te pou auahi e te pou ata,+ e faarapu ihora oia i to Aiphiti.
25 Tatara noa ihora oia i te huira o to ratou mau pereoo, a fifi atu ai ratou i te faahoro, e te parau ra hoi to Aiphiti: “E horo ê anaˈe i te ati Iseraela, no te mea te aro nei Iehova i to Aiphiti no ratou.”+
26 Na ô maira ïa Iehova ia Mose: “A toro i to rima na nia i te miti, ia hoˈi mai te mau pape i nia i to Aiphiti, to ratou mau pereoo tamaˈi e to ratou mau taata faahoro puaahorofenua.”
27 I reira iho, toro ihora Mose i to ˈna rima na nia i te miti, e a fatata ˈi i te ao, hoˈi ihora te miti i to ˈna vairaa. A horo ê ai to Aiphiti, haapohe ihora Iehova ia ratou i ropu i te miti.+
28 Tapoˈi maira te mau pape tei hoˈi mai i te mau pereoo tamaˈi, te mau taata faahoro puaahorofenua e te nuu taatoa a Pharao, tei tomo i roto i te miti na muri mai ia ratou.+ Aita hoê aˈe o ratou i vaiihohia ia ora mai.+
29 Area te ati Iseraela, haere aˈera ïa na nia i te repo mǎrô na ropu i te miti,+ a tia noa ˈi te mau pape mai te hoê patu i to ratou pae atau e i to ratou pae aui.+
30 Faaora ihora ïa Iehova ia Iseraela i taua mahana ra i te rima o to Aiphiti,+ e ite aˈera Iseraela i to Aiphiti tei pohe na tatahi.
31 Ite atoa aˈera Iseraela i te mana rahi* o Iehova i te tairiraa i to Aiphiti, e mǎtaˈu aˈera te nunaa ia Iehova e faatupu atura i te faaroo ia Iehova e i ta ˈna tavini o Mose.+
Nota i raro i te api
^ Heb: “aau.”
^ Heb: “ma te rima i nia.”
^ Oia hoi te area hora 2 i te aahiata tae roa i te hora 6 i te poipoi.
^ Heb: “rima.”
