Exodo 38:1-31
38 Hamani ihora oia i te fata tusia taauahi i te raau sitima. Hoê â roa e hoê â aano, e pae kubiti* te roa, e pae kubiti te aano, e e toru kubiti te teitei.+
2 Hamani ihora oia i to ˈna na tara i nia i to ˈna na poro e maha. E tuhaa to ˈna na tara no taua fata ra. Tapiri atura oia i te reira i te veo.+
3 I muri iho, hamani atura oia i te mau taihaa atoa o te fata, te mau farii rehu, te mau ope, te mau auˈa, te mau patia e te mau farii auahi. Ua hamani oia i teie mau taihaa atoa i te veo.
4 Hamani atoa ˈtura oia i te hoê upeˈa veo no te fata, e upeˈa veo i raro aˈe i to ˈna hiti, i ropu i raro.
5 Faatô ihora oia e maha potaa i pihai iho i te upeˈa veo, ei tapearaa no na raau amoraa.
6 Hamani atura oia i na raau amoraa i te sitima e tapiri atura i te veo.
7 Oomo atura oia i na raau amoraa i roto i te mau potaa i te hiti o te fata no te amo i te reira. Ua hamani oia i te fata i te hohoˈa o te hoê afata poopoo iri raau.
8 I muri iho, hamani atura oia i te tura veo+ e to ˈna vairaa veo. Ua faaohipa oia i te hiˈo* a te mau vahine tei faanahohia no te tavini i te tomoraa o te tiahapa o te amuiraa.
9 I muri iho, hamani atura oia i te aua.+ No te pae apatoa o te aua, ua hamani oia i te paruru i te lino maitai roa tavirihia, 100 kubiti te roa.+
10 E 20 pou e e 20 niu veo, e e ario te mau tapea o te mau pou e to ratou mau taihaa* no te tamauraa.
11 E no te pae apatoerau, 100 kubiti atoa te roa o te paruru. E veo to ˈna na 20 pou e to ratou na 20 niu. E ario te mau tapea o na pou e te mau taihaa* no te tamauraa.
12 Area no te pae tooa o te râ, e 50 kubiti te aano o te mau paruru. E ahuru pou e e ahuru niu, e e ario te mau tapea o te mau pou e to ratou mau taihaa* no te tamauraa.
13 Te aano i hitia o te râ i te pae o te hitiraa mahana, e 50 kubiti ïa.
14 Te vai ra 15 kubiti te paruru i te pae tomoraa o te aua, e toru pou e e toru niu.
15 E no te tahi atu apaapa i te tahi atu pae o te tomoraa o te aua, te vai ra 15 kubiti paruru, e e toru pou e e toru niu.
16 Pauroa te paruru ati aˈe te aua, e lino maitai roa tavirihia.
17 E veo te mau niu o te mau pou, e ario te mau tapea o te mau pou e to ratou mau taihaa* no te tamauraa, ua tapirihia te niaraa i te ario, e e tapea ario to te mau pou atoa o te aua.+
18 Ua raraahia te paruai* o te tomoraa o te aua i te taura ninamu, te huruhuru mamoe vareau, te ahu uteute e te lino maitai roa tavirihia. E 20 kubiti te roa e e 5 kubiti te teitei, hoê â teitei e te mau paruru o te aua.+
19 Ua hamanihia to ratou na pou e maha e to ratou na niu i te veo. E ario to ratou mau tapea e taihaa* no te tamauraa, e ua tapirihia to ratou niaraa i te ario.
20 E veo pauroa te naero rahi no te sekene e ati aˈe te aua.+
21 Teie te tapura o te mau taihaa i roto i te sekene, te sekene o te Haamanaˈoraa,+ tei tapurahia ia au i te faaueraa a Mose, e hopoia hoi na te ati Levi+ i raro aˈe i te aratairaa a Itamara+ te tamaiti a Aarona te tahuˈa.
22 Ua rave Bezaleela+ te tamaiti a Uri te tamaiti a Hura o te opu o Iuda pauroa ta Iehova i faaue ia Mose.
23 O Oholiaba+ te tamaiti a Ahisemaka o te opu o Dana atoa na muri ia ˈna, te hoê taata rimaî, nira faanehenehe e raraa i te taura ninamu, te huruhuru mamoe vareau, te ahu uteute, e te lino maitai roa.
24 Pauroa te auro tei faaohipahia no te ohipa atoa o te vahi moˈa, hoê â ïa faito e te rahiraa auro no te tusia taueuehia,+ e 29 taleni* e e 730 sekela* ia au i te sekela o te vahi moˈa.*
25 E te ario a te feia o te amuiraa tei tapaohia to ratou iˈoa, 100 taleni ïa e 1 775 sekela ia au i te sekela o te vahi moˈa.*
26 Te afa sekela na nia i te taata tataitahi, o te afa o te sekela ia au i te sekela o te vahi moˈa* no te mau tane atoa i rotopu i te feia tei tapaohia to ratou iˈoa mai te 20 matahiti e nia ˈˈe,+ ua raea ïa i te 603 550.+
27 Te faatôraa i te mau niu o te vahi moˈa e te mau niu no te paruru, 100 ïa taleni, 100 niu no 100 taleni, hoê taleni no na niu tataitahi.+
28 Ua hamani oia i te mau tapea no te mau pou e ua tapiri atu i to ratou niaraa e ua puoi te tahi i te tahi maoti na 1 775 sekela.
29 E 70 taleni e e 2 400 sekela te veo o te ô.*
30 Ua rave oia i te reira no te hamani i te mau niu o te tomoraa o te tiahapa o te amuiraa, te fata veo e to ˈna upeˈa veo, pauroa te taihaa o te fata,
31 te mau niu ati aˈe te aua, te mau niu o te tomoraa o te aua, e pauroa te naero rahi o te sekene e pauroa te naero rahi+ ati aˈe te aua.
Nota i raro i te api
^ 1 kubiti: 44,5 cm. Hiˈo i te tuhaa hau B14.
^ Oia hoi e hiˈo faaanaana-roa-hia.
^ Aore ra “potaa,” “taura” no te taamuraa.
^ Aore ra “potaa,” “taura” no te taamuraa.
^ Aore ra “potaa,” “taura” no te taamuraa.
^ Aore ra “potaa,” “taura” no te taamuraa.
^ Aore ra “paruru.”
^ Aore ra “potaa,” “taura” no te taamuraa.
^ 1 taleni: 34,2 kg. Hiˈo i te tuhaa hau B14.
^ 1 sekela: 11,4 g. Hiˈo i te tuhaa hau B14.
^ Aore ra “sekela moˈa.”
^ Aore ra “sekela moˈa.”
^ Aore ra “sekela moˈa.”
^ Aore ra “tusia taueuehia.”
