Exodo 27:1-21
27 “E hamani oe i te fata i te raau sitima,+ e pae kubiti* te roa e e pae kubiti te aano. Ei orapa te fata, e e toru kubiti te teitei.+
2 E hamani oe i te tara+ i nia iho i to ˈna na poro e maha. E tuhaa na tara no te fata, e e tapiri oe i te fata i te veo.+
3 E hamani oe i te patete no te tatara i te rehu,* e te ope, te auˈa, te patia, e te farii auahi, e e hamani oe i te mau taihaa atoa o te fata i te veo.+
4 E hamani oe i te auri varavara no te fata, te hoê upeˈa veo, e e maha potaa veo i nia iho i na poro e maha o te upeˈa.
5 E tuu oe i te reira i raro aˈe i te hiti o te fata, e te upeˈa veo i ropu mau i te fata na raro mai.
6 E hamani oe no te fata i te raau amoraa i te sitima e e tapiri oe i te reira i te veo.
7 E oomohia te mau raau amoraa i roto i te mau potaa, e ia amohia te fata, ei na pae e piti ïa na raau amoraa.+
8 E hamani oe i te fata i te hohoˈa o te hoê afata poopoo iri raau. E hamanihia te reira mai tei faaitehia ia oe i nia i te mouˈa.+
9 “E hamani oe i te aua+ o te sekene. No te pae apatoa, ei paruru lino maitai roa tavirihia to te aua, 100 kubiti te roa i taua pae ra.+
10 E 20 pou to ˈna, e e 20 niu veo. Ei ario te mau tapea o te mau pou e to ratou mau taihaa* no te tamauraa.
11 Ei 100 kubiti atoa te roa o te paruru no te pae apatoerau, e to ˈna na 20 pou e to ratou na 20 niu veo, e ei ario te tapea e te mau taihaa* no te taamuraa o na pou.
12 Ei paruru to te pae tooa o te râ e 50 kubiti ia au i te aano o te aua, e ei ahuru pou e ahuru niu.
13 E 50 kubiti te aano o te aua i hitia o te râ i te pae o te hitiraa mahana.
14 Ei 15 kubiti te paruru i teie pae mai, e toru pou e e toru niu.+
15 E no te tahi atu pae, ei 15 kubiti te paruru, e e toru pou e e toru niu.
16 “E no te tomoraa o te aua, ei paruai* e 20 kubiti te roa hamanihia i te taura ninamu, te huruhuru mamoe vareau, te ahu uteute e te lino maitai roa tavirihia tei raraahia,+ e maha pou e e maha niu.+
17 E tamauraa ario e e tapea ario to te mau pou atoa ati aˈe te aua, e veo râ to ratou mau niu.+
18 Ei 100 kubiti te roa o te aua,+ ei 50 kubiti te aano, e 5 kubiti te teitei, hamanihia i te lino maitai roa tavirihia, e ei niu veo to ˈna.
19 Pauroa te taihaa e te taoˈa faaohipahia no te taviniraa i te sekene, tae noa ˈtu i te mau naero rahi o te sekene e pauroa te naero rahi o te aua, ei veo anaˈe ïa.+
20 “E faaue oe i te ati Iseraela ia hopoi mai i te hinu olive anoi-ore-hia no te mori, ia ama noa te mau mori.+
21 I roto i te tiahapa o te amuiraa, i rapaeau atu i te paruru to pihai iho i te Haamanaˈoraa,+ e haapao Aarona e ta ˈna mau tamaiti ia ama noa te mau mori mai te ahiahi e poipoi noa ˈtu i mua ia Iehova.+ E faatureraa vai maoro teie e hope noa ˈtu to ratou mau uˈi ia haapaohia e te ati Iseraela.+
Nota i raro i te api
^ 1 kubiti: 44,5 cm. Hiˈo i te tuhaa hau B14.
^ Aore ra “rehu mii,” oia hoi e rehu anoihia e te mii o te mau tusia.
^ Aore ra “potaa,” “taura” no te taamuraa.
^ Aore ra “potaa,” “taura” no te taamuraa.
^ Aore ra “paruru.”
