Exodo 33:1-23
33 Na ô faahou maira Iehova ia Mose: “A haere oe e te nunaa ta oe i aratai i rapae i te fenua o Aiphiti. A haere i te fenua ta ˈu i horeo ia Aberahama, Isaaka e Iakoba a na ô ai: ‘I to huaai e horoa ˈtu ai au i te reira.’+
2 E tono vau i te hoê melahi na mua ia oe+ e e tiahi au i te ati Kanaana, te ati Amori, te ati Heta, te ati Perizi, te ati Hevi e te ati Iebusi.+
3 A pauma i te hoê fenua e tahe noa te û e te meri.+ Eita râ vau e haere na rotopu ia outou, e nunaa mârô* hoi outou,+ aˈunei au e haamou ai ia outou i nia i te eˈa.”+
4 I to te nunaa faarooraa i teie parau etaeta, oto ihora ratou, e aita hoê aˈe i oomo i to ˈna mau faaunauna.
5 Na ô maira Iehova ia Mose: “A parau i te ati Iseraela: ‘E nunaa mârô* outou.+ Mea poto roa ia haere au na rotopu ia outou e ia haamou ia outou.+ No reira, a tatara i to outou mau faaunauna a feruri ai au e nafea vau ia outou.’”
6 No reira, mai te mouˈa Horeba ˈtu aita faahou te ati Iseraela i oomo* i to ratou mau faaunauna.
7 Rave atura Mose i to ˈna fare ie e patia ˈtura i rapae i te puhapa, mea huru atea i te puhapa, e parau ihora i te reira e tiahapa o te amuiraa. E haere mai na te taata atoa e uiui ia Iehova+ i te tiahapa o te amuiraa i rapae i te puhapa.
8 I te taime iho â e haere ai Mose i te tiahapa, e tia pauroa te taata i nia a tia noa ˈi i te tomoraa o to ratou iho fare ie, e e hiˈo noa ratou ia Mose e ia tomo roa oia i roto i te tiahapa.
9 I te taime iho â e tomo ai Mose i roto i te tiahapa, e pou mai te pou ata+ i raro e e tia noa i te tomoraa o te tiahapa a paraparau noa ˈi te Atua ia Mose.+
10 Ia ite te nunaa taatoa i te pou ata ia tia i te tomoraa o te tiahapa, e tia pauroa ratou i nia e e tipapa ratou i mua i te tomoraa o to ratou iho fare ie.
11 Paraparau maira Iehova ia Mose e aro e aro,+ mai ta te tahi taata e paraparau i te tahi atu. Ia hoˈi oia i te puhapa, eita Iosua+ te tamaiti a Nuna, ta ˈna tavini e to ˈna tauturu,+ e faarue i te tiahapa.
12 Parau atura Mose ia Iehova: “Inaha, te parau nei oe ia ˈu: ‘A haapauma i teie nunaa,’ aita râ oe i faaite mai o vai ta oe e tono na muri ia ˈu. Hau atu â, ua parau oe: ‘Ua ite au ia oe na nia i to oe iˈoa,* e ua fariihia oe e au.’
13 Mai te peu ua fariihia vau i mua i to aro, a faaite mai na i to oe mau eˈa,+ ia ite au ia oe e ia fariihia vau i mua i to aro. A haamanaˈo atoa e o to oe nunaa teie nunaa.”+
14 Na ô maira ïa oia: “O vau iho* te haere na muri ia oe,+ e e horoa vau i te faafaaearaa no oe.”+
15 Parau atura Mose ia ˈna: “Ia ore oe iho* ia haere na muri ia ˈu, eiaha e haapauma ia matou mai ǒ nei atu.
16 E nafea e itehia ˈi e ua fariihia vau i mua i to aro, o vau e to oe nunaa? E ere anei ia na muri oe ia matou,+ ia taa ê au e to oe nunaa i te tahi atu mau nunaa i nia i te fenua?”+
17 Na ô faahou maira Iehova ia Mose: “E rave atoa vau i ta oe e ani mai ra, no te mea ua fariihia oe e au e ua ite au ia oe na nia i to oe iˈoa.”
18 Parau atura oia: “A faaite mai na i to hanahana.”
19 Na ô maira râ oia: “E faahaere au i to ˈu maitai atoa na mua i to aro, e e faaite au i mua ia oe i te iˈoa ra o Iehova.+ E hamani maitai au i ta ˈu e hamani maitai atu, e aroha hamani maitai au i ta ˈu e aroha hamani maitai atu.”+
20 Na ô faahou maira râ oia: “Eita oe e nehenehe e ite i to ˈu aro, aita hoi e taata e nehenehe e ite ia ˈu e e ora noa.”
21 Na ô faahou maira Iehova: “Teie te tahi vahi i pihai iho ia ˈu. A tia i nia i te mato.
22 Ia haere to ˈu hanahana na pihai iho, e tuu vau ia oe i roto i te afâ mato, e e paruru vau ia oe i to ˈu rima e ia haere roa ˈtu vau na pihai iho.
23 I muri iho, e tatara vau i to ˈu rima, e e ite oe i to ˈu tua. Eita râ to ˈu aro e itehia.”+
Nota i raro i te api
^ Heb: “aˈî etaeta.”
^ Heb: “aˈî etaeta.”
^ Heb: “tatara.”
^ Aore ra “Ua maiti au ia oe.”
^ Heb: “To ˈu aro.”
^ Heb: “Ia ore to aro.”
